ગુજરાતમાં (Gujarat) સાર્વત્રિક વરસાદ વરસી રહ્યો છે. રાજ્યમાં અત્યાર સુધી વરસેલા વરસાદની વાત કરવામાં આવે તો સીઝનનો 93.3 ટકા વરસાદ (Rain) વરસી ચુક્યો છે. સૌથી વધુ કચ્છમાં 143.22 ટકા વરસાદ વરસ્યો છે. તો જૂનાગઢ (Junagadh) શહેરમાં પણ ધોધમાર વરસાદ છે. જુનાગઢમાં સવારે બે કલાકમાં એક ઇંચ વરસાદ ખાબક્યો છે. બીજી તરફ ઉપરવાસમાં ભારે વરસાદ પડી રહ્યો છે. જેના પગલે કાળવા નદીમાં ઘોડાપૂર આવ્યુ છે. સીઝનમાં બીજી વખત કાળવા નદીમાં પૂરની સ્થિતિ સર્જાઇ છે. નદીમાં ઘોડાપૂર આવતા નીચાણવાળા વિસ્તારોને એલર્ટ કરવામાં આવ્યા છે.
છેલ્લા બે દિવસથી ગિરનાર જંગલમાં અનરાધાર વરસાદ પડી રહ્યો છે. ભારે વરસાદ બાદ જૂનાગઢનો સૌથી મોટો હસનાપુર ડેમ ઓવરફ્લો થયો છે. ભારે વરસાદ બાદ જંગલની વચ્ચે આવેલો આ ડેમ ભરાઇ ગયો છે. હસનાપુર ડેમ જૂનાગઢ શહેરને પાણી પૂરું પાડે છે. ત્યારે ડેમ ઓવરફ્લો થતાં નીચાણવાળા વિસ્તારોને એલર્ટ કરવામાં આવ્યા છે. ગલીયાવાડ, સાબલપુર, સરગવાળા, બામણગામ અને દેરવાણ ગામમાં એલર્ટ અપાયુ છે.
જૂનાગઢમાં ગિરનાર પર્વત અને દાતાર ડુંગર ઉપર ધોધમાર વરસાદ વરસ્યો છે. વાદળોથી ઘેરાયો ગીરનાર અને દાતાર ડુંગર પર વરસાદના પગલે રમણીય વાતાવરણ જોવા મળી રહ્યુ છે. ગિરનાર ઉપર બે ઇંચ કરતા પણ વધુ વરસાદ ખાબક્યો છે. જેના પગલે ગિરનારના પગથિયા પરથી પાણી વહી રહ્યા છે. જેનો અદભુત નજારો જોવા મળી રહ્યો છે.