ગુજરાતમાં ચાંદીપુરા વાયરસનો ખૌફ ફેલાવતી માખી આખરે કેમેરામાં કેદ થઈ છે. તમને જણાવી દઈએ કે હાલ ગુજરાતમાં ચાંદીપુરા વાયરસના કેસોમાં સતત વધારો નોંધાઈ રહ્યો છે ત્યારે આજે આ વાયરસના શંકાસ્પદ 27 કેસ નોંધાયા છે જેમાંથી અત્યાર સુધી 15 લોકોનાં મૃત્યુ થયા હોવાની માહિતી મળી રહી છે. ત્યારે આ રોગ ફેલાવનાર માખીનો વીડિયો સામે આવી રહ્યો છે.
ચાંદીપુરા વાયરસનો ખૌફ ફેલાવતી મોતની માખી એટલેકે સેન્ડફ્લાય કેમેરામાં કેદ થઈ છે. તમને જણાવી દઈએ કે હાલ દહેગામમાં આવી 1 નહીં 2 નહીંને કુલ 19 સેન્ડફ્લાય જોવા મળી છે. આ માખીઓના સેમ્પલ લેબોરેટરી તપાસ માટે પૂણે મોકલાયા છે.
મોતનો તાંડવ મચાવતી આ સેન્ડફ્લાય માખી TV9 ગુજરાતીના કેમેરામાં કેદ થઈ છે. પંચમહાલના કોટડા ગામે શંકાસ્પદ કેસ નોંધાયો હતો. ત્યારે જે બાળકી આ વાયરસથી સંક્રમિત થઈ તેના જ ઘર પાસેથી 19 માખીઓ મળી આવી છે. આ સાથે બાળકીના ઘરમાંથી પણ 4 સેન્ડફ્લાય મળી આવતા આરોગ્ય વિભાગ દોડતુ થયું છે. ત્યારે આ માખીઓના સેમ્પલ હાલ તપાસ માટે પૂણે મોકલવામાં આવ્યા છે. ત્યારે તંત્ર મકાનની દિવાલો પુરાવાની અને દવા છંટકાવની કામગીરી કરાવી રહ્યું છે.
આ માખી તેની ઉત્પત્તિ માટે ઈંડા મુકે છે. મચ્છરની જેમ ઈયળ, કોશેટો અને પછી પુખ્ત માખી બને છે. તમને જણાવી દઈએ કે આ માખી સામાન્ય માખી કરતા ચાર ગણી નાની હોય છે.તેમજ નરી આંખે જોઈ શકાય તેટલું કદ ધરાવે છે.
આ માખી મોટાભાગે ભેજવાળા વાળા વિસ્તારમાં વધુ જોવા મળે છે. તે ઘરની અંદર પણ તેનો ઉપદ્રવ થઈ શકે છે. આ માખી ઘરમાં કે ઘરની બહાર કાચી અને પાકી દિવાલ પર કે તેની તિરાળોમાં જોવા મળે છે. ભેજવાળા વાતાવરણમાં ઉપદ્રવ વધે છે. ગાર-લીપણવાળા ઘરની તિરાડોમાં પણ તે જોવા મળે છે. દિવાલમાં રહેલા છીદ્રોમાં પણ આ માખી જોવા મળી શકે છે.