Breaking News: વાવ-થરાદ જિલ્લામાં ભારે પવન અને વરસાદે લીધો બે લોકોનો ભોગ, પરિવારોમાં શોકનો માહોલ

વાવ-થરાદ પંથકમાં ભારે પવન સાથે વરસેલા વરસાદે ભારે તબાહી મચાવી છે. વાવ તાલુકાના માડકા ગામમાં પવનના જોરદાર ઝાપટાને કારણે એક પતરાનો શેડ અચાનક ઊડીને ધરાશાયી થયો હતો. આ દુર્ઘટનામાં 42 વર્ષીય ભગવાન પટેલ શેડની નીચે દબાઈ જતા ગંભીર રીતે ઈજાગ્રસ્ત થયા હતા. તેમને તાત્કાલિક સારવાર માટે ખસેડવામાં આવ્યા હતા, પરંતુ સારવાર દરમિયાન તેમનું મોત નિપજ્યું હતું.

તનવાડ ગામમાં વૃક્ષ ધરાશાયી થતા વૃદ્ધાનું કરુણ મોત

બીજી ઘટનામાં ભાભર તાલુકાના તનવાડ ગામમાં ભારે પવનના કારણે એક વિશાળ લીમડાનું વૃક્ષ ધરાશાયી થયું હતું. વૃક્ષ નીચે દટાઈ જતાં 60 વર્ષીય કાશુબેન વાઘેલાનું ઘટનાસ્થળે જ મોત થયું હતું. સ્થાનિક લોકો દ્વારા બચાવ કામગીરી હાથ ધરવામાં આવી હતી, પરંતુ તેમને બચાવી શકાયા નહોતા. આ ઘટનાથી ગામમાં શોકનો માહોલ છવાયો છે.

જિલ્લામાં વરસાદી તોફાનથી સામાન્ય જનજીવન પ્રભાવિત

જિલ્લાના વિવિધ વિસ્તારોમાં ભારે પવન અને વરસાદના કારણે અનેક જગ્યાએ વૃક્ષો ધરાશાયી થયા હતા તેમજ વીજ પુરવઠો અને વાહનવ્યવહાર પર પણ અસર પડી હતી. અચાનક બદલાયેલા હવામાનના કારણે લોકોમાં ભય અને ચિંતાનો માહોલ સર્જાયો છે. તંત્ર દ્વારા પરિસ્થિતિ પર નજર રાખવામાં આવી રહી છે.

પરિવારોમાં શોક અને તંત્રની કાર્યવાહી

બન્ને ઘટનામાં થયેલા આકસ્મિક મોતને પગલે મૃતકોના પરિવારોમાં ગમગીની છવાઈ ગઈ છે. સ્થાનિક તંત્ર દ્વારા ઘટનાની નોંધ લઈ આગળની કાર્યવાહી હાથ ધરવામાં આવી છે. હવામાન વિભાગે આગામી દિવસોમાં પણ ભારે પવન અને વરસાદની શક્યતા વ્યક્ત કરતાં લોકોને સાવચેતી રાખવાની અપીલ કરી છે.

આ પણ વાંચો- હવામાન વિભાગની સૌથી મોટી ચેતવણી, 1600 KM લાંબી આફત! દેશના 17 રાજ્યોમાં કુદરતનો પ્રકોપ