જાણીતી લોકગાયિકા કાજલ મહેરિયાના લગ્ન મામલે થોડા દિવસ પહેલા વિવાદ આવ્યો હતો. પરિવાર અને સમાજની જાણ બહાર કાજલ મહેરિયાએ લગ્ન કર્યાની પોસ્ટ વાયરલ થઈ હતી. જે બાદ કાજલ મહેરિયાએ સોશિયલ મીડિયા પર વીડિયો પોસ્ટ કરી ખુલાસો હતો. ત્યારે હવે લોકગાયિકા કાજલ મહેરિયાના પતિ પર જીવલેણ હુમલો થયાની ઘટના સામે આવી છે.
ડઢાણા ગામે ચાલુ કાર્યક્રમમાં હુમલો કરવામાં આવ્યો છે. લાઈવ પ્રોગ્રામ દરમિયાન હિંસક ઘટનાથી અફરાતફરી મચી હતી.લગ્ન પ્રસંગે ગરબા કાર્યક્રમમાં બનેલ ઘટનાનો વીડિયો સોશિયલ મીડિયામાં વાયરલ થયો છે. હાલમાં પોલીસ આરોપીઓની અટકાયત કરવા અને હુમલા પાછળના મુખ્ય હેતુને સ્પષ્ટ કરવા માટે ચક્રો ગતિમાન કર્યા છે. પહેલા પણ પ્રેમ લગ્ન બાદ અલ્પેશ અને તેના સાસરી પક્ષના લોકોને સતત ધમકીઓ મળતી હોવાના ગંભીર આક્ષેપો પણ કાજલ દ્વારા કરવામાં આવ્યા હતા. જેથી આ હુમલા પાછળના કારણો અનેક ચર્ચાઓએ જોર પકડ્યું છે. હવે આ હુમલો કૌટુંબિક વિવાદના કારણે થયો હોવાની પણ આશંકા વ્યક્ત કરવામાં આવી રહી છે.
કાજલ મહેરિયાએ સોશિયલ મીડિયામાં વીડિયો પોસ્ટ કરી અલ્પેશ નામના યુવક સાથે પોતાની મરજી લગ્ન કર્યાનો ખુલાસો કર્યો હતો. છેલ્લા દોઢ વર્ષથી અલ્પેશ સાથે રિલેશનશીપમાં હોવાનું સ્વીકાર્યુ હતુ. કોઈપણ દબાણ વગર સ્વતંત્ર નાગરિક તરીકે લગ્ન કર્યાની જાહેરાત કરી છે. પોતે સનાતન ધર્મમાં જ માને છે અને ધર્મ પરિવર્તન ન કર્યાની સ્પષ્ટતા કરી છે. પરિવારની સંમતિ ન હોવાથી પોતાના ભવિષ્ય માટે જાતે નિર્ણય લીધો હતો.પરિવાર, સાસરી પક્ષ તરફથી મારી નાખવાની ધમકી મળ્યાનો પણ આક્ષેપ છે. જો કોઈ નુકસાન પહોંચાડશે કે ખોટી ટિપ્પણી કરશે તો કાર્યવાહીની પણ કડક ચિમકી આપી છે.
