Ahmedabad Municipal Corporation દ્વારા ઉનાળાની કાળઝાળ ગરમી વચ્ચે શહેરમાં કાર્યરત બરફની ફેક્ટરીઓમાં સરપ્રાઈઝ ચેકિંગ હાથ ધરવામાં આવ્યું છે. વધતી ગરમીમાં ઠંડા પીણાં અને બરફનો વપરાશ વધી જતા લોકોના આરોગ્યને ધ્યાનમાં રાખીને AMCએ આ ખાસ અભિયાન શરૂ કર્યું છે.
માહિતી અનુસાર, AMCની આરોગ્ય વિભાગની ટીમ દ્વારા બરફ બનાવવામાં વપરાતા પાણીની ગુણવત્તા, ક્લોરીન લેવલ અને ફેક્ટરીઓની સાફ સફાઈની વિગતવાર તપાસ કરવામાં આવી રહી છે. અધિકારીઓએ ખાસ કરીને તપાસ્યું કે ફેક્ટરીઓમાં દરરોજ ક્લોરીન ટેસ્ટ કરવામાં આવે છે કે નહીં અને પાણી શુદ્ધિકરણના નિયમોનું પાલન થાય છે કે નહીં.
AMCના જણાવ્યા અનુસાર, દર મહિને બે વખત પાણીના નમૂનાઓ લેવામાં આવે છે. જેમાં એક નમૂનો ખાનગી લેબોરેટરીમાં અને બીજો AMCની સેન્ટ્રલ લેબોરેટરીમાં તપાસ માટે મોકલવામાં આવે છે. આ પ્રક્રિયા દ્વારા બરફની ગુણવત્તા અને પાણીની શુદ્ધતા સુનિશ્ચિત કરવામાં આવે છે.
શહેરમાં કુલ 6 બરફની ફેક્ટરીઓ કાર્યરત છે, જેમાંથી પ્રથમ તબક્કામાં 4 ફેક્ટરીઓમાં ચેકિંગ કરવામાં આવી રહ્યું છે. જો તપાસ દરમિયાન કોઈ ગેરરીતિ સામે આવશે તો સંબંધિત ફેક્ટરી સામે કડક કાર્યવાહી કરવામાં આવશે.
AMCના આ પગલાથી ગરમી દરમિયાન નાગરિકોને શુદ્ધ અને સુરક્ષિત બરફ ઉપલબ્ધ કરાવવાનો પ્રયાસ કરવામાં આવી રહ્યો છે, જેથી પાણીજન્ય રોગો અને આરોગ્ય સંબંધિત જોખમો ટાળી શકાય.
Published On - 1:34 pm, Thu, 7 May 26
