ભાવનગરમાં વરસાદ ખેંચાતા જગતનો તાત ચિંતાતુર, સિંચાઈ માટે પાણી આપવા સરકાર તરફ દોડાવી નજર- Video

ભાવનગર જિલ્લામાં શરૂઆતમાં સારો વરસાદ વરસ્યો પરંતુ છેલ્લા દોઢ મહિનાથી મેઘરાજા જાણે હાથતાળી આપીને જતા રહ્યા છે. જેના કારણે ખેડૂતોને સિંચાઈની સમસ્યા ઉભી થઈ છે. ભાવનગરમાં વરસાદ ખેંચાતા ખેડૂતોના જુવાર, બાજરી, કપાસ, મગફળી સહિતના ચોમાસુ પાક સામે સંકટ તોળાઈ રહ્યુ છે. ખેડૂતોએ મોંઘા બિયારણો અને ખાતરો લાવીને વાવેતર કરી દીધુ છે પરંતુ વાવણી બાદ વરસાદ ખેંચાતા પિયતની સમસ્યા વધુ ઘેરી બની છે. ખેડૂતોનું કહેવુ છે કે પુરતુ પાણી ન મળવાને કારણે પાકની વૃદ્ધિ થઈ રહી નથી. દર વર્ષે જે કપાસ 5-5 ફૂટ સુધી લહેરાતો હોય છે તેની વૃદ્ધિ અડધા ફૂટે અટકી ગઈ છે, આમાં કંઈ વળે તેમ નથી..

ભાવનગરમાં 4 લાખ હેક્ટરમાં ચોમાસુ વાવેતર થાય છે. એક તરફ ખેડૂતો વરસાદ આધારિત ખેતી કરી રહ્યા છે અને દોઢ મહિનાથી વરસાદ ખેંચાયો છે જેને લઈને ખેડૂતોને આ વર્ષે મોટી નુકસાની ભોગવવી પડે તેવી સ્થિતિ સર્જાઈ છે.. જો આ વર્ષ નબળુ જશે તો આવતા વર્ષે પણ ખેડૂત આર્થિક રીતે બેઠો નહીં થઈ શકે. હાલ ઘાસચારો પણ ન ઉપજતા ખેડૂતો પાક બચાવવાની આશા છોડીને ઢોર ચરાવવા માટે ખેતર ખુલ્લુ મુકી દેવા મજબુર બન્યા છે.

હાલ આકાશ તરફ મીટ માંડીને બેસેલા ખેડૂતોની એક જ માગ છે કે સિંચાઈના પાણી માટે સરકાર ખેડૂતોની મદદ કરીને તેમનુ આર્થિક ભારણ થોડુ ઓછુ કરે.

અમદાવાદમાં ચંડોળા તળાવ મુદ્દે કોંગ્રેસનો આક્રમક વિરોધ, ગરીબોને આવાસ ફાળવવાની માગ સાથે સેંકડો લોકોના ટોળાએ કર્યા આક્રમક દેખાવો