શક્તિપીઠ અંબાજીમાં ભક્તિ, ફરજ અને સેવાનો અનુકરણીય સંગમ, પોલીસે પુરુ પાડ્યુ પ્રેરણાદાયી ઉદાહરણ
અંબાજી મેળામાં ફરજ પરના પોલીસકર્મીઓએ ડ્યુટી બાદ આરામ કરવાને બદલે મંદિર પરિસરમાં સ્વચ્છતા અભિયાન હાથ ધર્યું. ભાદરવી પૂનમના મેળા દરમિયાન ભક્તોની ભીડ વચ્ચે સુરક્ષાકર્મીઓએ "સ્વચ્છતા એ જ સેવા"ના સંદેશ સાથે ભક્તિ, ફરજ અને સેવાનો અનોખો સંગમ દર્શાવ્યો. ઉચ્ચ અધિકારીઓએ પણ આ ઉમદા કાર્યને બિરદાવ્યું.
મા અંબાના દરબારમાં આયોજિત ભાદરવી પૂનમના મહામેળા દરમિયાન અંબાજી મંદિરમાં ભક્તિ અને સેવાનો અદ્ભુત સંગમ જોવા મળ્યો છે. ભાદરવી પૂનમના મેળાના બીજા દિવસે જ્યારે અંબાજી મંદિર ભક્તોના જય અંબેના નાદથી ગુંજી ઉઠ્યું હતું, ત્યારે ફરજ પરના પોલીસકર્મીઓએ સુરક્ષાની સાથે સેવાનું પણ પ્રેરણાદાયી ઉદાહરણ પૂરું પાડ્યું.
બપોરે અંબાજી મંદિરના પટ બંધ થયા બાદ, સુરક્ષાની જવાબદારી સંભાળી રહેલા પોલીસ જવાનો અને મહિલા પોલીસકર્મીઓએ આરામ કરવાને બદલે એક અનોખો નિર્ણય લીધો. તેમણે ડ્યુટીના થાકને બાજુ પર મૂકીને મંદિરના સભામંડપમાં જાતે જ સફાઈ કામગીરી હાથ ધરી. હાથમાં સફાઈના સાધનો લઈને તેમણે મંદિર પરિસરને સ્વચ્છ રાખવામાં યોગદાન આપ્યું.
પોલીસકર્મીઓની આ કામગીરી “સ્વચ્છતા એ જ સેવા”ના અભિગમને સાકાર કરતી હતી. સુરક્ષાની સાથે સ્વચ્છતાની જવાબદારી નિભાવવાના આ ઉમદા કાર્યને ઉચ્ચ અધિકારીઓએ પણ બિરદાવ્યું છે. મા અંબાના દરબારમાં ફરજ, ભક્તિ અને સેવાનો આ સુંદર સમન્વય ખરેખર પ્રશંસનીય છે અને લોકોનું ધ્યાન ખેંચી રહ્યું છે.
