Breaking News : હાર્દિક પટેલને મોટી રાહત! સરકાર દ્વારા આ ફરિયાદ પરત ખેંચવાની પ્રક્રિયા શરૂ, જુઓ Video

પાટીદાર અનામત આંદોલનની ગુંજ ફરી એકવાર રાજકીય ગલિયારાઓમાં સંભળાઈ રહી છે. આંદોલનના અગ્રણીઓમાં ગણાતા અને હાલ ભાજપના ધારાસભ્ય તરીકે કાર્યરત હાર્દિક પટેલને રાજ્ય સરકાર તરફથી એક મોટી કાનૂની રાહત મળવાની દિશામાં પગલાં આગળ વધ્યા છે.

કેસ પરત ખેંચવા માટે જરૂરી તમામ કાનૂની કાર્યવાહી પૂર્ણ

વર્ષ 2018માં અમદાવાદના નિકોલ પોલીસ સ્ટેશનમાં નોંધાયેલી ફરિયાદ હવે સત્તાવાર રીતે પરત ખેંચવાની પ્રક્રિયા શરૂ થઈ ચૂકી છે. ગ્રામ્ય કોર્ટમાં સરકારી પક્ષે કેસ પરત ખેંચવા માટે જરૂરી તમામ કાનૂની કાર્યવાહી પૂર્ણ કરી છે. કલેક્ટર તેમજ સરકારી વકીલ દ્વારા જરૂરી અભિપ્રાયો કોર્ટમાં રજૂ કરવામાં આવ્યા છે, જેના આધારે હવે અંતિમ નિર્ણયની રાહ જોવાઈ રહી છે.

હાર્દિક પટેલ સામે શું છે આ કેસ?

આ કેસ પાટીદાર અનામત આંદોલન દરમિયાન નિકોલ વિસ્તારમાં યોજાયેલા પ્રતિક ઉપવાસ સાથે સંકળાયેલો હતો. હાર્દિક પટેલ, ગીતા પટેલ અને અન્ય આગેવાનો સામે પોલીસની પરવાનગી વિના ધરણા કરવા, લોકોને ઉશ્કેરવાના અને પોલીસ સાથે ઉગ્ર ભાષા વાપરવાના આરોપો નોંધાયા હતા. કેસની સુનાવણી દરમિયાન કોર્ટે હાર્દિક પટેલ વિરુદ્ધ વોરંટ પણ જાહેર કર્યો હતો, જેને કારણે મામલો વધુ ચર્ચાસ્પદ બન્યો હતો.

રાજકીય પરિસ્થિતિમાં બદલાવ આવ્યા પછી ખાસ કરીને હાર્દિક પટેલ ભાજપમાં જોડાયા અને ધારાસભ્ય બન્યા બાદ, તેમના સામેના અનેક કેસો પરત ખેંચવાની પ્રક્રિયા શરૂ થઈ હતી. સરકાર દ્વારા સમયાંતરે આવા કેસોમાં નમતું જોખીને કાનૂની રાહત આપવાના પગલાં લેવાયા છે. નિકોલ પોલીસ સ્ટેશનનો આ કેસ પણ એ જ શ્રેણીમાં આવતો એક મહત્વપૂર્ણ મુદ્દો બની રહ્યો છે.

હાલ તમામ કાનૂની અહેવાલો કોર્ટ સમક્ષ સુપરત થઈ ચૂક્યા છે અને આગામી સુનાવણી 25મી ફેબ્રુઆરીએ નિર્ધારિત છે. હવે નજર કોર્ટના અંતિમ નિર્ણય પર ટકેલી છે. જો કોર્ટ સરકારની અરજી સ્વીકારી લે તો હાર્દિક પટેલ માટે આ એક મોટી કાનૂની રાહત ગણાશે અને પાટીદાર આંદોલન સાથે જોડાયેલા જૂના પ્રકરણનો એક વધુ અધ્યાય પૂર્ણ થતો દેખાશે.

Input credit : Ronak Varma

આમ આદમી પાર્ટીને મોટો ફટકો! બોટાદ હિંસા બાદ રાજુ કરપડાનું રાજીનામું, સ્થાનિક ચૂંટણી પહેલા ખળભળાટ, આ સ્ટોરી વાંચવા અહીં ક્લિક કરો