ટ્રેનમાં દાળમાંથી નીકળ્યો લોખંડનો ટુકડો: અડધું જમ્યા પછી મુસાફરને થઈ જાણ, IRCTC એ કેટરરને ફટકાર્યો ભારે દંડ

ટ્રેનની મુસાફરી દરમિયાન જો સારું ભોજન મળી જાય તો સફરની મજા બમણી થઈ જાય છે, પરંતુ જો તમારી દાળમાં ખાવાની સાથે લોખંડનો ટુકડો પણ પીરસી દેવામાં આવે તો શું થાય? આવો જ એક ચોંકાવનારો કિસ્સો ગુવાહાટી જતી એક ટ્રેનમાં સામે આવ્યો છે. અહીં એક મુસાફરને પોતાના જમવામાં ધાતુનો ટુકડો મળ્યો હતો. નવાઈની વાત એ રહી કે તેને આ અંગે ત્યારે ખબર પડી, જ્યારે તે લગભગ અડધું ભોજન ખાઈ ચૂક્યો હતો.

આ ઘટનાનો વીડિયો મુસાફર અમિત અવસ્થીએ સોશિયલ મીડિયા પ્લેટફોર્મ X પર શેર કર્યો છે. વીડિયોમાં તેઓ પોતાની દાળમાંથી નીકળેલો ચાંદી જેવો ચમકતો ધાતુનો ટુકડો બતાવતા જોવા મળે છે. તેમણે જણાવ્યું કે જમતી વખતે તેમની નજર અચાનક આ વસ્તુ પર પડી હતી. ત્યાં સુધીમાં તેઓ અડધા કરતાં વધુ ભોજન ખાઈ ચૂક્યા હતા. આવા સંજોગોમાં તેમને ચિંતા થવા લાગી કે ભૂલથી આ ટુકડાનો કોઈ ભાગ તેમના પેટમાં તો નથી ચાલ્યો ગયો ને!

દાળમાં વઘાર ઓછો, લોખંડનો ટુકડો વધારે!

વીડિયોમાં અમિતને એમ કહેતા સાંભળી શકાય છે કે તેમણે અડધું ભોજન પહેલેથી જ ખાઈ લીધું હતું અને હવે તેમને ડર છે કે ક્યાંક તેઓ ધાતુનો ટુકડો ગળી તો નથી ગયા. તેમણે એ પણ જણાવ્યું કે ટ્રેનમાં હાજર સ્ટાફનું કહેવું હતું કે આ વાસણ સાફ કરવાના સ્ક્રબરનો ભાગ હોઈ શકે છે.

અમિતે આ ઘટના અંગે નારાજગી વ્યક્ત કરીને રેલવે અને IRCTC સમક્ષ સવાલ ઉઠાવ્યો કે મુસાફરોને આખરે કેવા પ્રકારનું ભોજન પીરસવામાં આવી રહ્યું છે. તેમનું કહેવું હતું કે ખાવામાં આવી વસ્તુ મળવી એ માત્ર બેદરકારી નથી, પરંતુ મુસાફરોના સ્વાસ્થ્ય અને સુરક્ષા સાથે ચેડાં સમાન છે.

આ જ ઘટના સાથે જોડાયેલા બીજા એક વીડિયોમાં કેટરિંગ સ્ટાફનો એક કર્મચારી મુસાફરને સ્પષ્ટતા આપતો જોવા મળ્યો હતો. કર્મચારીના જણાવ્યા મુજબ, દાળમાં મળેલો ધાતુનો ટુકડો વાસણ ધોવાના સ્ક્રબ પેડમાંથી તૂટીને ખાવામાં પડ્યો હોઈ શકે છે. તેણે મુસાફરની માફી પણ માંગી હતી અને બીજું ભોજન આપવાની સાથે પૈસા રિફંડ કરવાની ઓફર કરી હતી. જોકે, અમિતે બીજું ભોજન લેવામાં રસ દાખવ્યો નહોતો કે રિફંડ પણ સ્વીકાર્યું નહોતું. તેમનું કહેવું હતું કે તેઓ આ મામલો રેલવેના ઉચ્ચ અધિકારીઓ સુધી પહોંચાડવા માગે છે, જેથી આવી ગંભીર બેદરકારી સામે કડક પગલાં લેવાય.

સોશિયલ મીડિયા પર આ વીડિયો સામે આવ્યા પછી IRCTC એ પણ પ્રતિક્રિયા આપી હતી. પોતાના સત્તાવાર X એકાઉન્ટ પરથી જવાબ આપતાં રેલવેની કેટરિંગ સેવા સાથે જોડાયેલી આ ઘટનાને ગંભીર ગણાવી હતી. IRCTC એ માહિતી આપી કે સંબંધિત કેટરિંગ સર્વિસ પ્રોવાઇડર પર ભારે દંડ ફટકારવામાં આવ્યો છે. આ ઉપરાંત, આ ઘટનામાં સંડોવાયેલા કર્મચારીઓને તેમની ફરજ પરથી હટાવી દેવામાં આવ્યા છે. IRCTC એ એ પણ જણાવ્યું કે સર્વિસ પ્રોવાઇડરને કડક ચેતવણી આપવામાં આવી છે, જેથી ભવિષ્યમાં આવી ઘટનાનું પુનરાવર્તન ન થાય. જોકે, કંપનીએ કેટરર પર કેટલા રૂપિયાનો દંડ વસૂલવામાં આવ્યો છે તેની સ્પષ્ટતા કરી નથી.

15636 ट्रेन में पेंट्री स्टॉप द्वारा खाना 150 में बेचा जा रहा है। साथ में खाने स्टील भी खिला रहे है बात करने हॉस्पिटल में भी भेजेंगे ।irctc आपका यही स्वच्छ रेलवे है IRCTC please @IRCTCofficial @RailwaySeva @AshwiniVaishnaw https://t.co/U8bhucqCjf

— amit awasthi (@amitawasth30825) November 10, 2026

વંદે ભારત સ્લીપરમાં તત્કાલ, RAC કે વેઇટિંગ નહીં મળે: મુસાફરી અને ટિકિટ કેન્સલેશનના કડક નિયમો લાગુ