વોટ્સએપે ડેટા લીક મામલે કરી સ્પષ્ટતા, કંપનીએ ડેટા લીકના દાવાને નકાર્યા

થોડા દિવસ પહેલા સામે આવેલા એક અહેવાલમાં દાવો કરવામાં આવ્યો હતો કે વોટ્સએપના લગભગ 50 કરોડ યુઝર્સના ફોન નંબર ઓનલાઈન વેચાણ માટે મૂકવામાં આવ્યા છે. આ ઈતિહાસમાં સૌથી મોટા ડેટા ભંગમાંથી એક હોઈ શકે છે. જેમાં દાવો કરવામાં આવ્યો હતો કે લગભગ 50 કરોડ WhatsApp વપરાશકર્તાઓના મોબાઈલ નંબર વેચાણ માટે ઉપલબ્ધ છે. ડેટાબેઝમાં 84 જુદા જુદા દેશોના વોટ્સએપ યુઝર્સના મોબાઈલ નંબર છે. જેમાં અમેરિકા, બ્રિટન, ઈજિપ્ત, ઈટાલી, સાઉદી અરેબિયા અને ભારતનો સમાવેશ થાય છે.

કંપનીએ ડેટા લીકના દાવાને નકાર્યો

મેટા-માલિકીના મેસેજિંગ પ્લેટફોર્મ WhatsApp એ વોટ્સએપમાંથી લાખો લોકોનો ડેટા લીક થયો હોવાના દાવાને ફગાવી દીધા છે. વોટ્સએપના પ્રવક્તાએ કહ્યું કે ડેટા લીકના કોઈ પુરાવા નથી. વોટ્સએપના પ્રવક્તાએ એમ પણ કહ્યું કે, સાયબર ન્યૂઝ પર કરવામાં આવેલો દાવો પાયાવિહોણા સ્ક્રીનશોટ પર આધારિત છે. વોટ્સએપમાંથી ડેટા લીક થવાના કોઈ પુરાવા નથી.

રિપોર્ટમાં શું કહેવામાં આવ્યુ હતું

વાસ્તવમાં, રિપોર્ટમાં કહેવામાં આવ્યું હતું કે લગભગ 500 મિલિયન વોટ્સએપ યુઝર્સના ફોન નંબર લીક થઈ ગયા છે અને તેને ઓનલાઈન વેચવામાં આવી રહ્યા છે. રિપોર્ટમાં એવું પણ કહેવામાં આવ્યું હતું કે આ અત્યાર સુધીનો સૌથી મોટો ડેટા બ્રીચ છે.

ડેટા સેલરને ટાંકીને દાવો કરવામાં આવ્યો હતો

રિપોર્ટમાં જણાવવામાં આવ્યું હતું કે લોકપ્રિય હેકિંગ ફોરમ પર વેચાણ માટેના ડેટાબેઝમાં 84 દેશોના વોટ્સએપ યુઝર્સની અંગત માહિતી સામેલ છે. જેમાં એક ડેટા સેલરને ટાંકીને દાવો કરવામાં આવ્યો હતો કે સેટમાં માત્ર યુએસમાં જ 32 મિલિયન યુઝર્સનો રેકોર્ડ છે. આ સિવાય ઈજિપ્ત, ઈટાલી, ફ્રાન્સ, બ્રિટન, રશિયા અને ભારતના લાખો યુઝર્સનો ડેટા પણ લીક થયો છે, જેનું ઓનલાઈન વેચાણ થઈ રહ્યું છે.

આ પણ દાવો કરવામાં આવ્યો હતો

દાવો કરવામાં આવ્યો હતો કે ગુનેગારો અમેરિકન યુઝર્સના ડેટાને લગભગ 5,71,690 રૂપિયામાં વેચી રહ્યા છે. આ સિવાય યુકેનો ડેટાબેઝ લગભગ રૂ. 2,04,175માં અને જર્મનીનો ડેટાબેઝ રૂ. 1,63,340 કરોડમાં ઉપલબ્ધ છે. રિપોર્ટમાં વધુમાં જણાવવામાં આવ્યું હતુ કે ઘણી વખત ઓનલાઈન મુકવામાં આવેલો આટલો મોટો ડેટા  WhatsApp ની સેવાની શરતોનું ઉલ્લંઘન કરીને મેળવવામાં આવે છે. ત્યારે હાલ કંપનીએ આ બાબત પર સ્પષ્ટતા કરી છે.