ટ્વિટરે (Twitter) તેના ‘એડિટ ટ્વિટ’ ફીચરનું ટેસ્ટિંગ શરૂ કરી દીધું છે. આ ફીચર યુઝર્સને 30 મિનિટની અંદર તેમની ટ્વીટ એડિટ (Tweet Edit) કરવાની મંજૂરી આપશે. માઇક્રોબ્લોગિંગ સાઇટે શરૂઆતમાં ફક્ત ટ્વિટર બ્લુ સબ્સ્ક્રિપ્શન ધરાવતા ગ્રાહકો માટે જ આ સુવિધા શરૂ કરવાનો નિર્ણય લીધો છે. આ સુવિધા પસંદગીના વપરાશકર્તાઓ માટે લાઇવ થઈ ગઈ છે. ટ્વિટર કહે છે કે ટેસ્ટિંગથી તે કેવી રીતે કામ કરે છે તે જાણવામાં મદદ મળશે. આ વિકલ્પ વપરાશકર્તાઓને ટ્વિટ પબ્લિશ થયા પછી માત્ર 30 મિનિટ માટે જ દેખાશે. ઉપરાંત, યુઝર્સ 30 મિનિટની અંદર માત્ર પાંચ વખત ટ્વીટ એડિટ કરી શકે છે.
ટ્વિટરે કહ્યું છે કે મૂળ ટ્વીટનો રેકોર્ડ હજુ પણ ટ્વીટ એડિટ કરતા પહેલા સાર્વજનિક રીતે ઉપલબ્ધ રહેશે. આ રીતે લેબલમાં એડિટ ટ્વીટના અગાઉના વર્ઝનનો પણ સમાવેશ થશે. એડિટ ટ્વીટ આઇકન, ટાઇમસ્ટેમ્પ અને લેબલ સાથે દેખાશે. તેનાથી યુઝર્સને એ જાણવામાં મદદ મળશે કે મૂળ ટ્વીટમાં ફેરફાર કરવામાં આવ્યો છે.
ટ્વિટરે આ ફીચરને ન્યુઝીલેન્ડમાં રોલ આઉટ કરવાની પુષ્ટિ કરી છે. તે પછીથી ઓસ્ટ્રેલિયા, કેનેડા અને યુએસ સ્થિત ટ્વિટર બ્લુ વપરાશકર્તાઓ માટે રોલઆઉટ કરવામાં આવશે. જોકે, કંપનીને એડિટ ફીચરને લઈને લોકો તરફથી મિશ્ર પ્રતિસાદ મળ્યો છે. કેટલાકને ડર છે કે નવી સુવિધાનો ઉપયોગ રાજકીય માહિતી ફેલાવા માટે થઈ શકે છે અથવા તેનો ઉપયોગ ક્રિપ્ટો કૌભાંડો માટે થઈ શકે છે.
દરમિયાન, માઇક્રો-બ્લોગિંગ પ્લેટફોર્મ ટ્વિટરએ ગુરુવારે વપરાશકર્તાઓ માટે WhatsApp બટનની રજૂઆતની જાહેરાત કરી હતી. વોટ્સએપ બટનની મદદથી વોટ્સએપ પર ટ્વીટ શેર કરવાનું સરળ બનશે. આ સાથે, વપરાશકર્તાઓ ઇન્સ્ટન્ટ-મેસેજિંગ પ્લેટફોર્મ પર સરળતાથી ટ્વીટ શેર કરી શકશે. ટ્વિટરે કહ્યું કે તે ફીચરના ટેસ્ટિંગના પરિણામે એન્ડ્રોઇડ યુઝર્સ માટે શેર બટનને વોટ્સએપ શેર આઇકોન સાથે બદલી રહ્યું છે.