Serena Williams : ટેનિસ જગતની મશહુર ખેલાડી અમેરિકાની સેરેના વિલિયમ્સે મંગળવારના રોજ તેના ચાહકોને એક ઝટકો આપ્યો છે. સેરેનાએ એવી જાહેરાત કરી છે કે જેનાથી ટેનિસ (Tennis) ચાહકો નિરાશ થશે. સેરેનાએ એક ઈન્સ્ટ્રાગ્રામ પોસ્ટ શેર કરી કહ્યું કે, તેનું ટેનિસ કરિયર (Tennis career) હવે અંતિમ પડાવ પર છે. 23 વખતની ગ્રાન્ડ સ્લૈમ (Grand Slam)વિજેતાએ પોતાની પોસ્ટમાં લખ્યું કે, તેનું રિટાયરમેન્ટનું કાઉન્ટડાઉન શરુ થઈ ગયું છે.સેરેનાએ કહ્યું કે તે ટેનિસથી દૂર રહેવા માટે તૈયાર છે, જ્યાં તેનું ધ્યાન વ્યવસાયિક હિતોની સાથે તેના બીજા બાળકના જન્મ વિશે વિચારવા પર રહેશે.
સેરેનાએ વોગ મેગેઝીનમાં પોતાના આર્ટિકલમાં કહ્યું કે, હું આ મહિને 41 વર્ષની થઈશ અને મારે અન્ય બાબતોમાં સમય આપવો પડશે.
સેરેનાએ તેના લેખની કેટલીક લાઈન ઈન્સ્ટ્રાગ્રામ પર પોસ્ટ કરી છે.ટેનિસની સ્ટાર ખેલાડીમાં સામેલ સેરેનાએ કહ્યું કે, તે સંન્યાસ શબ્દને પસંદ કરતી નથી અને તેની જીંદગીના આ તબક્કે ટેનિસથી દુર પોતાના માટે સમય અને કામ પર ધ્યાન આપવાનું વિચારી રહી છે. આ કામ તેના માટે ખુબ મહત્વનું છે.યુએસ ઓપનની તૈયારીના ભાગરૂપે સેરેના ટોરોન્ટોમાં નેશનલ બેંક ઓપન ટેનિસ ટુર્નામેન્ટમાં રમી રહી છે. કદાચ તે આ ગ્રાન્ડ સ્લેમ બાદ નિવૃત્તિની જાહેરાત કરશે.
જ્યાં સુધી સેરેનાની કારકિર્દીની વાત છે તો તે સાત વખત ઓસ્ટ્રેલિયન ઓપન ટાઈટલ જીતી ચૂકી છે. ત્રણ વખત ફ્રેન્ચ ઓપન ટ્રોફી તેના હિસ્સામાં આવી છે. તે માત્ર સાત વખત વિમ્બલ્ડન જીતવામાં સફળ રહી છે. છ વખત યુએસ ઓપન ટ્રોફી તેના હિસ્સામાં આવી છે. આ સિવાય તે લંડન ઓલિમ્પિક-2012માં પણ વિજેતા રહી હતી. તેણે આ તમામ સિંગલ કેટેગરીમાં જીત મેળવી હતી. આ સાથે જ તેનું નામ ડબલ્સ કેટેગરીમાં પણ ગ્રાન્ડ સ્લેમ છે. તેણે ડબલ્સ કેટેગરીમાં ચાર વખત ઓસ્ટ્રેલિયન ઓપન, બે વખત ફ્રેન્ચ ઓપન, છ વખત વિમ્બલ્ડન, બે વખત યુએસ ઓપન જીતી છે.