ભારતીય હોકી ટીમે (Indian Men’s Hockey Team) ગુરુવારે એશિયા કપ-2022 ની મેચમાં ઈન્ડોનેશિયાને 16-0થી હરાવ્યું હતું. આ મેચમાં ભારતને ચોક્કસપણે જીતવાની જરૂર હતી, તે પણ મોટા માર્જિનથી. ભારતે આ મેચ 15 ગોલના માર્જીનથી જીતવી હતી, તો જ તે આગળના રાઉન્ડમાં શકે એમ હતુ. આ ખૂબ જ મુશ્કેલ કાર્ય હતું પરંતુ યુવા ખેલાડીઓથી સજેલી ભારતની ટીમે આ અસંભવ જણાતા કાર્યને આસાનીથી પૂર્ણ કરીને ગોલનો વરસાદ કરીને ઈન્ડોનેશિયા સામે એકતરફી જીત મેળવી હતી. ભારતની પાકિસ્તાન સામેની મેચ 1-1 થી ડ્રો રહી હતી. આ પછી જાપાને તેને 5-2થી હરાવ્યુ હતુ.
ભારતે આ મેચમાં પહેલા ક્વાર્ટરથી જ ઈન્ડોનેશિયા પર દબાણ બનાવી રાખ્યું હતું. ભારતીય ફોરવર્ડ લાઇન તેના વર્તુળમાં સતત હુમલાઓ શરૂ કર્યા હતા. ટીમ ઈન્ડિયા આ મામલે સફળ પણ રહી હતી અને પહેલા ક્વાર્ટરમાં જ ત્રણ ગોલ કર્યા હતા. જેમાંથી પવન રાજભરે બે ગોલ કર્યા હતા. પવને મેચની 10મી મિનિટે પહેલો ગોલ કર્યો હતો. મિડલાઇનથી થોડે આગળ, ભારતીય ખેલાડી બોલને સીધો વર્તુળમાં લાવ્યો અને પવને તેને ગોલની સામેથી ફ્લિક કરીને નેટની અંદર નાખ્યો. બે મિનિટ બાદ ભારતને પેનલ્ટી કોર્નર મળ્યો. આ શોટને રશેરે રોક્યો હતો પરંતુ પવને રિબાઉન્ડ પર બોલને ગોલપોસ્ટમાં નાખ્યો અને સ્કોર 2-0 કર્યો. 14મી મિનિટે ઉત્તમ સિંહે ભારતને 3-0ની સરસાઈ અપાવી હતી. આ વખતે પણ જો કે પેનલ્ટી કોર્નર પર ગોલકીપરે સ્ટ્રોક રોક્યો હતો, પરંતુ ઉત્તમે રિબાઉન્ડ પર ગોલ કરીને ઇન્ડોનેશિયા પર દબાણ બનાવ્યું હતું. આ ક્વાર્ટરમાં ભારત એક પેનલ્ટી કોર્નર પણ ચૂકી ગયું હતું.
ટીમ પાસે યુવાનોના જોશ સાથે અનુભવ પણ છે જે બીજા ક્વાર્ટરમાં દેખાઈ રહ્યો હતો. એસવી સુનિલે 19મી મિનિટે ભારત માટે ચોથો ગોલ કર્યો હતો. ભારતને અહીં પેનલ્ટી કોર્નર મળ્યો પરંતુ ટીમે ગડબડ કરી અને બોલને યોગ્ય રીતે કલેક્ટ કરી શકી નહીં. આવી સ્થિતિમાં, બોલ ઇન્જેક્ટર સુનીલ પાસે પાછો આવ્યો અને તેણે તેને નેટમાં નાખ્યો. એક મિનિટ બાદ નીલમ સંજીપે પેનલ્ટી કોર્નરથી ગોલ કરીને ભારતને 5-0 થી આગળ કર્યું હતું. ત્રણ મિનિટ બાદ ભારતીય ટીમે ડાબી બાજુથી તક બનાવી અને બોલ સુનીલ પાસે આવ્યો. સુનીલે આ વખતે પણ ગોલ કરવામાં કોઈ ભૂલ કરી ન હતી.
ભારતને 38મી મિનિટે પેનલ્ટી કોર્નર મળ્યો હતો પરંતુ આ વખતે ફરીથી ઈન્ડોનેશિયાના ગોલકીપરે બોલ રોક્યો હતો. ભારતે રિબાઉન્ડ પર ગોલ કરવાનો પ્રયાસ કર્યો જે નિષ્ફળ ગયો. જોકે આ ક્વાર્ટરમાં ભારતને સાતમો ગોલ મળ્યો હતો. પવન રાજભરે ડાબી બાજુથી બોલને ગોલપોસ્ટની સામે મોકલ્યો અને ત્યાં ઊભેલા કાર્તિ સેલ્વમે તેની હોકીના હળવા ઈશારાથી બોલને ગોલ પોસ્ટમાં નાખ્યો. સેલ્વમનો આ પહેલો અને ભારતનો સાતમો ગોલ હતો. આ પછી ભારતને કેટલાક વધુ પેનલ્ટી કોર્નર મળ્યા જેના પર તે ચૂકી ગયો પરંતુ 41મી મિનિટમાં દિપ્સન તુર્કીએ ગોલ કર્યો. ભારતીય ટીમ અહીં જ અટકી નથી. ભારતને 42મી મિનિટે પેનલ્ટી સ્ટ્રોક મળ્યો અને ત્યારબાદ ભારતે ગોલ કર્યો. આ વખતે પણ દિપ્સને ગોલ કર્યો હતો. આ ક્વાર્ટરની છેલ્લી મિનિટોમાં ભારતે વધુ એક ગોલ કર્યો હતો. અભરન સુદેવે આ ગોલ કર્યો હતો.
ભારતે ચોથા ક્વાર્ટરની સારી શરૂઆત કરી અને શરૂઆતની મિનિટોમાં જ બે ગોલ કર્યા. સુદેવે પહેલો ગોલ કર્યો અને પછી દીપસને આગળનો ગોલ કર્યો. પેનલ્ટી કોર્નર પર ગોલ થયો હતો. આ પછી સુદેવે 55મી મિનિટે ગોલ કરીને પોતાની હેટ્રિક પૂરી કરી. બીજી મિનિટમાં સેલ્વમને બીજો ગોલ કરીને ભારતને 14-0થી આગળ કરી દીધું હતું. અહીંથી, ભારતને આગલા રાઉન્ડમાં જવા માટે વધુ એક ગોલની જરૂર હતી, જે તેણે 58મી મિનિટે કર્યો હતો. ભારત માટે 16મો ગોલ દીપસને 59મી મિનિટે કર્યો હતો. આ ટૂર્નામેન્ટની વર્તમાન આવૃત્તિમાં ટીમ દ્વારા કરાયેલા આ સૌથી વધુ ગોલ છે.
Published On - 8:51 pm, Thu, 26 May 22