યશસ્વી જયસ્વાલે ટેસ્ટ ક્રિકેટમાં રચ્યો ઇતિહાસ, સચિન અને વિરાટને પાછળ છોડી દીધા

ભારતીય ટીમના ઓપનિંગ બેટ્સમેન યશસ્વી જયસ્વાલે એજબેસ્ટન ટેસ્ટ દરમિયાન પોતાના નામે વધુ એક રેકોર્ડ બનાવ્યો છે. આ દરમિયાન, તેણે ભૂતપૂર્વ ભારતીય કેપ્ટન રાહુલ દ્રવિડ અને ભૂતપૂર્વ ઓપનર વિરેન્દ્ર સેહવાગની બરાબરી કરી છે, જ્યારે માસ્ટર-બ્લાસ્ટર સચિન તેંડુલકર અને સ્ટાર બેટ્સમેન વિરાટ કોહલીને પાછળ છોડી દીધા છે. યશસ્વી જયસ્વાલે એજબેસ્ટન ટેસ્ટની બીજી ઇનિંગ દરમિયાન આ સિદ્ધિ હાંસલ કરી હતી. જયસ્વાલ ટેસ્ટ ક્રિકેટમાં આ સિદ્ધિ હાંસલ કરનાર બીજા સૌથી યુવા ભારતીય બેટ્સમેન છે. લીડ્સ ટેસ્ટ મેચમાં શાનદાર સદી ફટકારનાર યશસ્વી બીજી ટેસ્ટ મેચની બીજી ઇનિંગમાં કંઈ ખાસ કરી શક્યો નહીં, પરંતુ તેના નામે એક રેકોર્ડ જરૂર બન્યો છે.

યશસ્વીએ કયો રેકોર્ડ બનાવ્યો ?

ટીમ ઈન્ડિયાના ઓપનર યશસ્વી જયસ્વાલ ટેસ્ટ ક્રિકેટમાં સૌથી ઓછી ઇનિંગ્સમાં 2000 રન બનાવનાર સંયુક્ત રીતે સૌથી ઝડપી ભારતીય બેટ્સમેન બની ગયા છે. આ દરમિયાન તેમણે ભારતીય ટીમના ભૂતપૂર્વ અનુભવી બેટ્સમેન રાહુલ દ્રવિડ અને વીરેન્દ્ર સેહવાગની બરાબરી કરી લીધી છે. જયસ્વાલે એજબેસ્ટન ટેસ્ટ મેચની બીજી ઇનિંગ્સમાં 10મો રન બનાવતા આ સિદ્ધિ મેળવી હતી. જોકે, તે પોતાની ઇનિંગ્સ લંબાવી શક્યો નહીં અને 22 બોલમાં 28 રન બનાવીને આઉટ થયો હતો. યશસ્વીએ પહેલી ઇનિંગ્સમાં 87 રનની શાનદાર ઇનિંગ્સ રમી હતી.

જયસ્વાલે ટેસ્ટ ક્રિકેટની 40મી ઇનિંગ્સમાં 2000 રન પૂરા કર્યા. આ પહેલા રાહુલ દ્રવિડ અને વીરેન્દ્ર સેહવાગે પણ એટલી જ ઇનિંગ્સમાં 2000 રન પૂરા કર્યા હતા. દ્રવિડે 1999માં હેમિલ્ટનમાં ન્યુઝીલેન્ડ સામે અને 2004માં ચેન્નાઈમાં ઓસ્ટ્રેલિયા સામે વીરેન્દ્ર સેહવાગે આ સિદ્ધિ મેળવી હતી.

21મી ટેસ્ટ મેચમાં સિદ્ધિ મેળવી હતી

જયસ્વાલે 21 ટેસ્ટ મેચની 40 ઇનિંગ્સમાં 53.10 ની સરેરાશથી 2018 રન બનાવ્યા છે. જેમાં 5 સદી અને 11 અડધી સદીનો સમાવેશ થાય છે. આ કિસ્સામાં, તેણે ભૂતપૂર્વ ભારતીય બેટ્સમેન વિજય હજારે અને ટીમ ઇન્ડિયાના મુખ્ય કોચ ગૌતમ ગંભીરને પાછળ છોડી દીધા. વિજય હજારે અને ગૌતમ ગંભીરે 43 ઇનિંગ્સમાં 2000 રન પૂરા કર્યા હતા. અનુભવી બેટ્સમેન વિરાટ કોહલી આ યાદીમાં કોઈની નજીક નથી. તેણે 53 ઇનિંગ્સમાં બે હજાર રન પૂરા કર્યા હતા.

આ ઉપરાંત, યશસ્વી જયસ્વાલ સૌથી નાની ઉંમરે બે હજાર રન પૂરા કરનાર બીજા ભારતીય બેટ્સમેન બન્યા છે. તેણે 23 વર્ષ 188 દિવસની ઉંમરે આ સિદ્ધિ મેળવી હતી. આ બાબતમાં સચિન તેંડુલકર તેમનાથી આગળ છે. સચિને 20 વર્ષ 330 દિવસની ઉંમરે ટેસ્ટ ક્રિકેટમાં બે હજાર રન પૂરા કર્યા હતા.

ટીમ ઈન્ડિયા અને મેન ઇન બ્લુ જેવા નામોથી જાણીતી ભારતીય ટીમ હાલમાં વિશ્વ ક્રિકેટ પર પ્રભુત્વ ધરાવે છે. ટીમ ઈન્ડિયાના વધુ સમાચાર જોવા માટે અહી ક્લિક કરો