વૈભવ સૂર્યવંશી U-19 ટીમમાંથી કેમ ગાયબ ? BCCI નો એક એવો નિયમ, જેણે 15 વર્ષના યુવાનું પત્તું કાપ્યું
ઓસ્ટ્રેલિયા સામેની આગામી અંડર-19 સિરીઝ માટે ભારતીય ટીમની જાહેરાત થઈ ચૂકી છે. એવામાં ફેન્સના મનમાં સૌથી મોટો સવાલ એ છે કે, અદ્ભુત ફોર્મમાં હોવા છતાં 15 વર્ષના વૈભવ સૂર્યવંશીને ટીમમાંથી કેમ બાકાત રાખવામાં આવ્યો? આ નિર્ણય પાછળ BCCI નો એક એવો કડક નિયમ છે કે, જેના કારણે વોશિંગ્ટન સુંદર જેવા ખેલાડીઓ પણ અગાઉ રમી શક્યા ન હતા.
15 વર્ષનો વૈભવ સૂર્યવંશી ભારતનો ઉભરતો ક્રિકેટર છે. તેને હાલમાં જ ઇંગ્લેન્ડમાં પોતાનું ઇન્ટરનેશનલ ડેબ્યૂ કરવાની તક મળી. તે ભારત માટે અત્યાર સુધી કુલ 6 T20I મેચ રમી ચૂક્યો છે. તેમ છતાંય ઓસ્ટ્રેલિયા સામે થનારી આગામી અંડર-19 સિરીઝમાં તેની પસંદગી કરવામાં આવી નથી.
ખાસ વાત એ છે કે, વિરેન્દ્ર સેહવાગના પુત્ર આર્યવીર અને રાહુલ દ્રવિડના પુત્ર અન્વયને ટીમમાં જોડવામાં આવ્યા છે. હવે દરેકના મનમાં એક સવાલ એ છે કે, વૈભવ હજુ માત્ર 15 વર્ષનો છે, તેમ છતાં તેને અંડર-19 ટીમમાં સ્થાન કેમ નથી મળ્યું? જો કે, વૈભવની પસંદગી ન થવા પાછળ BCCI નો એક કડક નિયમ છે.
શું કહે છે BCCI ના નિયમો?
BCCI એ વર્ષ 2016 માં એક નિયમ બનાવ્યો હતો. નિયમ અનુસાર, એક ખેલાડી પોતાના જીવનમાં માત્ર એક જ વાર અંડર-19 વર્લ્ડ કપ રમી શકે છે. આનો અર્થ એ છે કે, જો કોઈ ખેલાડી 15 કે 17 વર્ષની નાની ઉંમરે જ એક વાર અંડર-19 વર્લ્ડ કપ રમી ચૂક્યો છે, તો 19 વર્ષનો થાય તે પહેલાં ફરીથી વર્લ્ડ કપ આવવા છતાં પણ તેની ટીમમાં પસંદગી કરવામાં આવશે નહીં, ભલે ઉંમરના હિસાબે તે રમવા માટે યોગ્ય જ કેમ ન હોય. આ નિયમના કારણે વોશિંગ્ટન સુંદર વર્ષ 2018 માં U-19 વર્લ્ડ કપ રમી શક્યો ન હતો.
વર્ષ 2026 માં અંડર-19 વર્લ્ડ કપ રમી ચૂક્યો છે ‘Vaibhav Sooryavanshi’
વૈભવ સૂર્યવંશી પહેલાથી જ વર્ષ 2026 માં અંડર-19 વર્લ્ડ કપ રમી ચૂક્યો છે અને BCCI ના નિયમોના કારણે તે ફરીથી આ રમી શકે નહીં. આ જ કારણ છે કે, સિલેક્ટર્સે તેને આ વખતે અંડર-19 ટીમમાં જોડ્યો નથી. ઓસ્ટ્રેલિયાની અંડર-19 ટીમ 18 સપ્ટેમ્બરથી ભારતનો પ્રવાસ કરશે.
આ પ્રવાસ પર બંને ટીમો વચ્ચે રાજકોટમાં 18, 21 અને 23 સપ્ટેમ્બરના રોજ ત્રણ વન-ડે મેચ રમાશે. આ પછી બે લાંબી (મલ્ટી-ડે) મેચ રમાશે, જેમાં પહેલી મેચ 27 થી 30 સપ્ટેમ્બર સુધી રાજકોટમાં અને બીજી મેચ 5 થી 8 ઓક્ટોબર સુધી અમદાવાદના નરેન્દ્ર મોદી સ્ટેડિયમના ‘B’ ગ્રાઉન્ડમાં થશે.
