T20 વર્લ્ડ કપ 2024માં સુપર-8 રાઉન્ડની બીજી મેચ ઈંગ્લેન્ડ અને વેસ્ટ ઈન્ડિઝ વચ્ચે ગુરુવાર, 20 જૂનના રોજ સેન્ટ લુસિયામાં રમાઈ હતી. આ મેચમાં ઈંગ્લેન્ડે વેસ્ટ ઈન્ડિઝને 8 વિકેટે હરાવ્યું હતું. પ્રથમ બેટિંગ કરતા વેસ્ટ ઈન્ડિઝે 181 રનનો ટાર્ગેટ આપ્યો હતો, જેનો પીછો ઈંગ્લેન્ડે 15 બોલ બાકી રહેતા કરી લીધો હતો.
ફિલ સોલ્ટ આ જીતનો હીરો હતો, જેણે 185ના સ્ટ્રાઈક રેટથી 47 બોલમાં 87 રનની તોફાની ઈનિંગ રમીને મેચને એકતરફી બનાવી દીધી હતી. આ માટે તેને પ્લેયર ઓફ ધ મેચ પણ પસંદ કરવામાં આવ્યો હતો. ઈંગ્લેન્ડની આ જીતમાં જોની બેયરસ્ટોએ પણ મહત્વની ભૂમિકા ભજવી હતી. તેણે 184ના સ્ટ્રાઈક રેટથી 26 બોલમાં 48 રન બનાવ્યા અને સોલ્ટે તેને સારો સાથ આપ્યો.
181 રનના લક્ષ્યનો પીછો કરવા ઉતરેલા ઈંગ્લેન્ડના ઓપનરોએ શરૂઆતથી જ હુમલો કરવાનો પ્રયાસ કર્યો હતો. જોકે, સ્પિનર અકીલ હુસૈને તેમને પાવરપ્લેમાં બાંધી રાખ્યા હતા. જોસ બટલર 22 બોલમાં 25 રન બનાવ્યા બાદ સંઘર્ષ કરતો જોવા મળ્યો હતો, જ્યારે તે રોસ્ટન ચેઝના બોલ પર આઉટ થયો હતો. આ પછી આવેલો મોઈન અલી વધુ કંઈ કરી શક્યો ન હતો અને 10 બોલમાં 13 રન બનાવીને પેવેલિયન પરત ફર્યો હતો. ત્યારપછી જોની બેયરસ્ટો ક્રિઝ પર ઉતર્યો અને ઈનિંગ્સને ઝડપથી આગળ વધારવાની શરૂઆત કરી. તેના આવતાની સાથે જ ઈંગ્લેન્ડને ગતિ મળી અને સોલ્ટે પણ ફટકાબાજી શરૂ કરી. આ પછી બંનેએ સાથે મળીને મેચને એકતરફી બનાવી દીધી હતી.
A dominant win by England in St Lucia #T20WorldCup | #ENGvWI | https://t.co/yoAQ3gQdlb pic.twitter.com/0YTli2xiKQ
— ICC (@ICC) June 20, 2024
વેસ્ટ ઈન્ડિઝને ટૂર્નામેન્ટમાં પ્રથમ વખત હારનો સામનો કરવો પડ્યો છે. આ હાર માટે ડોટ બોલ મુખ્ય કારણ હતું. ઈંગ્લેન્ડના કેપ્ટન જોસ બટલરે ટોસ જીતીને વેસ્ટ ઈન્ડિઝને પ્રથમ બેટિંગ કરવાનું કહ્યું હતું. વેસ્ટ ઈન્ડિઝના ઓપનરોએ દાવની શરૂઆત સાવધાનીપૂર્વક કરી હતી. નિકોલસ પૂરન અને જ્હોન્સન ચાર્લ્સ સંઘર્ષ કરતા જોવા મળ્યા. આ દરમિયાન બંનેએ ઘણા ડોટ બોલ રમ્યા. આ ઈનિંગમાં 51 બોલ એટલે કે લગભગ 9 ઓવર ડોટ હતી, જે આખરે તેમની હારનું મુખ્ય કારણ બની હતી. પુરને 32 બોલમાં 36 રન બનાવ્યા હતા જ્યારે જોન્સન ચાર્લ્સે 34 બોલમાં 38 રન બનાવ્યા હતા.
આ પણ વાંચો: USA vs SA : સાઉથ આફ્રિકાએ મેચ જીતી, અમેરિકાએ જીત્યું દિલ, ડી કોક બન્યો મેચનો હીરો