T20 World Cup: 34 વર્ષ પહેલા પિતાએ પહેલીવાર વર્લ્ડ ચેમ્પિયન બનાવ્યા, હવે પુત્રે ઓસ્ટ્રેલિયા માટે આ જ કામ પાર પાડ્યુ
ઓસ્ટ્રેલિયા (Australia) એ પ્રથમ વખત T20 વર્લ્ડ કપ (T20 World Cup) નો ખિતાબ જીત્યો છે અને આ જીતમાં ઓસ્ટ્રેલિયાના દિગ્ગજ ખેલાડીએ પોતાના બેટથી ખૂબ જ ધૂમ મચાવી હતી અને ટીમને ટ્રોફી સુધી પહોંચાડી હતી.
14 વર્ષથી ચાલી રહેલી રાહ આખરે 14મીએ પૂરી થઈ. પાંચ વખત વર્લ્ડ ચેમ્પિયન બનેલી ટીમ ફરી એકવાર વર્લ્ડ ચેમ્પિયન બની, પરંતુ તે છેલ્લા કેટલાક ટાઈટલ કરતાં વધુ ખાસ છે કારણ કે તે પ્રથમ વખત છે. 1987માં પ્રથમ વખત ODI વર્લ્ડ કપ જીતનાર ઓસ્ટ્રેલિયન ટીમે 2021માં પ્રથમ વખત T20 વર્લ્ડ કપ (T20 World Cup) નો ખિતાબ જીત્યો હતો. 2007 માં શરૂ થયેલા T20 વર્લ્ડ કપના 14 વર્ષ પછી, ઓસ્ટ્રેલિયા (Australia) એ આખરે 14 નવેમ્બરે ફાઇનલમાં તેમના પાડોશી ન્યુઝીલેન્ડ (New Zealand) ને હરાવીને પ્રથમ વખત આ વર્લ્ડ કપ પર કબજો કર્યો. આ ખેલાડી, જેના પિતાએ 1987માં ઓસ્ટ્રેલિયાને પ્રથમ વર્લ્ડ કપ જીતાડ્યો હતો, તેણે ઓસ્ટ્રેલિયાને આ ઐતિહાસિક વર્લ્ડ કપ જીતાડવામાં મહત્વની ભૂમિકા ભજવી હતી.
બીજી વખત ટી-20 વર્લ્ડ કપની ફાઈનલ રમી રહેલી ઓસ્ટ્રેલિયન ટીમને માત્ર ઓસ્ટ્રેલિયાના સિવાય ભાગ્યે જ કોઈને અહીં પહોંચવાની આશા હતી. ખિતાબ તો દૂરની વાત છે, પરંતુ આરોન ફિન્ચની ટીમે બધાને ખોટા સાબિત કરીને પોતાનું પહેલું ટાઈટલ જીત્યું. દુબઈમાં રમાયેલા T20 વર્લ્ડ કપ 2021ની ફાઇનલમાં ઓસ્ટ્રેલિયાએ ફરી એકવાર ન્યૂઝીલેન્ડને પોતાનો શિકાર બનાવ્યો અને 8 વિકેટથી ચમચમાતી વર્લ્ડ કપ ટ્રોફી જીતી લીધી. આ ફાઇનલમાં ઓસ્ટ્રેલિયાની જીતનો સિતારો બનેલા મિશેલ માર્શે (Mitchell Marsh) 77 રનની અણનમ ઇનિંગ રમીને ટીમને ટાઇટલ સુધી પહોંચાડી હતી.
34 વર્ષ પહેલા પિતાએ કમાલ કર્યો હતો
આ પ્રદર્શન સાથે મિશેલ માર્શે પોતાના પરિવારને વધુ એક વર્લ્ડ કપ અપાવ્યો છે. મિશેલે તે જ કર્યું જે તેના પિતા જૈફ માર્શે (Geoff Marsh) 34 વર્ષ પહેલા કર્યું હતું. ઓસ્ટ્રેલિયાના દિગ્ગજ બેટ્સમેનોમાંના એક, જૈફ માર્શ 1987માં ODI વર્લ્ડ કપ જીતનાર ઓસ્ટ્રેલિયન ટીમના મહત્વના સભ્ય હતા. જૈફ માર્શે તે વર્લ્ડ કપમાં ઓસ્ટ્રેલિયા માટે 2 સદીની મદદથી 428 રન બનાવ્યા હતા અને તે ડેવિડ બૂન પછી સૌથી વધુ રન બનાવનાર બેટ્સમેન હતા. જૈફ માર્શે ત્યારબાદ 1999માં મુખ્ય કોચ તરીકે ઓસ્ટ્રેલિયાને તેમનો બીજો વર્લ્ડ કપ ખિતાબ અપાવ્યો.
પિતાની જેમ ખૂબ રન બનાવ્યા
હવે તેના પિતાના પગલે ચાલીને, મિશેલ માર્શે પણ તેના પરિવારના પ્રખ્યાત રેકોર્ડમાં લખાયેલ વધુ એક વર્લ્ડ કપ ટાઇટલ મેળવ્યું છે. પિતાની જેમ મિશેલ માર્શે પણ આ ફોર્મેટમાં ટીમને પ્રથમ વર્લ્ડ કપ જીતાડ્યો હતો. આટલું જ નહીં, તેના પિતાની જેમ મિશેલ પણ તેની ટીમ માટે બીજા નંબરનો સૌથી વધુ રન બનાવનાર ખેલાડી હતો. મિશેલે માત્ર 5 ઇનિંગ્સમાં 61.66ની એવરેજ અને 146.82ના શાનદાર સ્ટ્રાઇક રેટથી 185 રન બનાવ્યા, જેમાં બે અડધી સદીનો સમાવેશ થાય છે.
આ પણ વાંચોઃ T20 World Cup 2021: ઓસ્ટ્રેલિયા સામે કઇ ચૂક રહી ગઇ કે ન્યુઝીલેન્ડના હાથમાંથી સરકી ગઇ ટ્રોફી, જાણો અહીં
આ પણ વાંચોઃ T20 World Cup: જેને લઇને ઓસ્ટ્રેલિયન ક્રિકેટ માં જેને લઇને સતત મચી રહી હતી બબાલ, હટાવવાની હતી માંગ તેણે જ બનાવ્યા T20 ચેમ્પિયન
