IPL 2026 માં 15 વર્ષના Vaibhav Sooryavanshi એ પહેલા જ બોલે Mitchell Starc ને પણ તારા બતાવ્યા, જુઓ Video

IPL 2026માં રાજસ્થાન રોયલ્સનો 15 વર્ષીય યુવા બેટ્સમેન વૈભવ સૂર્યવંશી સતત પોતાની ધમાકેદાર બેટિંગથી ચર્ચામાં છે. ટૂર્નામેન્ટની 62મી મેચ દરમિયાન તેણે ઓસ્ટ્રેલિયાના દિગ્ગજ ફાસ્ટ બોલર મિશેલ સ્ટાર્ક સામે પણ નિડર અંદાજમાં બેટિંગ કરી અને સૌને ચોંકાવી દીધા.

આ મેચ વૈભવ સૂર્યવંશી માટે ખાસ હતી, કારણ કે IPL કારકિર્દીમાં પહેલીવાર તેનો સામનો મિશેલ સ્ટાર્ક જેવા અનુભવી બોલર સાથે થયો હતો. પરંતુ યુવા બેટ્સમેન પર કોઈ દબાણ જોવા મળ્યું નહીં. તેણે સ્ટાર્કના પહેલા જ બોલ પર જોરદાર ચોગ્ગો ફટકારી પોતાની મનોદશા સ્પષ્ટ કરી દીધી હતી. ત્યારબાદ ત્રીજા બોલ પર તેણે શાનદાર છગ્ગો ફટકારીને સ્ટેડિયમમાં બેઠેલા દર્શકોને ઉત્સાહિત કરી દીધા.

વૈભવનો આક્રમક અંદાજ હવે IPLમાં દરેક ટીમ માટે ચિંતાનો વિષય બની ગયો છે. તે અત્યાર સુધી અનેક મોટા બોલરો સામે પહેલી જ બોલથી હુમલો કરતો આવ્યો છે. જસપ્રીત બુમરાહ, ભુવનેશ્વર કુમાર, અર્શદીપ સિંહ, જોશ હેઝલવુડ, પેટ કમિન્સ અને હવે મિશેલ સ્ટાર્ક પણ તેની આક્રમક બેટિંગનો સામનો કરી ચૂક્યા છે.

ટોચના બોલરો સામે વૈભવ સૂર્યવંશીનું પ્રદર્શન પણ ખૂબ જ પ્રભાવશાળી રહ્યું છે. તેણે જસપ્રીત બુમરાહ અને પેટ કમિન્સના પહેલા બોલ પર છગ્ગા ફટકાર્યા હતા, જ્યારે ભુવનેશ્વર કુમાર, અર્શદીપ સિંહ, જોશ હેઝલવુડ અને મિશેલ સ્ટાર્કના પહેલા બોલ પર ચોગ્ગા ફટકાર્યા હતા.

આ મેચમાં વૈભવે માત્ર 21 બોલમાં 46 રનની વિસ્ફોટક ઇનિંગ્સ રમી હતી. તેણે 219.04ના સ્ટ્રાઇક રેટથી બેટિંગ કરતાં 5 ચોગ્ગા અને 3 છગ્ગા ફટકાર્યા. જોકે, મોટી શોટ રમવાના પ્રયાસમાં તે માધવ તિવારીના બોલ પર કેચ આઉટ થયો હતો.

આ ઇનિંગ્સ બાદ વૈભવ સૂર્યવંશીના IPL 2026માં કુલ 481 રન થઈ ગયા છે. હાલમાં તે રાજસ્થાન રોયલ્સ માટે સૌથી વધુ રન બનાવનાર ખેલાડી છે અને ઓરેન્જ કેપની રેસમાં પણ મજબૂત દાવેદાર માનવામાં આવી રહ્યો છે.

IPL 2026 માં RCB ને મળી પ્લેઓફની ટિકિટ, પંજાબની સતત છઠ્ઠી હાર