IPL 2022: IPLની નવી ચેમ્પિયન ટીમ ‘ગુજરાત ટાઈટન્સ’નો અમદાવાદમાં નીકળશે વિજયરથ

ઇન્ડિયન પ્રીમિયર લીગ (IPL 2022)ની 15મી સિઝનમાં પોતાની ડેબ્યુ સિઝનમાં શાનદાર પ્રદર્શન કરતા ગુજરાત ટાઈટન્સ (Gujarat Titans) ટીમે IPLની ટ્રોફી જીતી લીધી છે. ગુજરાત ટાઈટન્સની ટીમે ફાઈનલ મેચમાં રાજસ્થાન રોયલ્સ (Rajasthan Royals) ટીમને 7 વિકેટે હરાવીને ચેમ્પિયન બન્યું હતું. ગુજરાત ટાઈટન્સની જીતનો હીરો સુકાની હાર્દિક પંડ્યા રહ્યો હતો. હાર્દિક પંડ્યા (Hardik Pandya)એ ફાઈનલ મેચમાં 30 બોલમાં 34 રન અને 3 વિકેટ પણ લીધી હતી. આમ તેના ઓલરાઉન્ડ પ્રદર્શનના કારણે તે મેન ઓફ ધ મેચ જાહેર થયો હતો. મહત્વનું છે કે ગુજરાત ટાઈટન્સ લીગમાં પહેલીવાર રમી રહી હતી અને પ્લેઓફમાં પહોંચનારી ગુજરાત ટીમ પણ પહેલી જ બની હતી. ત્યારબાદ ફાઈનલ મેચમાં પણ સૌથી પહેલા પોતાનું સ્થાન પાક્કું કર્યું હતું તો ડેબ્યુ સિઝનમાં આઈપીએલનું ટાઈટલ જીતનારી રાજસ્થાન બાદ બીજી ટીમ બની હતી.

જીત બાદ ગુજરાત ટાઈટન્સ કરશે અમદાવાદમાં રોડ શો

તમને જણાવી દઇએ કે IPL 2022માં ચેમ્પિયન બન્યા બાદ ગુજરાત ટાઈટન્સની ટીમ આજે એટલે કે 30 મે 2022 ના રોજ સાંજે 5.30 વાગ્યે રોડ શો કરશે તો આ રોડ શો દરમ્યાન ગુજરાત ટાઈટન્સ ટીમના ખેલાડીઓ ઓપન બસમાં બેસીને IPL 2022ની ટ્રોફી સાથે અમદાવાદ શહેરીજનો વચ્ચે નીકળશે અને પોતાના વિજયની ઉજવણી કરશે. આ રોડ શો દરમ્યાન  ગરબા પણ કરવામાં આવશે.

ગુજરાત ટાઈટન્સની ટીમ IPL 2022માં ચેમ્પિયન બન્યા બાદ આજે 30 મે 2022ના રોજ ગુજરાતના મુખ્યમંત્રી ભુપેન્દ્ર પટેલ ની મુલાકાત કરશે અને ત્યારબાદ પોતાના વિજયની ઉજવણી કરવા માટે રોડ શો કરવા તૈયાર થશે.

ફાઈનલ જીત્યા બાદ ગુજરાત ટાઈટન્સ ટીમને મળ્યા આટલા કરોડો રૂપિયા

IPL 2022ની ચેમ્પિયન ટીમ ગુજરાત ટાઈટન્સને ઈનામ તરીકે 20 કરોડ રૂપિયા મળ્યા છે. આ સિવાય ફાઈનલમાં હારેલી રનર અપ ટીમ એટલે કે રાજસ્થાન રોયલ્સને 13 કરોડ રૂપિયા આપવામાં આવ્યા હતા. જ્યારે IPL 2022માં ત્રીજા નંબરની ટીમ તરીકે રોયલ ચેલેન્જર્સ બેંગ્લોરની સફર સમાપ્ત થઈ ત્યારે તેને 7 કરોડ રૂપિયા મળ્યા હતા. તે જ સમયે, લખનૌ સુપર જાયન્ટ્સની તિજોરીમાં 6.50 કરોડ રૂપિયા આવ્યા, જે ચોથા નંબર પર હતી.