મુંબઈ ઈન્ડિયન્સ (Mumbai Indians) આઈપીએલની શ્રેષ્ઠ ટીમોમાંની એક રહી છે. આ ટીમે 5 વખત ઈન્ડિયન પ્રીમિયર લીગ (IPL) નો ખિતાબ જીત્યો છે. પરંતુ IPL 2022 માં મુંબઈ ફ્લોપ સાબિત થયું છે. રોહિત શર્મા (Rohit Sharma) ની આગેવાની હેઠળની ટીમ પોઈન્ટ ટેબલમાં સૌથી નીચે છે. તેણે અત્યાર સુધીમાં 13 મેચ રમી છે અને આ સમયગાળા દરમિયાન તેણે માત્ર 3 મેચમાં જ જીત મેળવી છે. જ્યારે 10 મેચમાં હારનો સામનો કરવો પડ્યો હતો. મુંબઈ આ સિઝનમાં ફ્લોપ રહ્યું. તેની પાછળ 3 મોટા કારણો છે.
IPL 2022 માં મુંબઈના મોટા ખેલાડીઓ કંઈ ખાસ કરી શક્યા નથી. રોહિત શર્મા સહિત ઘણા એવા ખેલાડીઓ છે જે ટીમને મોટા સ્કોર સુધી લઈ જઈ શક્યા નથી અથવા જીતમાં મહત્વની ભૂમિકા ભજવી શક્યા નથી. મુંબઈના ખરાબ પ્રદર્શન પાછળ ટીમના મોટા ખેલાડીઓનો ફ્લોપ શો પણ મહત્વનું કારણ બન્યું છે. જો આ સિઝનમાં સૌથી વધુ રન બનાવનાર ટોપ 10 ખેલાડીઓની યાદી પર નજર કરીએ તો હાલમાં આ યાદીમાં મુંબઈનો એક પણ ખેલાડી નથી.
મુંબઈની 13 મેચોમાં સૌથી વધુ રન બનાવનાર ખેલાડીની વાત કરીએ તો તિલક વર્મા (Tilak Verma) ટોપ પર છે. તેણે 376 રન બનાવ્યા હતા. તે જ સમયે સુકાની રોહિત શર્માએ 13 મેચમાં માત્ર 266 રન બનાવ્યા છે. આ દરમિયાન તે એક પણ અડધી સદી ફટકારી શક્યો નથી. ટિમ ડેવિડે 7 મેચમાં 152 રન બનાવ્યા હતા. કિરન પોલાર્ડ 11 મેચમાં માત્ર 144 રન જ બનાવી શક્યો હતો. મુંબઈના મોટા ખેલાડીઓ આ સિઝનમાં પાછળ રહ્યા. તે જ સમયે સૂર્યકુમાર યાદવ ઈજાના કારણે બહાર થઇ ગયો છે. જોકે તેનું પ્રદર્શન સારું હતું.
મુંબઈની બેટિંગની સાથે બોલિંગ પણ ખરાબ રીતે ફ્લોપ રહી છે. આઈપીએલ 2022 માં સૌથી વધુ વિકેટ લેનાર ટોપ 20 બોલરોની યાદી જોઈએ તો તેમાં મુંબઈનો એક પણ બોલર નથી. જસપ્રીત બુમરાહ (Jasprit Bumrah) ટીમ માટે સૌથી વધુ વિકેટ લેનાર બોલર છે. તેણે 13 મેચમાં 12 વિકેટ ઝડપી છે. જ્યારે ડેનિયલ સેમ્સે 10 મેચમાં 12 વિકેટ લીધી છે. આ સિવાય અન્ય કોઈ બોલરનું પ્રદર્શન ખાસ રહ્યું ન હતું.
આ સિઝનમાં મુંબઈ માટે પ્લેઈંગ ઈલેવન એક મોટો પડકાર હતો. સુકાની રોહિત શર્માની સાથે મેનેજમેન્ટ અને કોચ પ્લેઈંગ ઈલેવનને લઈને સમસ્યાનો સામનો કરી રહ્યા હોવાનું જણાયું હતું. આ સિઝનમાં ટીમ પાસે ફિક્સ પ્લેઈંગ ઈલેવન નથી.
Published On - 12:20 pm, Wed, 18 May 22