IND vs NZ: રાંચીમાં હાર બાદ હાર્દિક પંડ્યા બોલ્યો-ટક્કર વોશિંગ્ટન વિરુદ્ધ ન્યુઝીલેન્ડ હતી

રાંચીમાં શુક્રવારે રમાયેલી ટી20 સિરીઝની પ્રથમ મેચમાં ભારતની 21 રનથી હાર થઈ હતી. ભારતીય ટીમે 177 રનના લક્ષ્ય સામે 155 રન નિર્ધારિત ઓવરમા 9 વિકેટના નુક્શાન પર નોંધાવ્યા હતા. આમ ન્યુઝીલેન્ડની ટીમે ટી20 સિરીઝમાં 1-0થી લીડ મેળવી છે. રાંચીમાં રમાયેલી પ્રથમ મેચમાં એક તરફ સ્ટાર ખેલાડીઓ બેટિંગ અને બોલિંગમાં નિષ્ફળ નિવડ્યા હતા, તો બીજી તરફ વોશિંગ્ટન સુંદરે પોતાનો કમાલ દેખાડ્યો હતો. પુરી મેચમાં ભારત તરફથી એક માત્ર સુંદર ચમકતો નજર આવી રહ્યો હતો. હાર્દિક પંડ્યાએ મેચ બાદ તેના ભરપૂર વખાણ કર્યા હતા.

વોશિંગ્ટન સુંદરે પહેલા બોલિંગ કરતા એક જ ઓવરમાં બે વિકેટ ઝડપીને ન્યુઝીલેન્ડની છાવણીને ઝટકો આપ્યો હતો. ફિલ્ડીંગમાં પણ તેણે જબરદસ્ત છલાંગ લગાવી કેચ ઝડપી બતાવ્યો હતો. બાદમાં જ્યારે ભારતીય બેટિંગ લાઈન ફ્લોપ થઈ રહેલી લાગી રહી હતી, ત્યારે વોશિંગ્ટન સુંદરે ધમાલ મચાવતી બેટિંગ કરી અડધી સદી નોંધાવી હતી.

સુંદરની અડધી સદી, સૂર્યા ચૂક્યો

ભારત તરફથી લક્ષ્યનો પિછો કરતા સૂર્યકુમાર યાદવ અને વોશિંગ્ટન સુંદરે સૌથી વધારે રન નોંઘાવ્યા હતા. સૂર્યકુમાર યાદવે 47 રન નોંધાવ્યા હતા. જ્યારે વોશિંગ્ટન સુંદરે 50 રન નોંધાવ્યા હતા. તેણે અડધી સદી માત્ર 25 બોલમાં જ પુરી કરી લીધી હતી. વોશિંગ્ટ સુંદર અને સૂર્યાએ પોતાના ક્રિઝ પર રહેવા દરમિયાન ભારતીય ઈનીંગને સંભાળવાનો પ્રયાસ કર્યો હતો. જોકે ભારતીય ટીમને જીત નસીબ થઈ શકી નહોતી. કારણ કે ભારતને જેની પર ભરોસો છે તેવા સ્ટાર ખેલાડીઓ જ સફળ રહ્યા નહોતા. ભારતે 15 રનના સ્કોર પર જ ઈશાન, ગિલ અને ત્રિપાઠી જેવા ટોપ ઓર્ડરના ખેલાડીઓની વિકેટ ગુમાવી દીધી હતી.

હાર્દિકે કર્યા સુંદરના વખાણ

સિરીઝમાં ભારતનુ સુકાન સંભાળી રહેલા હાર્દિક પંડ્યાએ વોશિંગ્ટન સુંદરના વખાણ કર્યા હતા. તેણે કહ્યુ કે, કોઈએ વિચાર્યું ન હતું કે વિકેટ આ રીતે ખેલશે. બંને ટીમો આશ્ચર્યચકિત થઈ ગઈ હતી, પરંતુ ન્યુઝીલેન્ડ સારું રમ્યું હતું. જ્યાં સુધી સૂર્યા અને હું બંને બેટિંગ કરતા હતા ત્યાં સુધી અમને આશા હતી કે અમે જીતીશું. અમે 25 રન વધુ આપ્યા. સુંદરે જે રીતે બોલિંગ, બેટિંગ અને ફિલ્ડિંગ કરી તે જોઈને એવું લાગી રહ્યું હતું કે આ મેચ ન્યૂઝીલેન્ડ વિરુદ્ધ ભારત નહીં, પરંતુ સુંદર વિરુદ્ધ ન્યૂઝીલેન્ડની છે. જો સુંદર અને અક્ષર આ રીતે આગળ વધતા રહેશે તો તેનાથી ભારતીય ક્રિકેટને ઘણી મદદ મળશે.