Mohammed Shami કરોડોની કમાણી કરીને પણ કેમ પહેરે છે ફાટેલા શૂઝ? આ કારણ છે તેની મજબૂરી

ભારતીય ક્રિકેટ ટીમના સ્ટાર ફાસ્ટ બોલર મોહમ્મદ શમી (Mohammed Shami) એ એજબેસ્ટન ટેસ્ટ (Edgbaston Test) ના બીજા અને ત્રીજા દિવસે પોતાની ધારદાર બોલીંગ વડે ઈંગ્લેન્ડના બેટ્સમેની હાલત મુશ્કેલ કરી દીધી હતી. શમીને ઇનિંગ્સમાં માત્ર બે વિકેટ મળી હતી, પરંતુ તેના બોલનો સામનો કરવો એ ઇંગ્લેન્ડના બેટ્સમેનો માટે સૌથી મોટો પડકાર હતો. શમીના બોલે ભારતીય ક્રિકેટ ટીમ (Indian Cricket Team) ના ચાહકોને જેટલા પ્રભાવિત કર્યા તેટલા જ તેના શૂઝની હાલત જોઈને ચોંકી ગયા. બોલિંગ કરતી વખતે શમીના એક પગના શૂઝમાં આગળના ભાગમાં મોટું કાણું પડી ગયું હતું, જેનાથી ઘણા લોકોના મનમાં પ્રશ્ન ઊભો થયો હતો કે ખૂબ કમાણી કરનાર ભારતીય ફાસ્ટ બોલરને આવા જૂતા કેમ પહેરવા પડે છે? આ માટેનુ કારણ કંઈક અલગ છે. જે ઝડપી બોલરો માટે આમ તો સામાન્ય છે.

એજબેસ્ટનમાં શૂઝની થઈ ખરાબ હાલત

એજબેસ્ટન ટેસ્ટના ત્રીજા દિવસે શમી જબરદસ્ત બોલિંગ કરી રહ્યો હતો, પરંતુ આ દરમિયાન તેને પોતાના જૂતા બદલવા પડ્યા હતા. શમીનો એક પગનો શૂઝ આગળથી સંપૂર્ણપણે ફાટી ગયો હતો, જેના કારણે તેને તેના નવા શૂઝ લેવા પડ્યા હતા. આનાથી બધાને આશ્ચર્ય થયું. શમીનો એક શૂઝ ફાટી જવાનુ કારણ એ કે તેના શૂઝના આગળના ભાગમાં પહેલેથી જ એક છિદ્ર હતું, જે કાંણું તે સમયે મેચમાં સંપૂર્ણ રીતે ખુલી ગયું. હવે ફરી એ જ પ્રશ્ન કે આ કાણું કેમ હતું? તો જવાબ આગળની કેટલીક પંક્તિઓમાં છે.

આ કારણથી પહેરે છે ફાટેલા શૂઝ

વાસ્તવમાં, શમીના બંને પગના શૂઝમાં નહીં, પરંતુ માત્ર ડાબા પગમાં જ કાણું રાખેલુ છે, જેનું કારણ તેની બોલિંગને લઈને છે. અનુભવી જમણા હાથના પેસરો મોટેભાગે દરેક મેચમાં આ પ્રકારના શૂઝ પહેરતા હોય છે, જેમાં ડાબા પગના જૂતાને આગળના ભાગમાં છિદ્ર હોય છે. વાસ્તવમાં તેનું મોટું કારણ શમીની બોલિંગ એક્શન છે. જ્યારે શમી તેના રન-અપમાં બોલ ફેંકતા પહેલા હળવો ઉછળે છે અને પછી ક્રિઝ પર આવે છે, ત્યારે લેન્ડિંગ સમયે તેનો ડાબો પગ આગળ રહે છે.

શમીની બોલિંગ એક્શન એવી છે કે જ્યારે તેનો ડાબો પગ ઉતરે છે ત્યારે તેનો અંગૂઠો પણ ઝડપથી આગળ આવે છે. હવે બંધ જૂતામાં તેને નિશ્ચિત જગ્યાથી આગળ આવવાની જગ્યા મળતી નથી, તેથી અંગૂઠાની જગ્યાએ જૂતામાં એક મોટું કાણું કરવામાં આવે છે, જેથી લેન્ડિંગ વખતે અંગૂઠાને ખુલ્લી જગ્યા મળી શકે.

બોલરોમાં આ જુગાડનો ટ્રેન્ડ છે

જૂતામાં આવું કાણું કરવાથી અંગૂઠાને મોકળાશ મળે છે, જેના કારણે પગ પર કોઈ વધારાનું દબાણ નથી પડતું અને ઈજા થવાનું જોખમ ઘટી જાય છે. શમી આવું કરનાર પ્રથમ અથવા એકમાત્ર બોલર નથી, પરંતુ વિશ્વ ક્રિકેટમાં ઝડપી બોલરોમાં તે ખૂબ જ સામાન્ય વલણ છે. ઘણા વર્ષોથી, જે ખેલાડીઓ વધુ ઝડપે બોલિંગ કરે છે તેઓ આ જુગાડનો ઉપયોગ કરતા રહે છે.