Ind vs Eng Test 2025: શુભમન ગિલે તોડ્યો નિયમ? બર્મિંગહામ ટેસ્ટમાં ભારતીય કેપ્ટનને લઈને સોશિયલ મીડિયા પર હોબાળો

બર્મિંગહામમાં ઈંગ્લેન્ડ સામે રમાઈ રહેલી બીજી ટેસ્ટમાં શુભમન ગિલે પહેલી ઇનિંગમાં બેવડી સદી અને બીજી ઇનિંગમાં સદી ફટકારીને ઇતિહાસ રચ્યો છે. તેણે બંને ઇનિંગ્સમાં કુલ મળીને 430 રન બનાવ્યા. જો કે, ગિલ પર બર્મિંગહામમાં ક્રિકેટના નિયમ તોડવાનો આરોપ મૂકવામાં આવ્યો છે. હવે પ્રશ્ન એ છે કે, શું શુભમન ગિલે ખરેખર કોઈ નિયમ તોડ્યો? કે પછી કોઈ કારણ વગર સોશિયલ મીડિયા પર હોબાળો થઈ રહ્યો છે.

જ્યારે કિટ સ્પોન્સર ADIDAS છે, તો ગિલે NIKE કેમ પહેર્યું?

એક કિટ સંબંધિત મુદ્દાને લઈને ગિલ ચર્ચામાં આવી ગયો છે. ટીમ ઈન્ડિયાનો કિટ સ્પોન્સર એડિડાસ છે પરંતુ બર્મિંગહામ ટેસ્ટના ચોથા દિવસે બીજી ઇનિંગ ડિકલેર કરતી વખતે ગિલે જે કિટ પહેરી હતી તે નાઇકીની હતી. હવે આ ઘટનાને લઈને સવાલો ઉભા થઈ રહ્યા છે કે, શું ગિલ એડિડાસને બદલે નાઇકીની કિટ પહેરે તે યોગ્ય છે?

મીડિયા રિપોર્ટ્સ અનુસાર, એક સિદ્ધાંત એવો પણ છે કે શુભમન ગિલ NIKEનો બ્રાન્ડ એમ્બેસેડર હોવાથી તે તેની કિટ પહેરી શકે છે. આમાં કંઈ વિવાદાસ્પદ નથી. જો કોઈ ખેલાડી આવું કરે છે, તો તેમાં કોઈ નુકસાન નથી.

ગિલે બર્મિંગહામ ટેસ્ટમાં 430 રન બનાવ્યા

બર્મિંગહામ ટેસ્ટમાં, ટીમ ઈન્ડિયાએ 6 વિકેટે 427 રન પર તેની બીજી ઇનિંગ ડિકલેર કરી હતી. ઈન્ડિયાએ ઇંગ્લેન્ડ સામે 608 રનનો વિશાળ લક્ષ્યાંક આપ્યો છે. લક્ષ્યનો પીછો કરવા ઉતરેલી ઇંગ્લિશ ટીમ હાલમાં બેકફૂટ પર આવી ગઈ છે. ઇંગ્લેન્ડનો સ્કોર હાલમાં 173 રન છે અને 6 વિકેટ પડી ગઈ છે. ભારત ટેસ્ટ મેચ જીતવાથી ફક્ત 4 વિકેટ દૂર છે.