IND vs AUS: ઓસ્ટ્રેલિયા સામે મેદાનમાં ઉતરતા જ રોહિત શર્મા રચશે ઈતિહાસ, અનેક રેકોર્ડ પણ તોડવાની તક
ટીમ ઈન્ડિયાના અનુભવી બેટ્સમેન રોહિત શર્મા 225 દિવસ પછી આંતરરાષ્ટ્રીય ક્રિકેટમાં વાપસી કરવા માટે તૈયાર છે. જ્યારે તે પર્થમાં ઓસ્ટ્રેલિયા સામેની પ્રથમ ODI માં મેદાન પર ઉતરશે, ત્યારે તે એક ખાસ રેકોર્ડ બનાવશે. તે 500 આંતરરાષ્ટ્રીય મેચ રમનાર વિશ્વનો 11મો ખેલાડી બનશે. સાથે જ તેની પાસે સિરીઝમાં બીજા ઘણા રેકોર્ડ બનાવવી પણ તક છે.
ભારતને ચેમ્પિયન્સ ટ્રોફી 2025ના ખિતાબ તરફ દોરી જનાર રોહિત શર્મા હવે શુભમન ગિલના નેતૃત્વમાં 225 દિવસ પછી ODI મેચ રમવા માટે તૈયાર છે. 19 ઓક્ટોબરે પર્થના મેદાન પર પગ મૂકતાની સાથે જ તે એક નવો રેકોર્ડ બનાવશે. તેની નજર બીજા રેકોર્ડ પર પણ રહેશે, જેના માટે તેને સારી ઈનિંગ રમવાની જરૂર છે. રોહિત શર્મા લાંબા સમય પછી આંતરરાષ્ટ્રીય ક્રિકેટમાં પરત ફરી રહ્યો છે. આ સમય દરમિયાન, તે ઓસ્ટ્રેલિયન બોલરોને થાકવા માટે ઉત્સુક છે.
500 આંતરરાષ્ટ્રીય મેચ
જ્યારે ટીમ ઈન્ડિયાના દિગ્ગજ બેટ્સમેન રોહિત શર્મા ઓસ્ટ્રેલિયા સામેની પ્રથમ વનડેમાં મેદાનમાં ઉતરશે, ત્યારે તે પોતા 500મી આંતરરાષ્ટ્રીય મેચ રમશે. આ સાથે, તે 500 આંતરરાષ્ટ્રીય મેચ રમનાર વિશ્વનો 11મો ખેલાડી બનશે. રોહિત શર્માએ અત્યાર સુધીમાં 499 મેચ રમી છે, જેમાં 19,700 રન બનાવ્યા છે, જેમાં 49 સદી અને 108 અડધી સદીનો સમાવેશ થાય છે. સચિન તેંડુલકર (664 મેચ) 500 થી વધુ આંતરરાષ્ટ્રીય મેચ રમનારા ખેલાડીઓની યાદીમાં ટોચ પર છે. વિરાટ કોહલી (550 મેચ) અને મહેન્દ્ર સિંહ ધોની (538 મેચ) પણ આ યાદીમાં છે.
સૌથી વધુ છગ્ગાનો રેકોર્ડ
રોહિત શર્મા વનડે ક્રિકેટમાં બીજો સૌથી વધુ છગ્ગા ફટકારનાર ખેલાડી છે. 273 મેચમાં રોહિત શર્માએ 344 છગ્ગા ફટકાર્યા બાદ, તેની પાસે પાકિસ્તાનના શાહિદ આફ્રિદી (398 મેચમાં 351 છગ્ગા) ને પાછળ છોડીને વનડેમાં સૌથી વધુ છગ્ગા મારનાર ખેલાડી બનવા માટે ફક્ત આઠ છગ્ગાની જરૂર છે. તે ઓસ્ટ્રેલિયા સામે 100 છગ્ગા પણ ફટકારી શકે છે, તેણે ઓસ્ટ્રેલિયા સામે 46 વનડેમાં 88 છગ્ગા ફટકાર્યા છે. તે એક બાબતમાં ભારતના ભૂતપૂર્વ કેપ્ટન સૌરવ ગાંગુલીને પણ પાછળ છોડી શકે છે.
સૌથી વધુ વનડે રન
રોહિત શર્માને ભૂતપૂર્વ કેપ્ટન સૌરવ ગાંગુલીને પાછળ છોડીને ભારતનો ત્રીજો સૌથી વધુ વનડે રન બનાવનાર ખેલાડી બનવા માટે 54 રનની જરૂર છે. 273 મેચોમાં, રોહિતે 48.76 ની સરેરાશ અને 92.80 ના સ્ટ્રાઈક રેટથી 11,168 રન બનાવ્યા છે, જેમાં 32 સદી અને 58 અડધી સદીનો સમાવેશ થાય છે. સૌરવ ગાંગુલીના ODI માં 11,221 રન છે. વધુમાં, રોહિત શર્મા આંતરરાષ્ટ્રીય મેચોમાં 50 સદી ફટકારવાથી માત્ર એક ડગલું દૂર છે.
આ પણ વાંચો: અફઘાન ક્રિકેટરોના મોત પર ICC અને BCCI થયું ગુસ્સે, હવે પાકિસ્તાન સામે થશે કાર્યવાહી !
