T20 WC Breaking : સુપર-8 પહેલા ઝિમ્બાબ્વે બન્યું નંબર-1, શ્રીલંકાને તેના જ ઘરમાં હરાવ્યું
ઝિમ્બાબ્વેએ 2026 T20 વર્લ્ડ કપમાં કોલંબોમાં રમાયેલી અંતિમ ગ્રુપ B મેચમાં શ્રીલંકાને હરાવી ઐતિહાસિક જીત નોંધાવી. કેપ્ટન સિકંદર રઝા અને ઓપનરબ્રાયન બેનેટના શાનદાર પ્રદર્શનના કારણે ટીમે 179 રનનો લક્ષ્યાંક હાંસલ કરી ગ્રુપમાં ટોચનું સ્થાન મેળવ્યું અને સુપર 8 પહેલાં જ દાવેદારી મજબૂત કરી.
ઝિમ્બાબ્વેએ ઓસ્ટ્રેલિયાને હરાવીને T20 વર્લ્ડ કપ 2026 ના સુપર 8 માં સ્થાન મેળવ્યું હતું. હવે, ટૂર્નામેન્ટના યજમાન શ્રીલંકાને તેના જ મેદાનમાં હરાવીને, તેઓએ સુપર 8 પહેલા ગ્રુપ સ્ટેજમાં નંબર વન સ્થાન પણ મેળવ્યું છે. ઝિમ્બાબ્વેએ કોલંબોમાં રમાયેલી તેમની છેલ્લી ગ્રુપ B મેચમાં શ્રીલંકાને હરાવ્યું હતું. આ જીત સાથે, તેઓ હવે ગ્રુપ B પોઈન્ટ ટેબલમાં ટોચ પર પહોંચી ગયા છે.
શ્રીલંકાને હરાવી ઝિમ્બાબ્વે નંબર 1 બન્યું
શ્રીલંકા સામેની મેચ પહેલા ઝિમ્બાબ્વે ગ્રુપ B માં બીજા ક્રમે રહેલી ટીમ હતી. 3 મેચ પછી તેમના 5 પોઈન્ટ હતા, જ્યારે શ્રીલંકા 3 મેચમાંથી 6 પોઈન્ટ સાથે પ્રથમ ક્રમે હતું. જોકે, 19 ફેબ્રુઆરીએ કોલંબોમાં રમાયેલી શ્રીલંકા-ઝિમ્બાબ્વે મેચ પછી કહાની સંપૂર્ણપણે બદલાઈ ગઈ. ગ્રુપ સ્ટેજમાં ચારેય મેચ રમ્યા પછી ઝિમ્બાબ્વે પાસે હવે 7 પોઈન્ટ છે અને તે સુપર 8 પહેલા નંબર વન ટીમ છે. દરમિયાન, શ્રીલંકાના 4 મેચમાંથી ફક્ત 6 પોઈન્ટ છે અને તે બીજા સ્થાને સરકી ગયું છે.
શ્રીલંકાને હરાવીને ઝિમ્બાબ્વેએ બનાવ્યો રેકોર્ડ
શ્રીલંકાએ ઝિમ્બાબ્વેને જીતવા માટે 179 રનનો લક્ષ્યાંક આપ્યો હતો, જેને તેમણે એક બોલ બાકી રહેતા પૂર્ણ કરી લીધો. ICC ટુર્નામેન્ટમાં શ્રીલંકા સામે ઝિમ્બાબ્વેનો આ પહેલો વિજય છે. T20 આંતરરાષ્ટ્રીય મેચોમાં ઝિમ્બાબ્વેનો આ બીજો સૌથી મોટો સફળ રન ચેઝ પણ છે.
સિકંદર રઝાની કેપ્ટન ઈનિંગ
ઝિમ્બાબ્વેના કેપ્ટન સિકંદર રઝાએ ઝિમ્બાબ્વેને જીતનો ઉંબરો પાર કરવામાં મુખ્ય ભૂમિકા ભજવી હતી. ઓપનર બ્રાયન બેનેટે પણ શાનદાર અડધી સદી ફટકારી હતી. બેનેટે 48 બોલમાં 63 રન બનાવ્યા હતા. આ દરમિયાન સિકંદર રઝાએ 173 થી વધુના સ્ટ્રાઇક રેટથી માત્ર 26 બોલમાં 45 રન બનાવ્યા હતા. તેની ઇનિંગમાં બે ચોગ્ગા અને ચાર છગ્ગાનો સમાવેશ થતો હતો.
