એ સમય એવો હતો જ્યારે ટીમમાં મસ્તી, મોજ, જુસ્સા અને જુનુનથી ભરપૂર યુવા સ્ટાર ખેલાડીઓની સાથે અનુભવ અને દમદાર રેકોર્ડ ધરાવતા દિગ્ગજ ખેલાડીઓ ટીમમાં સાથે હતા. એવામાં ચોક્કસથી જ યુવા અને અનુભવી ખેલાડીઓ વચ્ચે મજેદાર કિસ્સાઓ બનવા સ્વાભાવિક હતા. એવા જ એક કિસ્સાની વાત ભારતના પૂર્વ સ્ટાર સ્પિનર હરભજન સિંહે બધાને જણાવી હતી.
આ કિસ્સો સાંભળતી વખતે જેટલી હસી ત્યાં હાજર ફેન્સના ચેહરા પર હતી તેટલી જ મસ્તી અને હસી આ કિસ્સો જણાવતી વખતે હરભજન સિંહના ચહેરા પર હતી, કારણકે આ કિસ્સો જ એટલો મજેદાર અને ફની હતો. જેમાં હરભજન, ઝહીર અને યુવરાજથી કંટાડીને કેપ્ટન સૌરવ ગાંગુલીએ એવી હરકત કરી હતી જેની કોઈને અપેક્ષા ન હતી.
હરભજન સિંહે જણાવ્યું કે, આ કિસ્સો 2003ની આસપાસનો હતો. ત્યારે હરભજન સિંહ, યુવરાજ સિંહ, ઝહીર ખાન ટીમમાં પોતાનું સ્થાન મજબૂત કરી રહ્યા હતા અને સ્ટાર પ્લેયર બનવા તરફ આગળ વધી રહ્યા હતા. એ સમયે સૌરવ ગાંગુલી ટીમના કેપ્ટન હતા અને આ યુવા ખેલાડીઓની કેટલીક હરકતોથી ગાંગુલી નારાજ હતા. જે અંગે તેમણે એક વાર મીડિયામાં કોઈક સ્ટેટમેન્ટ આપ્યું હતું.
હરભજન સિંહે જણાવ્યું કે, અમને ત્રણેયને એ વાત ખબર પડી કે દાદાએ મીડિયામાં એ સ્ટેટમેન્ટ આપ્યું કે હરભજન, ઝહીર અને યુવરાજનું ગેમ (ક્રિકેટ) પર ફોકસ નથી. ત્રણેય પાર્ટીઓ કરે છે અને અલગ-અલગ છોકરીઓ સાથે ફરે છે. આ વાત સાંભળી હરભજન સિંહે બીજા દિવસે એક પ્લાન બનાવ્યો અને મેદાનમાં પહોંચતા જ બબાલ કરી.
હરભજન-યુવરાજ-ઝહીર ત્રણેય ખેલાડીઓએ દાદાને કહ્યું કે આવું તમે કેમ સ્ટેટમેન્ટ આપ્યું. અમે પ્રેક્ટિસ નહીં કરીએ, અમે મેચમાં નહીં રમીએ. જે બાદ સૌરવ ગાંગુલીને ગુસ્સો આવ્યો અને તેમણે કેપ્ટન્સી છોડવાની વાત કહી અને નારાજ થઈ ગયા. જે બાદ હરભજન સિંહે તેમને રોક્યા અને કહ્યું કે આજે પહેલી એપ્રિલ છે અને અમે તમને એપ્રિલ ફૂલ બનાવી રહ્યા છીએ.
આ વાત સાંભળ્યા બાદ કેપ્ટન સૌરવ ગાંગુલીને ફરી ગુસ્સો આવ્યો અને તેઓ હરભજન સિંહની પાછળ બેટ લઈને મેદાનમાં દોડવા લાગ્યા. આ જોઈ બધા હેરાન થઈ ગયા. કોઈને દાદા પાસેથી આવી હરકતની અપેક્ષા ન હતી. જોકે ત્યારબાદ બધુ રમૂજી અંદાજમાં શાંત થઈ ગયું. કેપ્ટન ગાંગુલી અને યુવા હરભજન વચ્ચેનો આ કિસ્સો ખૂબ જ મજેદાર હતો, જેનો વિડીયો પણ ખૂબ જ વાયરલ થયો હતો.
આ પણ વાંચો: હાર્દિક પંડ્યાની અમિત શાહ સાથે મુલાકાત, BCCI સેક્રેટરી જય શાહ પણ હાજર રહ્યા