Asia Cup 2025 : ‘પાકિસ્તાન’ ભગવાન અને ભારત ભરોસે ! ફાઇનલ રમવું હોય તો હાથ જોડવા જ પડશે, જાણો આવું કેમ

એશિયા કપ 2025 માં ભારત અને પાકિસ્તાનની ટીમ વચ્ચે ભારે વિવાદ જોવા મળ્યો હતો. સુપર 4 સ્ટેજમાં બંને ટીમોના ખેલાડીઓ વચ્ચે ઉગ્ર બોલાચાલી પણ થઈ હતી. પાકિસ્તાન બંને મેચ હારી ગયું અને ટીમ ઈન્ડિયાની બરાબરી કરવામાં નિષ્ફળ ગયું. જો કે, હવે પાકિસ્તાન માટે પરિસ્થિતિ અલગ છે અને તેઓ ભારતની જીત માટે પ્રાર્થના કરવા મજબૂર છે.

પાકિસ્તાને શું કરવું પડશે?

પાકિસ્તાન ફાઇનલની દોડમાં ઘણું પાછળ રહી ગયું છે. જો તેઓ ફાઇનલમાં પહોંચવા માંગતા હોય, તો તેમણે ટીમ ઈન્ડિયાની જીત માટે પ્રાર્થના કરવી પડશે. હાલમાં, ભારત અને બાંગ્લાદેશ 2-2 પોઈન્ટ સાથે સુપર 4 પોઈન્ટ ટેબલમાં આગળ છે.

આ દરમિયાન, પાકિસ્તાન અને શ્રીલંકાની ટીમ હજુ પોતાનું ખાતું ખોલાવી શકી નથી. આથી, ફાઇનલમાં પહોંચવા માટે પાકિસ્તાને તેની બાકીની બંને મેચ જીતવી પડશે. પાકિસ્તાન શ્રીલંકા સામે તેની બીજી ‘સુપર 4’ મેચ રમશે.

જો પાકિસ્તાન આ મેચ જીતે છે, તો તેના બે પોઈન્ટ થશે. ત્યારબાદ તેનો સામનો બાંગ્લાદેશ સાથે થશે. આ મેચ જો પાકિસ્તાન જીતશે તો તેના ચાર પોઈન્ટ થઈ જશે. જો કે, આ સમીકરણ મુજબ બાંગ્લાદેશના પણ ચાર પોઈન્ટ હોઈ શકે છે, કારણ કે તે ભારત સામે પણ એક મેચ રમશે.

ઈન્ડિયા પાકિસ્તાનનો રસ્તો સાફ કરવા તૈયાર

જો ટીમ ઈન્ડિયા આ મેચ જીતી જાય છે, તો પાકિસ્તાનનો રસ્તો સાફ થઈ જશે. આથી, પાકિસ્તાન બાંગ્લાદેશને કોઈપણ કિંમતે હરાવવા માંગશે, જેથી પાકિસ્તાનનું ભાગ્ય તેમના હાથમાં રહે. ટીમ ઈન્ડિયા 24 સપ્ટેમ્બરે બાંગ્લાદેશ સામે તેની આગામી સુપર 4 મેચ રમશે.

આ મેચમાં ટીમ ઈન્ડિયાની જીત ફાઇનલમાં તેમનું સ્થાન લગભગ સુનિશ્ચિત કરશે. આથી, ટીમ ઈન્ડિયા આ મેચ કોઈપણ કિંમતે જીતવા માંગશે, જેથી લાસ્ટ સુપર 4 મેચમાં શ્રીલંકાનો સામનો ‘કરો યા મરો’ની સ્થિતિમાં ન રમવો પડે.