Breaking News: ચાલુ મેચમાં મેદાનમાં મોબાઈલ વાપરવાનું રાજસ્થાન રોયલ્સના મેનેજેરને પડ્યું ભારે, લાગ્યો આટલા લાખનો દંડ
ચાલુ મેચમાં મેદાનમાં મોબાઈલ વાપરવાનું રાજસ્થાન રોયલ્સના મેનેજેરને ભારે પડ્યું છે. RCB સામેની મેચ દરમિયાન ડગઆઉટમાં ફોનનો ઉપયોગ કરનાર RR ના મેનેજર રોમી ભિંડરને BCCI એ દંડ ફટકાર્યો છે. BCCI સેક્રેટરી દેવજીત સૈકિયાએ આ માહિતી આપી હતી.
રાજસ્થાન રોયલ્સ ટીમ મેનેજરે RCB સામેની મેચ દરમિયાન ડગઆઉટમાં ફોનનો ઉપયોગ કર્યો હતો, જેના પછી BCCIએ તેની સામે કાર્યવાહી કરી છે. BCCIએ RR ના ટીમ મેનેજરને ભ્રષ્ટાચાર વિરોધી નિયમોનું ઉલ્લંઘન કરવા બદલ દોષિત ઠેરવ્યો છે અને તેના પર એક લાખ રૂપિયાનો દંડ ફટકાર્યો છે. રોમી ભિંડર બોર્ડની નોટિસનો સંતોષકારક જવાબ આપવામાં નિષ્ફળ રહ્યો હતો અને BCCIએ તેને ચેતવણી પણ આપી છે. BCCI સચિવ દેવજીત સૈકિયાએ આ માહિતી આપી હતી.
રોમી ભિંડરને કેમ દોષિત ઠેરવવામાં આવ્યો?
શરદ કુમારની આગેવાની હેઠળના એન્ટી કરપ્શન યુનિટે ભીંડરને નોટિસ ફટકારી હતી, જેમાં તેનો જવાબ માંગવામાં આવ્યો હતો. સૈકિયાએ જણાવ્યું હતું કે ACU ભીંડરના જવાબથી સંતુષ્ટ ન હોવાથી તેને દોષિત ઠેરવ્યો હતો. IPL પ્લેયર્સ અને મેચ ઓફિસિયલ્સ એરિયા પ્રોટોકોલ મુજબ ડગઆઉટમાં ફોન પર પ્રતિબંધ છે. તેનો ઉપયોગ ફક્ત પેવેલિયનમાં જ થઈ શકે છે.
1 લાખ રૂપિયાનો દંડ અને ચેતવણી
સૈકિયાએ કહ્યું, “ભિંડરને પ્રોટોકોલનું ઉલ્લંઘન કરવાનો દોષી ઠેરવવામાં આવ્યો છે. કારણ કે આ પહેલીવાર ગુનો છે, તેથી તેને 1 લાખ રૂપિયાનો દંડ અને ચેતવણી આપવામાં આવી છે.” BCCI સચિવે કહ્યું, “ટીમ મેનેજર ડ્રેસિંગ રૂમમાં ફોનનો ઉપયોગ કરી શકે છે, પરંતુ ડગઆઉટમાં નહીં. એક્સપર્ટ ટેબલ પર તેમના કમ્પ્યુટરનો ઉપયોગ કરી શકે છે.”
વૈભવ સૂર્યવંશી બચી ગયો
જ્યારે રોમી ભીંડર પોતાનો ફોન વાપરી રહ્યો હતો, ત્યારે વૈભવ સૂર્યવંશી તેની બાજુમાં બેઠો હતો. તે ભીંડરના ફોનમાં જોઈ રહ્યો હતો. 15 વર્ષીય ખેલાડી સામે કોઈ કાર્યવાહી કરવામાં આવી નથી. રાજસ્થાનની ટીમ ટુર્નામેન્ટમાં અસાધારણ રીતે સારું પ્રદર્શન કરી રહી છે, 8 પોઈન્ટ સાથે RR ત્રીજા સ્થાને છે. રાજસ્થાનની આગામી મેચ 19 એપ્રિલે કોલકાતા નાઈટ રાઈડર્સ સામે છે.
