IND vs SL: આ 4 ભારતીય ખેલાડીઓ પહેલી ટેસ્ટમાંથી થશે બહાર! ગિલ-ગંભીર લેશે મોટો નિર્ણય
શ્રીલંકા સામેની પ્રથમ ટેસ્ટ માટે પ્લેઈંગ 11 ની પસંદગી શુભમન ગિલ અને ગૌતમ ગંભીર માટે એક મોટો પડકાર હશે. કેપ્ટન-કોચે કેટલાક મહત્વપૂર્ણ નિર્ણયો લેવા પડી શકે છે. વોર્મ આપ મેચ બાદ 4 ભારતીય ખેલાડીઓ પહેલી ટેસ્ટમાંથી બહાર થશે.
ભારતીય ટીમે શ્રીલંકા સામેની બે મેચની ટેસ્ટ શ્રેણી માટે પ્રેક્ટિસ મેચ જીતીને પોતાની તૈયારીઓને મજબૂત બનાવી દીધી છે. જોકે, 15 ઓગસ્ટથી ગાલેમાં શરૂ થનારી પહેલી ટેસ્ટ મેચ પહેલા સૌથી મોટો પ્રશ્ન ટીમ કોમ્બિનેશન અને પ્લેઈંગ 11 ની પસંદગીનો છે. ટીમની જાહેરાત પછી, ભારતીય ટીમમાં બે મોટા ફેરફારો જોવા મળ્યા છે; જસપ્રીત બુમરાહની જગ્યાએ આકિબ નબીનો સમાવેશ કરવામાં આવ્યો છે અને સાઈ સુદર્શનની જગ્યાએ સરફરાઝ ખાનનો સમાવેશ કરવામાં આવ્યો છે. પરંતુ કેપ્ટન શુભમન ગિલ અને કોચ ગૌતમ ગંભીરને પ્લેઈંગ 11 ની પસંદગી માટે કેટલાક મોટા નિર્ણયો લેવા પડી શકે છે.
યશસ્વી-રાહુલ કરશે ઓપનિંગ, પડિકલ નંબર 3
યશસ્વી જયસ્વાલ અને કેએલ રાહુલ ઇનિંગની શરૂઆત કરે તેવી શક્યતા છે, કારણ કે બંને ખેલાડીઓ વોર્મ-અપ મેચમાં સારા ફોર્મમાં હતા. વોર્મ-અપ મેચમાં શાનદાર સદી ફટકારનાર દેવદત્ત પડિકલે નંબર 3 સ્થાન માટે પોતાનો દાવો નોંધપાત્ર રીતે મજબૂત બનાવ્યો છે. સાઈ સુદર્શનની ગેરહાજરીમાં, પડિકલને નંબર 3 નો ઉમેદવાર માનવામાં આવે છે. વધુમાં, કેપ્ટન ગિલ પણ તેની ઈજામાંથી સ્વસ્થ થઈ ગયો છે, જેના કારણે તે નંબર 4 પર સંભવિત ઉમેદવાર બની ગયો છે.
કીપર તરીકે પંત, સરફરાઝ છઠ્ઠા ક્રમે
રિષભ પંત પાંચમા ક્રમે વિકેટકીપર તરીકે પ્લેઇંગ ઇલેવનનો ભાગ બની શકે છે. સ્પિનરો સામે સારું પ્રદર્શન કરનારા સરફરાઝ ખાનને છઠ્ઠા ક્રમે સ્થાન માટે વિચારી શકાય છે. બીજી તરફ, રવિન્દ્ર જાડેજાને ઓલરાઉન્ડર તરીકે ટીમની પહેલી પસંદગી માનવામાં આવે છે. માનવ સુથાર અને કુલદીપ યાદવ પણ સ્પિનરો તરીકે પ્લેઇંગ ઇલેવનનો ભાગ બની શકે છે. ફાસ્ટ બોલિંગ વિભાગમાં મોહમ્મદ સિરાજ અને ગુરનુર બ્રારની પસંદગી થવાની શક્યતા છે.
પ્લેઇંગ 11 માંથી કોણ બહાર થશે?
તેમના વોર્મ-અપ મેચમાં પ્રદર્શન અને ટીમ કોમ્બિનેશનના આધારે આકિબ નબી, પ્રસિદ્ધ કૃષ્ણા, ધ્રુવ જુરેલ અને સારાંશ જૈનને પ્રથમ ટેસ્ટ માટે પ્લેઇંગ ઇલેવનમાંથી બહાર રાખવાનું લગભગ નક્કી છે. જસપ્રીત બુમરાહની જગ્યાએ આવેલો આકિબ નબી પ્રેક્ટિસ મેચમાં એક પણ વિકેટ લેવામાં નિષ્ફળ ગયો, જેના કારણે તેને તક મળવાની શક્યતા ઓછી થઈ ગઈ. પ્રસિદ્ધ કૃષ્ણા માત્ર એક વિકેટ મેળવી શક્યો, જેના કારણે તેને ડ્રોપ કરવામાં આવે તેવી શક્યતા છે. રિષભ પંત વિકેટકીપર તરીકે હાજર હોવાથી ધ્રુવ જુરેલને બહાર બેસવું પડશે. દરમિયાન, સ્પિન વિભાગમાં રવિન્દ્ર જાડેજા, કુલદીપ યાદવ અને માનવ સુથાર હોવાથી, સારાંશ જૈન માટે સ્થાન મેળવવું મુશ્કેલ છે.
શ્રીલંકા સામે ટેસ્ટમાં સૌથી વધુ છગ્ગા ફટકારનાર ટોપ-5 ભારતીય બેટ્સમેન, જાણો કોણ છે નંબર-1
Published On - 3:29 pm, Mon, 10 August 26
