ENG vs IND: અભિષેક શર્મા પાસે ધોની-રૈનાને પાછળ છોડવાની તક, ફક્ત આટલા રનની જરૂર

ભારત અને ઈંગ્લેન્ડ વચ્ચેની બીજી T20 મેચ શનિવારે માન્ચેસ્ટરના ઓલ્ડ ટ્રેફોર્ડ મેદાન પર રમાશે. વરસાદને કારણે પ્રથમ T20 મેચ રદ થતાં હવે બંને ટીમો માટે બીજી મેચનું મહત્વ વધુ વધી ગયું છે. ભારતીય ટીમ જીત સાથે શ્રેણીમાં સરસાઈ મેળવવા ઉતરશે, જ્યારે યુવા ઓપનર અભિષેક શર્મા વ્યક્તિગત રીતે પણ એક મોટા રેકોર્ડની નજીક છે.

બીજી T20માં અભિષેક શર્મા પર રહેશે નજર

અભિષેક શર્માએ પ્રથમ T20માં વિસ્ફોટક બેટિંગ કરતાં માત્ર 24 બોલમાં 59 રનની શાનદાર ઈનિંગ રમી હતી. તેની આ ઈનિંગે ભારતીય ટીમને મજબૂત સ્કોર સુધી પહોંચાડવામાં મહત્વની ભૂમિકા ભજવી હતી. હવે જો તે બીજી મેચમાં પણ પોતાની લય જાળવી રાખશે તો ભારતીય ક્રિકેટના બે દિગ્ગજ ખેલાડીઓના રેકોર્ડ પાછળ છોડી શકે છે.

એમએસ ધોની-સુરેશ રૈનાને પાછળ છોડવાની તક

અભિષેકે અત્યાર સુધી ભારત માટે 49 T20 આંતરરાષ્ટ્રીય મેચમાં 33.60ની સરેરાશ અને 193.25ના સ્ટ્રાઈક રેટથી 1546 રન બનાવ્યા છે. ભારત માટે T20I માં સૌથી વધુ રન બનાવનાર બેટ્સમેનોની યાદીમાં તે હાલમાં નવમા ક્રમે છે. જો તે બીજી T20Iમાં 60 રન બનાવશે તો 1605 રન ધરાવતા સુરેશ રૈનાને પાછળ છોડી દેશે. જ્યારે 78 રનની ઇનિંગ્સ રમશે તો 1617 રન ધરાવતા એમએસ ધોનીને પણ પાછળ મૂકી દેશે.

T20Iમાં સૌથી વધુ રન બનાવવાનો રેકોર્ડ

હાલમાં ભારત માટે T20 આંતરરાષ્ટ્રીય ક્રિકેટમાં સૌથી વધુ રન બનાવવાનો રેકોર્ડ રોહિત શર્માના નામે છે. તેના ખાતામાં 4231 રન છે, જ્યારે વિરાટ કોહલી 4188 રન સાથે બીજા સ્થાને છે. સૂર્યકુમાર યાદવ, હાર્દિક પંડ્યા અને કેએલ રાહુલ પણ આ યાદીમાં આગળ છે. અભિષેક પાસે હવે ટોપ-7 માં સ્થાન બનાવવાની સુવર્ણ તક છે.

બીજી T20 સાંજે 7 વાગ્યે શરૂ થશે

ભારત અને ઈંગ્લેન્ડ વચ્ચેની બીજી T20 મેચ ભારતીય સમય અનુસાર સાંજે 7 વાગ્યે શરૂ થશે. ચાહકોની નજર એક તરફ ટીમ ઈન્ડિયાના પ્રદર્શન પર રહેશે, તો બીજી તરફ અભિષેક શર્મા પોતાના આક્રમક અંદાજ સાથે ઈતિહાસ રચી ધોની અને સુરેશ રૈનાના રેકોર્ડને પાછળ છોડે છે કે નહીં, તે પણ ખાસ જોવાનું રહેશે.

Breaking News: વૈભવ સૂર્યવંશીને ઈંગ્લેન્ડમાં એક પણ મેચમાં તક નહીં મળે? કોચના નિવેદન બાદ ફેન્સમાં નિરાશા