Breaking News: પાકિસ્તાનના સ્ટાર બેટ્સમેન બાબર આઝમ સામે ICC એ કરી મોટી કાર્યવાહી, આ ભૂલ બદલ ફટકારી સજા
આંતરરાષ્ટ્રીય ક્રિકેટ પરિષદે પાકિસ્તાનના સ્ટાર બેટ્સમેન બાબર આઝમ સામે મહત્વપૂર્ણ કાર્યવાહી કરી છે. શ્રીલંકા સામેની અંતિમ વનડેમાં મહત્વપૂર્ણ ભૂલ બદલ આઝમને સજા ફટકારવામાં આવી છે. જાણો બાબરે એવું શું કર્યું કે તેને દંડ ફટકારવો પડ્યો.
બાબર આઝમ સામે ICC એ મોટી કાર્યવાહી કરીપાકિસ્તાનના સ્ટાર બેટ્સમેન બાબર આઝમે તાજેતરમાં આંતરરાષ્ટ્રીય ક્રિકેટમાં પોતાના લાંબા સમયથી ચાલતા સદીના દુકાળનો અંત લાવ્યો છે. તેણે શ્રીલંકા સામેની બીજી વનડેમાં સદી ફટકારી હતી. જોકે, શ્રેણીની અંતિમ મેચમાં તે ખાસ કંઈ કરી શક્યો ન હતો. આ મેચ દરમિયાન, તેણે એક એવું કૃત્ય કર્યું જેના કારણે આંતરરાષ્ટ્રીય ક્રિકેટ કાઉન્સિલને કાર્યવાહી કરવી પડી અને દંડ ફટકારવો પડ્યો.
ICCએ બાબર આઝમને ફટકાર્યો દંડ
આંતરરાષ્ટ્રીય ક્રિકેટ કાઉન્સિલે બાબર આઝમને ICC આચારસંહિતાનું ઉલ્લંઘન કરવા બદલ દંડ ફટકાર્યો છે. આ ઘટના તાજેતરમાં શ્રીલંકા સામેની ODI શ્રેણી દરમિયાન બની હતી, જ્યાં પાકિસ્તાને શાનદાર પ્રદર્શન કર્યું હતું અને શ્રેણી જીતી હતી. ત્રીજી ODIમાં આઉટ થયા બાદ બાબર આઝમને ક્રિકેટ સાધનોના દુરુપયોગનો દોષી ઠેરવવામાં આવ્યો હતો. 21મી ઓવરમાં આઉટ થયા પછી, તેણે મેદાન છોડતી વખતે પોતાના બેટથી સ્ટમ્પ પર પ્રહાર કર્યો, જે ICC આચારસંહિતાની કલમ 2.2 હેઠળ ઉલ્લંઘન છે.
બાબર આઝમને મેચ ફીના 10 ટકા દંડ
મેચ રેફરી અલી નકવીએ આ ઉલ્લંઘન બદલ બાબરને તેની મેચ ફીના 10 ટકા દંડ ફટકાર્યો અને તેના શિસ્તભંગના રેકોર્ડમાં એક ડિમેરિટ પોઈન્ટ ઉમેર્યો. છેલ્લા 24 મહિનામાં આ તેનો આ પ્રકારનો પહેલો ગુનો છે. બાબરે આરોપ સ્વીકાર્યો અને સજા સ્વીકારી, આમ વધુ વિવાદ વિના મામલો ઉકેલાયો. લેવલ 1 ઉલ્લંઘન માટે લઘુત્તમ દંડ સત્તાવાર ઠપકો છે, જ્યારે મહત્તમ દંડ ખેલાડીની મેચ ફીના 50 ટકા અને એક કે બે ડિમેરિટ પોઈન્ટ છે.
શ્રેણીમાં બાબર આઝમ સૌથી સફળ બેટ્સમેન
બંને ટીમો વચ્ચેની ત્રણ મેચની ODI શ્રેણીમાં બાબર આઝમ સૌથી સફળ બેટ્સમેન રહ્યો. તેણે ત્રણ ઈનિંગ્સમાં 82.50 ની સરેરાશથી 165 રન બનાવ્યા, જેમાં અણનમ 102 રનનો સમાવેશ થાય છે.
આ પણ વાંચો: Aaryavir Sehwag : વીરેન્દ્ર સેહવાગના દીકરાનો ધમાકો, આર્યવીર સેહવાગે 99 રન બનાવી અપાવી જીત
