Breaking News : IPL 2026માં 150 કિમી/કલાકની ઝડપે બોલિંગ કરનાર ખેલાડીની ભારતીય ટીમમાં એન્ટ્રી

ODI Tri-Series : ઈન્ડિયા એની ટીમ માટે શ્રીલંકામાં રમાઈ રહેલી ટ્રાય સીરિઝ અત્યાર સુધી ભારત A ટીમ માટે ખાસ સફળ રહી નથી. આ દરમિયાન, ટીમમાં એક મોટો ફેરફાર કરવામાં આવ્યો છે. ઈજાગ્રસ્ત યુદ્ધવીર સિંહના સ્થાને એક ખેલાડી શ્રીલંકા જઈ રહ્યો છે.

Nirupa Duva | Updated on: Jun 16, 2026 | 8:44 AM

ઈન્ડિયા એની ટીમ હાલમાં શ્રીલંકાના પ્રવાસ પર છે. જ્યાં વનડે ટ્રાય સીરિઝ રમાઈ રહી છે. આ સીરિઝમાં ભારતીય ટીમનું પ્રદર્શન અત્યારસુધી કાંઈ ખાસ રહ્યું નથી. 3માંથી 2 મેચ ગુમાવી ચુકી છે. ત્યારે હવેની મેચ ભારતીય ટીમ માટે કરો યા મરો જેવી રહેશે. આ મેચ પહેલા ઈન્ડિયા એના સ્કવોડમાં પણ ફેરફાર કરવામાં આવ્યો છે. રિપોર્ટ મુજબ બીસીસીઆઈએ ઈજાગ્રસ્ત ખેલાડી યુદ્ધવીર સિંહના રિપ્લેસમેન્ટને પસંદ કર્યો છે. જે ટુંક સમયમાં શ્રીલંકા માટે રવાના થશે.

ઈન્ડિયા એ સ્કવોડ માટે નવા ખેલાડીની એન્ટ્રી

પોતાની તોફાની સ્પીડથી ક્રિકેટ જગતમાં ધમાલ મચાવનાર 23 વર્ષના ફાસ્ટ બોલર અશોક શર્માના કરિયરમાં એક નવો અધ્યાય શરુ થશે. ઘરેલું ક્રિકેટમાં રાજસ્થાન છોડી ગુજરાતમાં આવનાર આ યુવા સ્પીડસ્ટારને શ્રીલંકામાં રમાઈ રહેલી સીરિઝ માટે ઈન્ડિયા એ ટીમમાં સામેલ કરવામાં આવ્યો છે. અશોકને આ તક ઈજાગ્રસ્ત યુદ્ધવીર સિંહના રિપ્લેસમેન્ટના રુપે મળી છે.

રિપોર્ટ મુજબ અશોક શર્મા આજે સવારે કોલંબો માટે રવાના થયો છે. દાંબુલામાં ઈન્ડિયા એ ટીમ સાથે જોડાશે. તમને જણાવી દઈએ કે, આ સીરિઝમાં ભારત એ સિવાય શ્રીલંકા એ અને અફઘાનિસ્તાન એ ટીમ ભાગ લઈ રહી છે. તિલક વર્માની કેપ્ટનશીપમાં ભારતીય ટીમને સોમવારના રોજ શ્રીલંકા વિરુદ્ધ હારનો સામનો કરવો પડ્યો છે. ત્યારબાદ 17 જૂનના રોજ અફઘાનિસ્તાન એ વિરુદ્ધ રમાનારી મેચ ભારત માટે કરો યા મરો જેવી બનીને રહેશે. ત્યારે અશોકની સ્પીડ ભારતીય બોલિંગને નવી ધાર આપી શકે છે.

IPL 2026માં 150+ Kphની સ્પીડ ચર્ચામાં આવી

અશોક શર્માએ હાલમાં આઈપીએલ 2026માં ગુજરાત ટાઈટન્સ દ્વારા રમતા પોતાની સ્પીડથી બધાને પ્રભાવિત કર્યા છે. તેમણે ટૂર્નામેન્ટમાં 6 મેચમાં 6 વિકેટ લીધી છે. આ દરમિયાન તેમણે એક બોલ 154.2 કિમી/કલાકની સ્પીડથી ફેક્યો હતો. ગુજરાત ટાઈટન્સે તેમને ઓક્શનમાં 90 લાખ રુપિયામાં ખરીદ્યો હતો. હવે તેની પાસે ભારતીય જર્સીમાં ધમાલ મચાવવાની તક છે.