કોચીમાં યોજાયેલી મહિલા પ્રીમિયર લીગ 2027 ની હરાજીમાં ઇતિહાસ રચાયો હતો. દિલ્હી કેપિટલ્સે 15 વર્ષની ઓલરાઉન્ડર ઉમા કાશવીને તેમની ટીમમાં સામેલ કરી હતી. ઉમા કાશવી મહિલા પ્રીમિયર લીગના ઇતિહાસમાં સૌથી નાની ઉંમરની ખેલાડી છે. તેણીએ અંશુ નાગરનો રેકોર્ડ તોડ્યો હતો, જેને ગયા વર્ષે દિલ્હી કેપિટલ્સે સાઇન કરી હતી. અંશુ નાગરને પણ 15 વર્ષની ઉંમરે મહિલા પ્રીમિયર લીગની હરાજીમાં ટીમમાં સંલે કરવામાં આવી હતી, પરંતુ ઉમા કાશવી તેના કરતા ત્રણ મહિના નાની છે.

WPL ઇતિહાસની સૌથી નાની ઉંમરની ખેલાડી

ઉમા કાશવી મહિલા પ્રીમિયર લીગની હરાજીના ઇતિહાસમાં વેચાયેલી સૌથી નાની ઉંમરની ખેલાડી બની છે. દિલ્હી કેપિટલ્સે તેણીને તેની મૂળ કિંમત ₹10 લાખમાં ખરીદી હતી. કર્ણાટકની ઓલરાઉન્ડર ઉમા કાશવી તેની ઉંમરના કારણે હરાજી પહેલા જ સમાચારમાં હતી. તેણી માત્ર 15 વર્ષની છે, તેનો જન્મ 9 એપ્રિલ, 2011 ના રોજ થયો હતો.

ઉમા કાશવી કોણ છે?

ઉમા કાશવી કર્ણાટકની રહેવાસી છે. તેણી તાજેતરમાં ભારતીય અંડર-19 ટીમ માટે રમી હતી. તેણીએ શ્રીલંકા અંડર-19 ટીમ સામે ત્રણ T20 મેચમાં ચાર વિકેટ લીધી હતી. તે હાલમાં કર્ણાટક અંડર-19 ટીમની ભાગ છે. ઉમા કાશવીએ માત્ર 12 વર્ષની ઉંમરે જુનિયર ક્લબ-સ્તરની આંતર-શાળા ટુર્નામેન્ટમાં બેવડી સદી ફટકારી પોતાનું નામ બનાવ્યું હતું.

ચાલુ મેચમાં વાંદરાએ હુમલો કર્યો હતો

22 ઓક્ટોબર, 2026 ના રોજ ઉમા કાશવી પર વાંદરાએ હુમલો કર્યો હતો. નાગપુરના VCA સ્ટેડિયમમાં મહિલા અંડર-19 T20 ટ્રોફીના ક્વાર્ટર ફાઇનલ દરમિયાન તેના પર વાંદરા દ્વારા હુમલો કરવામાં આવ્યો હતો. કાશવી બાઉન્ડ્રી લાઇન પર ફિલ્ડિંગ કરી રહી હતી ત્યારે એક વાંદરો તેની તરફ દોડી આવ્યો હતો, જેના કારણે તેણીએ પોતાનું સંતુલન ગુમાવ્યું અને જમીન પર પડી ગઈ હતી. આ ઘટનાનો વીડિયો સોશિયલ મીડિયા પર વાયરલ થયો હતો.

WPL મિની ઓક્શનમાં ખેલાડીઓની બોલી લગાવનાર મલ્લિકા સાગર કોણ છે? જાણો તેમની રસપ્રદ સફર