
ઈંગ્લેન્ડ સામેની બીજી ટી20 મેચમાં ભારતીય ટીમ માટે ડેબ્યૂ કરનાર વૈભવ સૂર્યવંશીને લઈને બીસીસીઆઈ (BCCI) ના ઉપાધ્યક્ષ રાજીવ શુક્લાએ ટીમ મેનેજમેન્ટના નિર્ણયનું સમર્થન કર્યું છે. તેમણે કહ્યું કે, ભારતીય ક્રિકેટ કંટ્રોલ બોર્ડ (BCCI) માં ખેલાડીઓને તક યોગ્યતાના આધારે મળે છે અને કોઈની સાથે અન્યાય કરવામાં આવતો નથી.
સમાચાર એજન્સી એએનઆઈ (ANI) સાથેની વાતચીતમાં રાજીવ શુક્લાએ કહ્યું કે, “વૈભવ સૂર્યવંશીને ડેબ્યૂ અને આ તક મળવા બદલ ખૂબ-ખૂબ અભિનંદન. બીસીસીઆઈ કોઈની સાથે અન્યાય કરતું નથી. બીજું કે, જે ખેલાડીઓ આના હકદાર હોય છે, તેમને તક ચોક્કસ મળે છે.”
તેમણે સોશિયલ મીડિયા પર ચાલી રહેલી એ ચર્ચાઓને પણ ફગાવી દીધી હતી, જેમાં એવો દાવો કરવામાં આવી રહ્યો હતો કે વૈભવને તક આપવામાં આવી રહી નથી. શુક્લાએ કહ્યું કે, કેટલાક લોકો કોચ અને કેપ્ટનની આલોચના કરી રહ્યા હતા પરંતુ ટીમ મેનેજમેન્ટ યોગ્ય સમયની રાહ જોઈ રહ્યું હતું.
તેમણે કહ્યું કે, “મેં થોડા દિવસો પહેલા પણ કહ્યું હતું કે જ્યારે યોગ્ય સમય આવશે, ત્યારે વૈભવને ચોક્કસ તક મળશે. ગઈકાલે તેને તક મળી અને મને વિશ્વાસ છે, કે તે ભવિષ્યમાં સારું પ્રદર્શન કરશે અને ભારતીય ટીમમાં પોતાની ઓળખ બનાવશે. આ ટીમ મેનેજમેન્ટનો શાનદાર નિર્ણય છે અને તેની પ્રશંસા થવી જોઈએ.”
15 વર્ષ અને 99 દિવસની ઉંમરે વૈભવ સૂર્યવંશી ભારત માટે આંતરરાષ્ટ્રીય ક્રિકેટ રમનાર સૌથી યુવા ખેલાડી બની ગયો છે. આ સાથે જ તે કોઈપણ ટેસ્ટ રમતા દેશ તરફથી ટી20 આંતરરાષ્ટ્રીય ક્રિકેટમાં ડેબ્યૂ કરનાર સૌથી નાની ઉંમરના ખેલાડી પણ બની ગયો છે.
વૈભવે આ મામલે સચિન તેંડુલકર અને પિયૂષ ચાવલા જેવા ખેલાડીઓના રેકોર્ડ પાછળ છોડી દીધા છે. સચિને ભારત માટે 16 વર્ષ 205 દિવસની ઉંમરે ટેસ્ટ ડેબ્યૂ કર્યું હતું, જ્યારે પિયૂષ ચાવલાએ 17 વર્ષ 75 દિવસની ઉંમરે પોતાની પ્રથમ આંતરરાષ્ટ્રીય મેચ રમી હતી.
માન્ચેસ્ટરમાં રમાયેલી બીજી ટી20 મેચમાં વૈભવે પોતાની આંતરરાષ્ટ્રીય કારકિર્દીની શરૂઆત આક્રમક અંદાજમાં કરી હતી. તેણે 10 બોલમાં 14 રન બનાવ્યા, જેમાં બે શાનદાર સિક્સર ફટકારી હતી. જો કે, બાદમાં તે વિલ જેક્સના બોલ પર સ્ટમ્પ આઉટ થઈ ગયો હતો.
મેચની વાત કરીએ તો, ભારતે પ્રથમ બેટિંગ કરતા 20 ઓવરમાં 190/7 નો સ્કોર બનાવ્યો હતો. જવાબમાં જેકોબ બેથેલની અણનમ 76 રનની ઇનિંગની મદદથી ઇંગ્લેન્ડે 19 ઓવરમાં લક્ષ્ય હાંસલ કરી લીધો અને પાંચ મેચની સિરીઝમાં 1-0 ની લીડ મેળવી લીધી છે. જણાવી દઈએ કે, પ્રથમ મેચ વરસાદના કારણે ધોવાઈ ગઈ હતી.