જો રદ થઈ જશે એશિયન ગેમ્સ ક્રિકેટની ફાઈનલ, તો કોને મળશે Gold? આખરે કઈ ટીમ બનશે ચેમ્પિયન? જાણો નિયમ
ભારતીય મહિલા ક્રિકેટ ટીમ એશિયન ગેમ્સ 2026ની ફાઈનલમાં પહોંચી ગઈ છે. બાંગ્લાદેશને સેમિફાઈનલમાં હરાવ્યા બાદ હવે ફાઈનલમાં ભારતનો મુકાબલો શ્રીલંકા સામે થશે. જો કે, આ મહત્ત્વપૂર્ણ મેચ પર વરસાદનું સંકટ મંડરાઈ રહ્યું છે. જો વરસાદના કારણે ફાઈનલ રદ થાય, તો Gold Medal કઈ ટીમને મળશે? એશિયન ગેમ્સનો નિયમ શું કહે છે?
ભારતીય મહિલા ક્રિકેટ ટીમ એશિયન ગેમ્સ 2026માં ગોલ્ડની ખૂબ નજીક પહોંચી ગઈ છે. ટીમ ઈન્ડિયા બાંગ્લાદેશને હરાવીને ફાઈનલમાં પહોંચી ગઈ છે. રવિવારે (20-09-2026) યોજાયેલી સેમિફાઈનલમાં શેફાલી વર્માની સદીની મદદથી ભારતે 195 રનનો વિશાળ સ્કોર બનાવ્યો હતો, જવાબમાં બાંગ્લાદેશની ટીમ 81 રનમાં ઓલઆઉટ થઈ ગઈ હતી.
બીજી તરફ શ્રીલંકાએ પાકિસ્તાનને હરાવીને ફાઈનલમાં જગ્યા બનાવી લીધી છે. હવે ફાઈનલ કોરોગી સ્પોર્ટ્સ પાર્ક સ્ટેડિયમ (Korogi Sports Park Stadium) ખાતે રમાશે, જ્યાં વરસાદની શક્યતા છે.
હારનાર ટીમના નામે Silver
એશિયન ગેમ્સ 2026 મહિલા ક્રિકેટની ફાઈનલ ભારત અને શ્રીલંકા વચ્ચે 22 સપ્ટેમ્બરે કોરોગી સ્પોર્ટ્સ પાર્ક સ્ટેડિયમ (Nisshin) ખાતે યોજાશે. આ ગ્રાઉન્ડ પર બાંગ્લાદેશ વર્સિસ ચીન મેચ વરસાદના કારણે રદ થઈ ગઈ હતી, જેમાં એક પણ બોલ ફેંકી શકાયો નહોતો. ફાઈનલમાં પણ અહીં વરસાદની શક્યતા છે. ફાઈનલમાં વિજેતા ટીમ ગોલ્ડ મેડલ જીતશે, જ્યારે હારનાર ટીમના નામે સિલ્વર મેડલ રહેશે.
એશિયન ગેમ્સ ફાઈનલ રદ થાય તો કોને મળશે Gold?
ICCના મોટા ટૂર્નામેન્ટ દરમિયાન ફાઈનલ અથવા નોકઆઉટ મેચોમાં સામાન્ય રીતે રિઝર્વ ડે હોય છે, એટલે કે વરસાદ પડે તો મેચ રિઝર્વ ડે પર રમાય છે. જો કે, એશિયન ગેમ્સ ક્રિકેટની ફાઈનલમાં રિઝર્વ ડે રાખવામાં આવ્યો નથી.
જો એશિયન ગેમ્સમાં ભારત અને શ્રીલંકા મહિલા ટીમ વચ્ચે રમાનારી ફાઈનલ વરસાદના કારણે રદ થઈ જાય છે, તો ટીમ ઈન્ડિયા ગોલ્ડ મેડલ જીતી જશે અને શ્રીલંકાએ સિલ્વરથી સંતોષ માનવો પડશે. નિયમ અનુસાર, આ પરિસ્થિતિમાં વધુ સારી રેન્કિંગ ધરાવતી ટીમને વિજેતા જાહેર કરવામાં આવે છે. તમને જણાવી દઈએ કે, બાંગ્લાદેશને પણ આ જ કારણથી સેમિફાઈનલમાં જગ્યા મળી હતી, કારણ કે તેમની રેન્કિંગ ચીન કરતાં વધુ સારી હતી.
ICC T20 મહિલા ટીમ રેન્કિંગની વાત કરીએ તો ભારત 12,667 પોઈન્ટ્સ સાથે ત્રીજા સ્થાને છે, જ્યારે શ્રીલંકા છઠ્ઠા સ્થાને છે. તેના 10,488 પોઈન્ટ્સ છે.
Bronze માટે લડશે ‘પાકિસ્તાન અને બાંગ્લાદેશ’
એશિયન ગેમ્સ ફાઈનલ પહેલાં 22 સપ્ટેમ્બરે જ સેમિફાઈનલમાં હારનારી બાંગ્લાદેશ અને પાકિસ્તાનની ટીમો સામસામે ટકરાશે. આ ત્રીજા સ્થાન માટેની મેચ હશે, જેની વિજેતા ટીમને બ્રોન્ઝ મેડલ મળશે અને હારનારી ટીમ ખાલી હાથે પરત ફરશે.
આ 3 ખેલાડીઓ ટીમ ઈન્ડિયાને એકલા હાથે હરાવવાની તાકાત રાખે છે, ત્રણેયના ફોર્મ જોઈ ભારતીય ટીમ ચિંતામાં
Published On - 7:05 pm, Sun, 20 September 26
