BCCIએ આ વર્ષે ફેબ્રુઆરીમાં સેન્ટ્રલ કોન્ટ્રાક્ટની જાહેરાત કરી હતી, જે અંતર્ગત ખેલાડીઓને 4 ગ્રેડમાં વહેંચવામાં આવ્યા હતા. પરંતુ, પ્રથમ કોન્ટ્રાક્ટમાં સામેલ ઈશાન કિશન અને શ્રેયસ અય્યરને આ વખતે BCCIએ કોઈપણ ગ્રેડમાં સ્થાન આપ્યું નથી. હવે સચિવ જય શાહે ખુલાસો કર્યો છે કે આ નિર્ણય કોનો હતો. તેમણે કહ્યું કે આ વખતે ઈશાન અને શ્રેયસને BCCIના સેન્ટ્રલ કોન્ટ્રાક્ટમાં ન રાખવાનો નિર્ણય સંપૂર્ણપણે મુખ્ય પસંદગીકાર અજીત અગરકરનો હતો. તેમણે કહ્યું કે તેઓ આ મામલે માત્ર સંયોજક છે.
ઈશાન કિશન અને શ્રેયસ અય્યરને કેન્દ્રીય કરારમાંથી બહાર રાખવાનો નિર્ણય BCCIની સૂચનાઓનું ઉલ્લંઘન કરવા અને સ્થાનિક ક્રિકેટથી અંતર જાળવી રાખવાને કારણે લેવામાં આવ્યો હતો. ઈશાન કિશન લાંબી રજા પર ગયો હતો, ત્યારબાદ તે સીધો IPL રમવા ગયો હતો. શ્રેયસ અય્યર મુંબઈ માટે રણજી ટ્રોફીની કેટલીક મેચોમાં રમતા જોવા મળ્યો હતો, જેમાં સેમીફાઈનલ અને ફાઈનલનો પણ સમાવેશ થાય છે.
હવે આ સમગ્ર મામલે BCCI સેક્રેટરી જય શાહે નિવેદન આપ્યું છે. મુંબઈમાં મીડિયા સાથે વાતચીત દરમિયાન તેમણે કહ્યું કે તમે ભારતીય ક્રિકેટનું બંધારણ ચકાસી શકો છો. હું માત્ર પસંદગી સમિતિનો કન્વીનર છું. આ મામલે જે પણ નિર્ણય લેવામાં આવ્યો છે તે ચીફ સિલેક્ટર અજીત અગરકરે લીધો છે.
તેમણે કહ્યું કે મારી ભૂમિકા માત્ર પસંદગી સમિતિના મંતવ્યો સ્વીકારવાની અને તેનો અમલ કરવાની છે. તેણે કહ્યું કે ટીમ ઈન્ડિયા માટે કોઈ ખેલાડી બહુ મહત્વનો નથી. જ્યારે ઈશાન અને અય્યર કોન્ટ્રાક્ટ લિસ્ટમાંથી બહાર થયા ત્યારે અમને સંજુ સેમસન મળ્યો. શાહે ફરી કહ્યું કે ભારતીય ખેલાડીઓએ સ્થાનિક ક્રિકેટને પ્રાથમિકતા આપવી પડશે.
જ્યારે BCCIની નવી કોન્ટ્રાક્ટ લિસ્ટ બહાર પડવાની હતી ત્યારે જય શાહે એવી વાતો પણ કરી હતી કે ખેલાડીઓને લઈને ચીફ સિલેક્ટરનો નિર્ણય આખરી હશે અને તેમને તેમનું સમર્થન રહેશે. શાહે કહ્યું કે, તેમણે ખેલાડીઓને કોન્ટ્રાક્ટ લિસ્ટમાંથી હટાવ્યા બાદ તેમની સાથે પણ વાત કરી હતી.
આ પણ વાંચો : ગૌતમ ગંભીરે શાહરૂખ ખાનનું નામ લઈને સંજીવ ગોએન્કા પર સાધ્યું નિશાન, કેએલ રાહુલનું કર્યું સમર્થન
Published On - 8:01 pm, Fri, 10 May 24