30 મેચ અને 30 મેદાન! જયસ્વાલે સ્ટેડિયમમાં પગ મૂકતાં જ રચ્યો ‘ઈતિહાસ’, સચિનના નકશેકદમ પર ચાલીને બનાવ્યો ‘અનોખો રેકોર્ડ’
શ્રીલંકા સામે ગાલે ટેસ્ટ મેચમાં મેદાન પર પગ મુકતાની સાથે જ ભારતીય યુવા ઓપનર યશસ્વી જયસ્વાલે એક એવો અનોખો અને અદ્ભુત રેકોર્ડ પોતાના નામે કરી લીધો છે કે, જે ક્રિકેટના ઇતિહાસમાં ખૂબ જ ઓછા બેટ્સમેનોના નામે દર્જ છે. ખાસ વાત એ છે કે, યશસ્વીએ સચિન તેંડુલકર જેવા મહાન દિગ્ગજોની એલિટ ક્લબમાં પોતાનું નામ નોંધાવી દીધું છે.
શ્રીલંકા સામે ગાલે ટેસ્ટના પ્રથમ દિવસે ભારતીય ખેલાડીઓએ જબરદસ્ત પ્રદર્શન કર્યું. ટૉસ જીતીને પહેલા બેટિંગ કરતા ભારતીય બેટ્સમેનોએ શ્રીલંકા સામે સંભાળીને રમતા ટીમને ખૂબ જ સારી શરૂઆત અપાવી. ધ્યાન દોરવા જેવું એ છે કે, ભારતીય યુવા ઓપનર યશસ્વી જયસ્વાલે ગાલેમાં શ્રીલંકા સામે મેદાન પર પગ મુકતાની સાથે જ એક અનોખો રેકોર્ડ પોતાના નામે કરી લીધો.
યશસ્વીએ એક એવો રેકોર્ડ બનાવ્યો કે, જે ટેસ્ટ ક્રિકેટના ઇતિહાસમાં ખૂબ જ ઓછા બેટ્સમેનોના નામે નોંધાયેલો છે. આ યશસ્વીના કરિયરની 30 મી ટેસ્ટ મેચ હતી અને રસપ્રદ વાત એ છે કે, તેણે પોતાની શરૂઆતની તમામ 30 ટેસ્ટ મેચ 30 અલગ-અલગ મેદાન પર રમી છે. સરળ રીતે જોઈએ તો, આજ સુધી જયસ્વાલને પોતાના ટેસ્ટ કરિયરમાં કોઈ પણ સ્ટેડિયમમાં ફરીથી રમવાની તક મળી નથી.
યશસ્વીની આ સફરની શરૂઆત જુલાઈ 2023 માં વેસ્ટ ઈન્ડિઝના રોસોથી થઈ હતી. ત્યારબાદ કેરેબિયન દ્વીપ, દક્ષિણ આફ્રિકા, ભારત, ઈંગ્લેન્ડ અને ઓસ્ટ્રેલિયાના અલગ-અલગ મેદાન પરથી પસાર થતાં તેનો આ અનોખો કાફલો હવે શ્રીલંકાના ગાલે સુધી પહોંચી ગયો છે.
અલગ-અલગ વેન્યુ પર કરિયરની શરૂઆત કરવાનો આ અનોખો ટ્રેન્ડ યશસ્વી પહેલા ભારતના બે પૂર્વ ખેલાડીઓ સાથે પણ જોવા મળ્યો હતો. પૂર્વ ભારતીય ખેલાડી સંજય માંજરેકરે પોતાની શરૂઆતની 33 ટેસ્ટ મેચ 33 અલગ-અલગ મેદાન પર રમી હતી. આ સિવાય સચિન તેંડુલકરે પણ પોતાની શરૂઆતની 32 ટેસ્ટ મેચ 32 અલગ-અલગ વેન્યુ પર રમી હતી.
હવે યશસ્વી જયસ્વાલ પણ આ ખાસ યાદીમાં ત્રીજા નંબરે આવી પહોંચ્યો છે. યશસ્વીએ પોતાના ટેસ્ટ કરિયરની શરૂઆત ખૂબ જ શાનદાર અંદાજમાં કરી છે. 30 ટેસ્ટ મેચની 55 ઇનિંગ્સમાં તેના નામે 48.43 ની શ્રેષ્ઠ સરેરાશથી 2,567 રન નોંધાયેલા છે. આ દરમિયાન તેણે 7 સદી અને 13 અડધી સદી ફટકારી છે, જેમાં અણનમ 214 રન તેનો સર્વશ્રેષ્ઠ સ્કોર રહ્યો છે.
