Breaking News: વિવાદમાં ફસાઈ ટાટાની આ કંપની! કરોડોની નોટિસ છતાં શેરના ભાવમાં તેજીનો કરંટ
શેરબજારમાં ટાટા ગ્રુપની એક દિગ્ગજ કંપનીને લઈને મિશ્ર પ્રતિસાદ જોવા મળી રહ્યો છે. એક તરફ આ કંપનીના તાજેતરના ત્રિમાસિક પરિણામોમાં નફો અને રેવન્યુમાં આઠ ગણો તોતિંગ ઉછાળો જોવા મળ્યો છે, તો બીજી તરફ 1,755 કરોડ રૂપિયાથી વધુની નોટિસ મળતા ચિંતાના વાદળો છવાયા છે.
ટાટા ગ્રુપની આ કંપનીએ શનિવારે શેરબજારને આપેલી માહિતીમાં જણાવ્યું હતું કે, કંપનીને ઝારખંડના રામગઢ સ્થિત ડિસ્ટ્રિક્ટ માઈનિંગ ઓફિસ (DMO) તરફથી 1,755 કરોડ રૂપિયાથી વધુની ડિમાન્ડ નોટિસ મળી છે. કંપનીએ જણાવ્યું કે, આ નોટિસ 30 માર્ચ 2026ની છે, જે કંપનીને 3 એપ્રિલ 2026ના રોજ મળી હતી. નોટિસમાં એવો આરોપ લગાવવામાં આવ્યો છે કે, કંપનીએ તેની વેસ્ટ બોકારો કોલિયરી (Colliery) માંથી નાણાકીય વર્ષ 2000-01 થી વર્ષ 2006-07 દરમિયાન નિર્ધારિત મર્યાદા કરતા આશરે 1.62 કરોડ મેટ્રિક ટન વધુ કોલસાનું ખનન કર્યું છે.
આ કાર્યવાહી 'કોમન કોઝ વિરુદ્ધ યુનિયન ઓફ ઈન્ડિયા' (Common Cause vs Union of India) ના કેસમાં સુપ્રીમ કોર્ટ દ્વારા નક્કી કરાયેલા આધારો પર કરવામાં આવી છે. આ વધારાના ઉત્પાદનને કારણે કંપની પાસે કુલ 1,755.10 કરોડ રૂપિયાની માંગ કરવામાં આવી છે. કંપની મેનેજમેન્ટનું માનવું છે કે, આ ડિમાન્ડ ઉચિત અને મજબૂત આધાર પર નથી. કંપનીએ સ્પષ્ટ કર્યું છે કે, તે આ નોટિસને પડકારશે.
ડિસેમ્બર 2025 માં પૂરા થયેલા ત્રિમાસિક ગાળામાં કંપનીનો નફો વધીને 2,689 કરોડ રૂપિયા પર પહોંચી ગયો છે, જે એક વર્ષ અગાઉના સમાન ગાળાના 327 કરોડ રૂપિયાના નફા કરતાં આઠ ગણાથી પણ વધુનો વધારો દર્શાવે છે. ઓક્ટોબર-ડિસેમ્બર ક્વાર્ટરમાં કંપનીની કામગીરીમાંથી થતી આવક (રેવન્યુ) ગયા વર્ષના સમાન ગાળાના 53,648 કરોડ રૂપિયાથી 6 ટકા વધીને 57,002 કરોડ રૂપિયા થઈ છે.
ગુરુવારે કંપનીનો શેર 0.57 ટકાના ઘટાડા સાથે 193.50 રૂપિયા પર બંધ થયો હતો. છેલ્લા એક વર્ષમાં કંપનીના શેરમાં 37.83 ટકાની તેજી જોવા મળી છે, જ્યારે છેલ્લા 5 વર્ષમાં ટાટા ગ્રુપની આ કંપનીના શેરે રોકાણકારોને 124 ટકાથી વધુનું વળતર આપ્યું છે.
લેટેસ્ટ ચાર્ટ વિશ્લેષણ મુજબ, 32 નિષ્ણાતોએ ટાટા સ્ટીલના શેર માટે આગામી એક વર્ષનો પોઝિટિવ ફોરકાસ્ટ રજૂ કર્યો છે, જેમાં શેરનો સરેરાશ ટાર્ગેટ ભાવ 213.09 INR અંકાયો છે. હાલમાં શેર વર્તમાન કિંમતથી અંદાજે 9.76% નો ઉછાળો સૂચવે છે. વિશ્લેષકોના મતે જો બજારમાં તેજી જળવાઈ રહેશે, તો શેર મહત્તમ 250.00 INR (+28.77%) સુધી પહોંચી શકે છે, જ્યારે નકારાત્મક સંજોગોમાં તે ઘટીને 160.00 INR (-17.59%) ના લઘુત્તમ સ્તર સુધી જઈ શકે છે.
