આ મોટી કંપનીએ ખોલી દીધો તિજોરીનો દરવાજો, રોકાણકારોને એક શેર પર મળશે ₹140નું ડિવિડન્ડ
ભારતની સૌથી મોટી કાર નિર્માતા (Car Manufacturer) કંપનીએ એક એવો નિર્ણય લીધો છે કે, જેનાથી શેરબજારમાં હલચલ મચી ગઈ છે. જો કે, આ વખતે કંપનીએ પોતાના શેરધારકોને એક મોટી ભેટ આપવાની જાહેરાત કરી છે.
મારુતિ સુઝુકીએ નાણાકીય વર્ષ 2025-26 માટે પોતાના શેરધારકોને મોટી ભેટ આપવાની જાહેરાત કરી છે. કંપનીના બોર્ડ ઓફ ડાયરેક્ટર્સે ₹5 ફેસ વેલ્યુ ધરાવતા દરેક ઇક્વિટી શેર પર ₹140 ના અંતિમ ડિવિડન્ડ (Final Dividend) ની ભલામણ કરી છે.
કંપનીના જણાવ્યા અનુસાર, આ ડિવિડન્ડ કુલ ₹44,016 મિલિયન નું થશે, જે ગયા નાણાકીય વર્ષના ₹135 પ્રતિ શેર (₹42,444 મિલિયન) ની સરખામણીએ વધુ છે. જો કે, આ પ્રસ્તાવ આગામી વાર્ષિક સામાન્ય સભા (AGM) માં શેરધારકોની મંજૂરીને આધીન રહેશે.
કંપનીએ જણાવ્યું કે, ડિવિડન્ડ માટેની રેકોર્ડ ડેટ 7 ઓગસ્ટ 2026 નક્કી કરવામાં આવી છે. ટૂંકમાં, આ તારીખ સુધીમાં જે રોકાણકારોના નામ કંપનીના રેકોર્ડમાં હશે, તેઓ જ ડિવિડન્ડ મેળવવા માટે પાત્ર ગણાશે.
ડિવિડન્ડની ચુકવણી 9 સપ્ટેમ્બર 2026 ના રોજ કરવામાં આવશે, જ્યારે કંપનીની AGM 31 ઓગસ્ટ 2026 ના રોજ યોજાશે. આ જાહેરાત કંપનીના મજબૂત નાણાકીય પ્રદર્શન અને શેરધારકોને વધુ સારું વળતર આપવાની પ્રતિબદ્ધતા દર્શાવે છે.
આ પહેલા કંપનીએ પ્રતિ શેર 1 ઓગસ્ટ 2025 ના રોજ 135 રૂપિયા, 2 ઓગસ્ટ 2024 ના રોજ 125 રૂપિયા, 3 ઓગસ્ટ 2023 ના રોજ ફાઈનલ ડિવિડન્ડ તરીકે 90 રૂપિયા અને 3 ઓગસ્ટ 2022 ના રોજ 60 રૂપિયા આપવાની જાહેરાત કરી હતી.
