RCB Playoff Chance : RCBની પ્લેઓફની રાહ મુશ્કેલ બની, LSG સામેની હાર બાદ બદલાયું ગણિત
7મી મે 2026ના દિવસે, લખનૌ સુપર જાયન્ટ્સ સામે 9 રનથી મળેલા હારથી RCBની પ્લેઓફ માટેની રેસ થોડી મુશ્કેલ બની છે. પરંતુ ટીમ હજુ પણ મજબૂત સ્થિતિમાં છે. 10 મેચમાંથી 12 પોઈન્ટ અને સારા નેટ રન રેટ સાથે બેંગલુરુ ત્રીજા સ્થાને છે.
લખનૌમાં રમાયેલી મેચમાં મિશેલ માર્શે 111 રનની ઇનિંગ રમી. જેના કારણે LSGએ 20 ઓવરમાં 209/3નો મોટો સ્કોર બનાવ્યો હતો. જવાબમાં RCBની શરૂઆત નબળી રહી. મોહમ્મદ શમી અને પ્રિન્સ યાદવે શરૂઆતમાં જ વિરાટ કોહલી અને જેકબ બેથેલને પેવેલિયન મોકલી દીધા હતા.
ત્યારબાદ કેપ્ટન રજત પાટીદારે ઝડપી 61 રન બનાવીને મેચને પુનર્જીવિત કરી. જ્યારે ટિમ ડેવિડે અંત સુધી લડત આપી હતી. જોકે બેંગલુરુ 20 ઓવરમાં ફક્ત 203/6 સુધી પહોંચી શકી અને 9 રને હારી ગઈ.
RCBની હાર છતાં સ્થિતિ મજબૂત રહી. ટીમ 10 મેચમાં 6 જીત અને 12 પોઈન્ટ સાથે પોઈન્ટ ટેબલમાં ત્રીજા સ્થાને છે. સૌથી મોટી રાહત તેમનો પ્રભાવશાળી નેટ રન રેટ (+1.234) છે. જે અન્ય ટીમો કરતા નોંધપાત્ર રીતે સારો છે.
હાલમાં RCB પાસે12 પોઇન્ટ છે અને હજુ 4 મેચ બાકી છે. જો ટીમ માત્ર 1 મેચ જીતે તો તે 14 પોઇન્ટ સુધી પહોંચશે અને પછી નેટ રન રેટ મહત્વપૂર્ણ બનશે.
2 જીત સાથે RCB 16 પોઇન્ટ સુધી પહોંચી જશે અને પ્લેઓફનો રસ્તો લગભગ નક્કી થઈ શકે છે.
જો RCB ટીમ 3 અથવા તમામ 4 મેચ જીતી જાય તો ટોપ-2માં સ્થાન મેળવવાની પણ મજબૂત શક્યતા રહેશે. પરંતુ જો બાકીની ચારેય મેચ હારી જાય તો 12 પોઇન્ટ સાથે ટીમ બાહર થઈ જશે.
રોયલ ચેલેન્જર્સ બેંગલુરુ માટે હવે દરેક મેચ કરો અથવા મરો જેવી સ્થિતિ બની ગઈ છે. ટીમના આગામી મુકાબલા 10મી મેના રોજ મુંબઈ ઇન્ડિયન્સ સામે છે ત્યારબાદ 13 મે ના દિવસે કોલકાતા નાઇટ રાઇડર્સ, 17 મે ના દિવસે પંજાબ કિંગ્સ અને લાસ્ટ મેચ 22 મે ના દિવસે સનરાઇઝર્સ હૈદરાબાદ સામે રમાશે.
