Breaking News : PhonePe ના IPO ને ઈરાન યુદ્ધનો માર, કંપનીએ ટાળી પ્રક્રિયા, જાણો ક્યારે મળશે કમાવાનો મોકો ?
ઈરાન-ઇઝરાયલ તણાવને કારણે વૈશ્વિક બજારોમાં વધતી અનિશ્ચિતતા અને અસ્થિરતાને લીધે ડિજિટલ પેમેન્ટ કંપની ફોનપેએ પોતાનો IPO મુલતવી રાખ્યો છે. કંપનીએ જણાવ્યું કે વૈશ્વિક પરિસ્થિતિ સુધર્યા બાદ ફરીથી લિસ્ટિંગ પ્રક્રિયા શરૂ કરાશે.
ઈરાન-ઇઝરાયલ/યુએસ વચ્ચે ચાલી રહેલા યુદ્ધના કારણે વૈશ્વિક બજારોમાં અનિશ્ચિતતા વધી છે. તેની સીધી અસર હવે ડિજિટલ પેમેન્ટ કંપની ફોનપેના IPO પર પણ જોવા મળી છે. કંપનીએ પોતાની જાહેર બજારમાં પ્રવેશવાની પ્રક્રિયા અસ્થાયી રીતે મુલતવી રાખવાની જાહેરાત કરી છે. કંપનીનું કહેવું છે કે વૈશ્વિક બજારની સ્થિતિ સામાન્ય થયા પછી IPO ફરી શરૂ કરવામાં આવશે.
ફોનપેએ સોમવારે જણાવ્યું હતું કે હાલની વૈશ્વિક આર્થિક અનિશ્ચિતતા અને બજારમાં વધતી અસ્થિરતાને ધ્યાનમાં રાખીને IPO પ્રક્રિયા થોડા સમય માટે સ્થગિત કરવામાં આવી છે. કંપનીએ સ્પષ્ટ કર્યું છે કે પરિસ્થિતિ સુધરતા જ તે જાહેર સૂચિ પ્રક્રિયાને ફરી શરૂ કરશે.
ફોનપેના CEO સમીર નિગમે જણાવ્યું કે કંપની ભારતમાં જાહેર સૂચિ માટે પ્રતિબદ્ધ છે. તેમણે કહ્યું કે અમે યુદ્ધથી અસરગ્રસ્ત વિસ્તારોમાં વહેલી તકે શાંતિ સ્થાપિત થાય તેવી આશા રાખીએ છીએ. હાલમાં વૈશ્વિક તણાવના કારણે શેરબજારમાં ઉથલપાથલ જોવા મળી રહી છે. ગયા અઠવાડિયે બજારમાં સતત ત્રણ સત્રોમાં નોંધપાત્ર ઘટાડો નોંધાયો હતો, જ્યારે સોમવારે પણ બજારમાં ભારે વધઘટ જોવા મળી હતી.
ફોનપે હાલમાં ભારતના સૌથી મોટા ડિજિટલ પેમેન્ટ પ્લેટફોર્મ્સમાંથી એક છે. 30 સપ્ટેમ્બર 2025 સુધીમાં કંપની પાસે 650 મિલિયનથી વધુ નોંધાયેલા વપરાશકર્તાઓ છે. કંપનીનું ડિજિટલ પેમેન્ટ નેટવર્ક 47 મિલિયનથી વધુ વેપારીઓ સુધી વિસ્તરેલું છે. આ વર્ષે જાન્યુઆરીમાં ફોનપે પેમેન્ટ ગેટવે દ્વારા PhonePe PG Bolt સેવા શરૂ કરવાની જાહેરાત કરવામાં આવી હતી, જે વિઝા અને માસ્ટરકાર્ડ ક્રેડિટ તેમજ ડેબિટ કાર્ડ ટ્રાન્ઝેક્શનને વધુ ઝડપી બનાવે છે.
આ વચ્ચે IPO માર્કેટમાં પણ હલચલ ચાલુ છે. પ્રાઈમ ડેટાબેઝ મુજબ હાલમાં 141 કંપનીઓને IPO માટે નિયમનકારી મંજૂરી મળી છે. આ મંજૂરી એક વર્ષ માટે માન્ય હોય છે અને આ કંપનીઓ IPO દ્વારા મળીને અંદાજે ₹1.64 લાખ કરોડ સુધીનું મૂડી એકત્ર કરી શકે છે. તેમાંમાંથી ઓછામાં ઓછી 80 કંપનીઓ પાસે હજુ પણ આગામી 3 થી 9 મહિનાનો સમય IPO લોન્ચ કરવા માટે ઉપલબ્ધ છે.
આ અઠવાડિયે પણ બજારમાં ત્રણ IPO ખુલવાના છે. તેમાં બે મેઈનબોર્ડ IPO અને એક SME સેગમેન્ટ IPOનો સમાવેશ થાય છે. મેઈનબોર્ડ સેગમેન્ટમાં GSP Crop Science અને Central Mine Planning પોતાના IPO લોન્ચ કરશે, જ્યારે Novus Loyalty Limited SME સેગમેન્ટમાં બજારમાં પ્રવેશ કરશે.(નોંધ : અહીં આપવામાં આવેલી માહિતી ફક્ત આપની જાણકારી માટે છે. કોઈ પણ રોકાણ કરવા પહેલા નિષ્ણાંતોની સલાહ લેવી જરૂરી છે.)
