RCB vs KKR : એક જીત અને પ્લેઓફમાં વિરાટની ટીમ? કેકેઆર માટે કરો અથવા મરો જેવી મેચ!
IPL 2026ની પ્લેઓફ નજીક આવી રહી છે. મુંબઈ ઇન્ડિયન્સ અને લખનૌ સુપર જાયન્ટ્સની ટીમ IPL 2026 પ્લેઓફની રેસમાંથી બહાર થઈ છે. આઠ ટીમો હવે ટોચના ચારમાં સ્થાન મેળવવા માટે સ્પર્ધા કરી રહી છે.
IPLનો 57મો મુકાબલો આજે 13 મેના રોજ RCB અને KKR વચ્ચે રમાશે. જો RCB આજે આ મેચ જીતી જાય, તો પ્લેઓફમાં તેનું સ્થાન લગભગ સુરક્ષિત થઈ જશે. બીજી તરફ KKR માટે આ મેચ કરો અથવા મરો જેવી છે. જો KKR આજે હારી જાય, તો તે પ્લેઓફની રેસમાંથી બહાર થઈ જશે.
બંને ટીમો વચ્ચેનો આ મુકાબલો રાયપુરના શહીદ વીર નારાયણ સિંહ ઇન્ટરનેશનલ સ્ટેડિયમ ખાતે રમાશે. આ હાઇ-વોલ્ટેજ મેચ સાંજે 7:30 વાગ્યે શરૂ થશે.
RCB એ IPLમાં અત્યાર સુધી રમાયેલી 11 મેચમાંથી સાત જીતી છે અને ચાર હારી છે. KKR એ અત્યાર સુધી રમાયેલી 10 મેચમાંથી ચાર જીતી છે અને પાંચ હારી છે.
રોયલ ચેલેન્જર્સ બેંગ્લોર હાલમાં ઉત્તમ ફોર્મમાં છે અને મુંબઈ ઇન્ડિયન્સને છેલ્લા બોલ પર બે વિકેટથી હરાવીને સતત બે હાર બાદ શાનદાર વાપસી કરી છે. હવે, બેંગ્લોર તેમની આગામી મેચ જીતીને પ્લેઓફમાં પોતાનું સ્થાન સુરક્ષિત કરવાનો પ્રયાસ કરશે.
કોલકાતા નાઈટ રાઇડર્સે 10 માંથી ચાર મેચ જીતી છે અને પોઈન્ટ ટેબલમાં આઠમા ક્રમે છે. ખરાબ શરૂઆત પછી ત્રણ વખતની ચેમ્પિયન ટીમે સતત ચાર મેચ જીતીને શાનદાર વાપસી કરી છે.
રોયલ ચેલેન્જર્સ બેંગ્લોર અને કોલકાતા નાઈટ રાઇડર્સ વચ્ચે અત્યાર સુધીમાં કુલ 36 મેચ રમાઈ છે. કોલકાતા નાઈટ રાઇડર્સે આમાંથી 20 મેચ જીતી છે, જ્યારે રોયલ ચેલેન્જર્સ બેંગ્લોરે 15 જીતી છે. એક મેચનો નિકાલ આવ્યો નહોતો કેમ કે 17મી મે, 2025 ના રોજ સતત વરસાદને કારણે RCB અને KKR વચ્ચેની મેચ રદ કરવામાં આવી હતી.
