Nifty ના આવશે અચ્છે દિન! ભારતીય શેરબજાર માટે અમેરિકી બેંકની ‘મોટી આગાહી’, રોકાણકારો તેજી માટે થઈ જાય ‘તૈયાર’
અમેરિકી બેંકે ભારતીય શેરબજાર પર પોતાનું વલણ બદલીને સકારાત્મક દ્રષ્ટિકોણ અપનાવ્યો છે. રિપોર્ટ મુજબ, ડિસેમ્બર 2026 સુધીમાં નિફ્ટી 26,200 ના સ્તર સુધી પહોંચી શકે છે, જે વર્તમાન સ્તરથી લગભગ 12% ની તેજી દર્શાવે છે. અગાઉ દર્શાવેલા 8 માંથી 5 મોટા જોખમ ઓછા થતાં અને ક્રૂડ ઓઈલ તેમજ રૂપિયો સ્થિર થતાં બજારમાં આ સુધારાની અપેક્ષા રાખવામાં આવી છે.
ભારતીય શેરબજારને લઈને બેંક ઓફ અમેરિકા (BofA) સિક્યોરિટીઝનું વલણ હવે બદલાઈ ગયું છે. લગભગ બે વર્ષ સુધી ભારતીય ઈક્વિટી માર્કેટ પર સાવચેત રહ્યા પછી BofA સિક્યોરિટીઝ હવે બજારને લઈને બુલિશ (સકારાત્મક) થઈ ગયું છે. બ્રોકરેજે ડિસેમ્બર 2026 સુધી નિફ્ટી (Nifty) 26,200 સુધી પહોંચવાનો અંદાજ આપ્યો છે. હાલના સ્તરની સરખામણીએ આ લગભગ 12% ની સંભવિત તેજીનો સંકેત છે. હવે સવાલ એ છે કે, આખરે BofA ને ભારતીય બજારમાં આટલી તેજી કેમ દેખાઈ રહી છે?
BofA એ ઓગસ્ટ 2024 થી ભારતીય શેરોને લઈને સાવચેતી વર્તી હતી. તે સમયે બ્રોકરેજે બજાર માટે 8 મોટા જોખમો દર્શાવ્યા હતા. હવે આમાંથી 5 જોખમો કાં તો સામે આવી ચૂક્યા છે અથવા તો મોટાભાગે બજારની કિંમતોમાં સમાવિષ્ટ (પ્રાઈસ ઇન) થઈ ગયા છે. આ જ કારણ છે કે, BofA એ પોતાનું વલણ બદલીને ભારતીય શેરબજાર પર સકારાત્મક દ્રષ્ટિકોણ અપનાવ્યો છે.
જો કે, BofA સંપૂર્ણપણે બેફિકર નથી. તેના જણાવ્યા મુજબ હજુ પણ ત્રણ મુખ્ય જોખમો બાકી છે, જે વેચવાલીની સ્થિતિમાં (Bear Case) નિફ્ટીને લગભગ 7% નીચે લઈ જઈ શકે છે. બ્રોકરેજનું માનવું છે કે, આ જોખમોની અસર ઓક્ટોબર 2026 સુધીમાં તેની ટોચ પર (પીક) પહોંચી શકે છે. ત્યારબાદ નવેમ્બરથી બજારમાં વધુ સારી રિકવરીની તકો બની શકે છે.
ક્રૂડ ઓઈલની કિંમતોમાં તીવ્ર ઉછાળો ભારતીય બજાર માટે એક મોટું જોખમ હતો. BofA એ પહેલા પ્રતિ બેરલ $100 થી ઉપરના ક્રૂડને જોખમ માન્યું હતું. તેનું કહેવું છે કે, છેલ્લા સાત મહિનામાં ક્રૂડ સાત વખત $100 ના સ્તરથી પાછું નીચે આવ્યું છે. ચોથા ત્રિમાસિક 2026 માટે BofA નું ક્રૂડ ઓઈલને લઈને અનુમાન $81 પ્રતિ બેરલનું છે.
આ સિવાય રૂપિયાને લઈને પણ BofA નું વલણ સકારાત્મક છે. બ્રોકરેજના જણાવ્યા અનુસાર, તાજેતરમાં લગભગ $136 અબજના ઈનફ્લોએ રૂપિયાને સપોર્ટ આપ્યો છે અને હવે કરન્સીમાં મજબૂતીનો ટ્રેન્ડ બનેલો છે.
નબળું ચોમાસું પણ પહેલા BofA ની ચિંતામાં જોડાયેલ હતું. હાલમાં વરસાદની ઘટ 13% છે, જે તેના 15% ના અંદાજની નજીક છે. આ સિવાય RBI પાસે BofA ને આશા છે કે, ડિસેમ્બર 2026 સુધીમાં વ્યાજદરમાં 25 બેસિસ પોઈન્ટનો વધારો જોવા મળી શકે છે.
જો કે, બજાર આ સમયે લગભગ 45 બેસિસ પોઈન્ટના વધારાને ધ્યાનમાં રાખીને ચાલી રહ્યું છે. ટૂંકમાં, જો વાસ્તવિક રેટ હાઈક અપેક્ષા કરતાં ઓછી રહે છે, તો તે બજાર માટે સકારાત્મક બની શકે છે.
BofA એ પ્રાઈમરી માર્કેટ (IPO) માં ભારે ફંડ-રેઝિંગ, યુએસ ફેડ દ્વારા સંભવિત 75 બેસિસ પોઈન્ટનો વધારો અને લાંબાગાળે AI ના કારણે નોકરીઓ પરના સંકટને મુખ્ય જોખમો ગણાવ્યા છે. સપ્ટેમ્બરથી ડિસેમ્બર વચ્ચે લગભગ $30 અબજના IPO પણ બજાર પર દબાણ લાવી શકે છે.
હાલમાં BofA નો સંદેશ સ્પષ્ટ છે કે, ઘણા જૂના જોખમો પાછળ છૂટી ગયા છે, ઓક્ટોબર સુધી બાકીનું દબાણ પણ પીક પર પહોંચી શકે છે અને ત્યારબાદ ભારતીય બજારમાં રિકવરી મજબૂત થઈ શકે છે. આ જ આશા પર બ્રોકરેજે નિફ્ટી માટે ડિસેમ્બર સુધી 26,200 નો ટાર્ગેટ આપ્યો છે.
