India’s largest IPO : દેશનો સૌથી મોટો Jio નો IPO આ કારણે અટકી શકે છે, જાણો આવું કેમ ?
Jio Platforms Limited નો બહુપ્રતિક્ષિત IPO સરકારી નિયમોમાં વિલંબને કારણે મુલતવી રહ્યો છે. SEBI ના નવા લિસ્ટિંગ નિયમોને સરકારની અંતિમ મંજૂરી મળવામાં વિલંબ થઈ રહ્યો છે.
મુકેશ અંબાણીની ડિજિટલ કંપની Jio Platforms Limited નો બહુપ્રતિક્ષિત IPO સરકારી નિયમોમાં વિલંબને કારણે મુલતવી રહી શકે છે. બ્લૂમબર્ગના અહેવાલ અનુસાર, લિસ્ટિંગ સંબંધિત નવા નિયમોને લઈને સરકાર તરફથી અંતિમ મંજૂરીમાં વિલંબ થઈ રહ્યો છે, જેના કારણે કંપનીની IPO સમયરેખા પર અસર પડી શકે છે. અંદાજે $170 બિલિયનના સંભવિત મૂલ્યાંકન સાથે, Jioનો IPO ભારતનો અત્યાર સુધીનો સૌથી મોટો IPO બની શકે છે.
બ્લૂમબર્ગના અહેવાલ મુજબ, સરકાર લિસ્ટિંગ નિયમોમાં ફેરફારોને લઈને ઔપચારિક મંજૂરી આપવામાં મોડું કરી રહી છે. તેના કારણે Jio Platforms Limited નો IPO આગળ ધકેલાઈ શકે છે. મુકેશ અંબાણી અગાઉ સંકેત આપી ચૂક્યા છે કે Jioનો IPO 2026ના પહેલા ભાગમાં લોન્ચ થઈ શકે છે, પરંતુ હવે નિયમનકારી પ્રક્રિયા પૂર્ણ થયા પછી જ તેની આગળની કાર્યવાહી શક્ય બનશે.
હાલમાં Jio ની પેરેન્ટ કંપની Reliance Industries Limited સરકારની સૂચનાની રાહ જોઈ રહી છે. આ મંજૂરી મળ્યા બાદ જ કંપની IPO માટે બેંકરોની નિમણૂક કરશે અને Draft Red Herring Prospectus (DRHP) ફાઇલ કરશે. અહેવાલ અનુસાર, કંપની સરકારની મંજૂરી મળતા જ એપ્રિલ પહેલા DRHP ફાઇલ કરવાની યોજના બનાવી રહી છે. Jio ઘણા વર્ષોથી IPO માટે તૈયારી કરી રહી છે અને બજારમાં તેની એન્ટ્રીને લઈને રોકાણકારોમાં પણ ભારે ઉત્સાહ જોવા મળી રહ્યો છે.
Jio Platforms રિલાયન્સ ગ્રુપની સૌથી મહત્વપૂર્ણ કંપનીઓમાંની એક છે અને તે ભારતની સૌથી મોટી મોબાઇલ સેવા પ્રદાતાઓમાં સ્થાન ધરાવે છે. રોકાણ બેન્કરોના અંદાજ પ્રમાણે, કંપનીનું મૂલ્યાંકન લગભગ $170 બિલિયન સુધી પહોંચી શકે છે. જો આ IPO સફળતાપૂર્વક આવે છે, તો તે ભારતના ઈતિહાસમાં સૌથી મોટો IPO બની શકે છે અને કંપની આશરે $4.3 બિલિયન જેટલી મૂડી એકત્ર કરી શકે છે.
આ વિલંબ પાછળનો મુખ્ય મુદ્દો નિયમોમાં ફેરફારનો છે. Securities and Exchange Board of India (SEBI) એ સપ્ટેમ્બરમાં IPO સંબંધિત નિયમોમાં ફેરફારને મંજૂરી આપી હતી. નવા નિયમો મુજબ, ₹5 લાખ કરોડથી વધુ પોસ્ટ-ઇશ્યૂ માર્કેટ કેપ ધરાવતી કંપનીઓ IPO દરમિયાન ઓછામાં ઓછા 5% ના બદલે 2.5% હિસ્સો વેચી શકે છે. જોકે, આ નિયમો અમલમાં મૂકવા માટે સરકારની અંતિમ મંજૂરી હજુ બાકી છે.
બજાર નિષ્ણાતોનું માનવું છે કે Jio જેવા મોટા IPO ભારતીય શેરબજારમાં નવી ઉર્જા લાવી શકે છે. આવા મેગા ઈશ્યુ રોકાણકારો માટે મોટા રોકાણના અવસર ઉભા કરે છે અને બજારમાં નવી મૂડીનો પ્રવાહ વધારવામાં મદદરૂપ બને છે.
નોંધ : અહીં આપવામાં આવેલી માહિતી ફક્ત આપની જાણકારી માટે છે. કોઈ પણ રોકણ કરવા પહેલા નિષ્ણાંતોની સલાહ લેવી જરૂરી છે.
Published On - 3:57 pm, Fri, 6 March 26
