જે ધાર્યું હતું તે જ થયું… Jioના IPOએ લોન્ચ પહેલા જ માર્કેટ ગરમ કર્યું; પ્રાઇસ બેન્ડથી લઈને બધું જ, જાણો અંદરની વાત
Jio એ તેના IPO માટે ડ્રાફ્ટ પેપર્સ સબમિટ કરી દીધા છે અને લોન્ચ પહેલા જ આખા શેરબજારમાં ભારે ઉત્સાહ જોવા મળી રહ્યો છે. જો તમે પણ રિલાયન્સના રોકાણકાર છો, તો પ્રાઇસ બેન્ડથી લઈને વેલ્યુએશન સુધીની આ અંદરની વાત તમારા માટે જાણવી ખૂબ જ જરૂરી છે.
દેશની સૌથી મોટી કંપનીઓમાંથી એક રિલાયન્સ ઇન્ડસ્ટ્રીઝ લિમિટેડ (RIL) ની ડિજિટલ વિંગ 'જીઓ પ્લેટફોર્મ્સ લિમિટેડ' (Jio Platforms Limited) ના IPOને લઈને બજારમાં ગરમાવો આવી ગયો છે. કંપની દ્વારા દાખલ કરવામાં આવેલા ડ્રાફ્ટ રેડ હેરિંગ પ્રોસ્પેક્ટસ (DRHP) માંથી કેટલીક મહત્વની વિગતો સામે આવી છે.
રિલાયન્સના શેરધારકો વચ્ચે હાલ સૌથી મોટો સવાલ એ છે કે, તેમને રિલાયન્સના એક શેર સામે જીઓના કેટલા શેર મળશે? અહીં સ્પષ્ટ કરી દઈએ કે, આ કોઈ ડીમર્જર, બોનસ કે શેર સ્વાઈપ નથી પરંતુ એક સંપૂર્ણપણે 'ફ્રેશ આઈપીઓ' (Fresh IPO) છે. આથી રિલાયન્સના રોકાણકારોને કોઈ ફિક્સ રેશિયો (Fixed Ratio) માં શેર આપવામાં આવશે નહીં. જો કે, IPOમાં રિલાયન્સના શેરધારકો માટે એક અનામત શ્રેણી (Reserved Category) ચોક્કસ હશે પરંતુ તેમાં પણ શેરોની ફાળવણી કોઈ ફિક્સ રેશિયોના બદલે એલોટમેન્ટ (Allotment) ના નિયમોના આધારે જ નક્કી થશે.
કંપની આ IPO દ્વારા 27,00,00,000 (27 કરોડ) નવા ઇક્વિટી શેર બહાર પાડવાની છે. આમાં કોઈ 'ઓફર ફોર સેલ' (OFS) નથી, એટલે કે પ્રમોટર્સ પોતાના શેર વેચી રહ્યા નથી. આ ઈશ્યૂમાં કંપનીના યોગ્ય કર્મચારીઓ (Eligible Employees) અને રિલાયન્સ (RIL) ના શેરહોલ્ડર્સ માટે પણ અમુક હિસ્સો અનામત રાખવામાં આવ્યો છે. શેરની ફેસ વેલ્યુ ₹10 પ્રતિ ઇક્વિટી શેર છે.
દેશ-વિદેશની મોટી ઇન્વેસ્ટમેન્ટ બેંકો આ IPO ને મેનેજ કરી રહી છે, જેમાં Kotak Mahindra Capital, Morgan Stanley, BofA Securities, Axis Capital, BNP Paribas, Citigroup, Goldman Sachs, HDFC Bank, ICICI Securities, JM Financial વગેરેનો સમાવેશ થાય છે.
કંપનીનો બિઝનેસ મુખ્યત્વે ડિજિટલ સર્વિસિસ, પ્લેટફોર્મ અને સોફ્ટવેર સાથે જોડાયેલો છે. આ IPO માંથી જે રકમ (Net Proceeds) મળશે, તેનો ઉપયોગ કંપની વિકાસ અને કેપિટલ એક્સપેન્ડિચર (Capital Expenditure) ના ખર્ચને પહોંચી વળવા તેમજ તેની પેટાકંપનીઓ (Subsidiaries) ના સામાન્ય કોર્પોરેટ હેતુઓ (General Corporate Purposes) માટે કરશે.
આ ડ્રાફ્ટમાં અત્યારે પ્રાઈસ બેન્ડ (Price Band) ની જાહેરાત કરવામાં આવી નથી પરંતુ બજારના નિષ્ણાતો અને અંદાજો અનુસાર, કંપની આ આઈપીઓ દ્વારા અંદાજે ₹36,000 કરોડ એકત્રિત કરવાની યોજના બનાવી રહી છે. જો ₹36,000 કરોડને 27 કરોડ શેર વડે ભાગવામાં આવે, તો તેની અંદાજિત કિંમત આશરે ₹1,333 પ્રતિ શેર નીકળે છે. આ આધારે બજારમાં સંભવિત પ્રાઈસ બેન્ડ ₹1,250 થી ₹1,400 ની વચ્ચે રહેવાનું અનુમાન લગાવવામાં આવી રહ્યું છે.
આ IPO પછી રિલાયન્સ ઇન્ડસ્ટ્રીઝની જીઓમાં ભાગીદારી હાલના 91% થી ઘટીને આશરે 88% ની આસપાસ આવી શકે છે. રિટેલ રોકાણકારો (Retail Investors) માટે આ રોકાણ એટલા માટે પણ આકર્ષક માનવામાં આવી રહ્યું છે. આમાં જીઓ ટેલિકોમ, જીઓફાઈબર, જીઓએરફાઈબર, જીઓસિનેમા, જીઓમાર્ટ અને એઆઈ/ડેટા સેન્ટર જેવા ઘણા મોટા અને સફળ બિઝનેસ એક જ સંયુક્ત પ્લેટફોર્મ હેઠળ જોડાયેલ છે, જેના કારણે બજારમાં તેની ઇન્સ્ટિટ્યુશનલ ડિમાન્ડ (Institutional Demand) ખૂબ જ મજબૂત રહેવાની પૂરેપૂરી શક્યતા છે.
