Loksabha Election 2024 : બારડોલી બેઠક પરથી કોંગ્રેસે સિદ્ધાર્થ ચૌધરીને ઉતાર્યા મેદાનમાં, જાણો કોણ છે આ ઉમેદવાર
લોકસભાની ચૂંટણીને લઈને રાજકીય પાર્ટીઓએ ઉમેદવારોના નામની યાદી જાહેર કરી દીધી છે. જેમાં કોંગ્રેસ દ્વારા બીજી યાદી જાહેર કરવામાં આવી છે. આ યાદીમાં કુલ 43 ઉમેદવારના નામ જાહેર કર્યા હતા. જેમાંથી ગુજરાતની 26 બેઠક માંથી 7 ઉમેદવારોના નામની જાહેરાત કરી હતી. ત્યારે બારડોલી લોકસભા બેઠક પર કોંગ્રેસ દ્વારા સિદ્ધાર્થ અમરસિંહ ચૌધરીને ટિકિટ આપી છે. ભાજપના ઉમેદવાર પ્રભુ વસાવાનું નામ જાહેર કર્યુ છે.
કોંગ્રેસે બોરડોલી બેઠક પરથી સિદ્ધાર્થ ચૌધરી માજી સાંસદ અને ધારાસભ્ય અમરસિંહ ચૌધરીના પુત્ર છે. સિદ્ધાર્થ ચૌધરીએ રાજકીય અને સામાજીક ક્ષેત્રની કારકિર્દી શું છે તે જાણીશું.
કોણ છે સિદ્ધાર્થ ચૌધરી : સિદ્ધાર્થ ચૌધરીનો જન્મ 21 જાન્યુઆરી 1977ના રોજ થયો હતો. તેમના પિતાનું નામ અમરસિંહ ચૌધરી છે. અમરસિંહ ચૌધરી વર્ષોથી રાજકારણ સાથે જોડાયેલા છે.
સિદ્ધાર્થ ચૌધરી તાપી જિલ્લામાંથી આવે છે. તેઓ 2010-2015માં તાપી જિલ્લા પંચાયતના કારોબારી સભ્ય પણ રહી ચૂક્યા છે. સિદ્ધાર્થ ચૌધરી વ્યારા તાલુકા પંચાયત 2015-2018 ના સ્ટેન્ડિંગ કમિટી ચેરમેન રહી ચૂક્યા છે.
સિદ્ધાર્થ ચૌધરી ગુજરાત પ્રદેશ યુવા કોંગ્રેસના મહામંત્રી તેમજ 2005 - 2009માં સુરત જિલ્લા યુથ કોંગ્રેસમાં ઉપપ્રમુખ રહી ચુક્યા છે.
આ ઉપરાંત સિદ્ધાર્થ ચૌધરી ઓગસ્ટ 2020થી સુમુલ ડેરીના ડિરેક્ટર તરીકે કાર્યરત છે. તેઓ પ્રજાના અનેક પ્રશ્નોને લઈ વિવિધ સંગઠનો સાથે પણ જોડાયેલા છે.
Published On - 12:33 pm, Fri, 15 March 24