Breaking News : રૂપિયો પહેલીવાર પહોંચ્યો 96ને પાર, શેરબજારમાં ફરી નબળાઈ, સેન્સેક્સ 161 પોઈન્ટ તૂટ્યો
આજે ભારતીય શેરબજારમાં ઘટાડો નોંધાયો, જ્યારે રૂપિયો ડોલર સામે ઇતિહાસમાં પહેલીવાર 96ના સ્તરથી નીચે સરકીને રેકોર્ડ સ્તરે પહોંચ્યો. વૈશ્વિક બજારોની નબળાઈ, ક્રૂડ ઓઇલના વધતા ભાવ અને વેચવાલીના દબાણને કારણે સેન્સેક્સ અને નિફ્ટી લાલ નિશાનમાં બંધ થયા.
સતત બે દિવસ સુધી તેજી જોવા મળ્યા બાદ આજે ભારતીય શેરબજારમાં ફરી ઘટાડો નોંધાયો. દિવસની શરૂઆત સકારાત્મક રહી હતી, પરંતુ ટ્રેડિંગના છેલ્લા કલાક દરમિયાન બજાર પર વેચવાલીનો દબાણ વધી જતા મુખ્ય સૂચકાંકો ઘટાડા સાથે બંધ થયા. આ વચ્ચે ડોલર સામે રૂપિયો પણ ઇતિહાસમાં પહેલીવાર 96ના સ્તરથી નીચે સરકી ગયો, જે રોકાણકારોમાં ચિંતા વધારનાર સંકેત માનવામાં આવી રહ્યો છે.
વૈશ્વિક બજારોમાં નબળાઈ, ક્રૂડ ઓઇલના વધતા ભાવ અને રૂપિયામાં સતત ઘટાડાની અસર સ્થાનિક બજારમાં સ્પષ્ટ જોવા મળી. BSE સેન્સેક્સ 160.73 પોઈન્ટ અથવા 0.21 ટકાના ઘટાડા સાથે 75,237.99 પર બંધ રહ્યો. જ્યારે NSE નિફ્ટી 46.10 પોઈન્ટ અથવા 0.19 ટકા ઘટીને 23,643.50ના સ્તરે બંધ થયો.
કરન્સી માર્કેટમાં પણ દબાણ યથાવત રહ્યું. ટ્રેડિંગ દરમિયાન ડોલર સામે રૂપિયો 50 પૈસા ઘટીને 96.14 સુધી પહોંચી ગયો, જે અત્યાર સુધીનું સૌથી નીચું સ્તર ગણાય છે. જોકે દિવસના અંતે રૂપિયા થોડો સંભળી 95.96 પર બંધ થયો, છતાં તેમાં 0.2 ટકાનો ઘટાડો નોંધાયો.
સેન્સેક્સના 30 શેરોમાંથી 16 શેર લાલ નિશાનમાં બંધ થયા. ટાટા સ્ટીલમાં સૌથી વધુ 1.97 ટકાનો ઘટાડો નોંધાયો. ઉપરાંત રિલાયન્સ ઇન્ડસ્ટ્રીઝ, અલ્ટ્રાટેક સિમેન્ટ, SBI, મહિન્દ્રા એન્ડ મહિન્દ્રા, BEL, લાર્સન એન્ડ ટુબ્રો, ટ્રેન્ટ, એક્સિસ બેંક અને એશિયન પેઇન્ટ્સ જેવા શેરોમાં પણ વેચવાલી જોવા મળી.
બીજી તરફ IT સેક્ટરમાં ખરીદીનો માહોલ રહ્યો. ઇન્ફોસિસમાં સૌથી વધુ 2.08 ટકાનો ઉછાળો આવ્યો. સાથે જ ટેક મહિન્દ્રા, પાવરગ્રીડ, અદાણી પોર્ટ્સ, મારુતિ, ભારતી એરટેલ અને કોટક મહિન્દ્રા બેંકના શેરોમાં પણ વધારો નોંધાયો.
વ્યાપક બજારની વાત કરીએ તો મિડકેપ અને સ્મોલકેપ શેરોમાં પણ નબળાઈ જોવા મળી. નિફ્ટી મિડકેપ ઇન્ડેક્સ 0.45 ટકા અને નિફ્ટી સ્મોલકેપ ઇન્ડેક્સ 0.61 ટકા ઘટ્યા. સેક્ટરલ ઇન્ડેક્સમાં નિફ્ટી મેટલ, રિયલ્ટી અને ઓઇલ એન્ડ ગેસ શેરોમાં સૌથી વધુ દબાણ રહ્યું, જ્યારે IT અને મીડિયા સેક્ટરમાં ખરીદી જોવા મળી.
બજાર નિષ્ણાતોના જણાવ્યા મુજબ વૈશ્વિક અનિશ્ચિતતા અને ક્રૂડ ઓઇલના વધતા ભાવોને કારણે રોકાણકારો હાલ સાવચેત વલણ અપનાવી રહ્યા છે. બ્રેન્ટ ક્રૂડના ભાવમાં આજે 2.74 ટકાનો વધારો નોંધાયો અને તે પ્રતિ બેરલ 108.6 ડોલર સુધી પહોંચ્યો. વિદેશી સંસ્થાકીય રોકાણકારો (FII) ગુરુવારે ખરીદદારો તરીકે જોવા મળ્યા હતા. તેમણે લગભગ ₹187 કરોડના શેરોની ખરીદી કરી હતી. જોકે, તેના પહેલાં સતત સાત દિવસ સુધી તેમણે વેચવાલી કરી હતી.
એશિયન બજારોમાં પણ આજે મિશ્ર અને નબળો માહોલ જોવા મળ્યો, જેના કારણે ભારતીય બજાર પર પણ દબાણ વધ્યું. હવે રોકાણકારોની નજર આગામી વૈશ્વિક આર્થિક સંકેતો અને કરન્સી માર્કેટની ચાલ પર રહેશે.(નોંધ : અહીં આપવામાં આવેલી માહિતી ફક્ત આપની જાણકારી માટે છે. કોઈ પણ રોકાણ કરવા પહેલા નિષ્ણાંતોની સલાહ લેવી જરૂરી છે.)
