આ રીતે સ્ટોર કરશો તો લીલા ધાણા લાંબા સમય સુધી રહેશે એકદમ ફ્રેશ
લીલું ધાણા ઝડપથી પીળું પડી જાય છે કે સડી જાય છે? જાણો ફ્રિજમાં ધાણાને લાંબા સમય સુધી તાજું અને લીલું રાખવાની સરળ સ્ટોરેજ ટ્રિક્સ, જેથી અઠવાડિયા સુધી તેની સુગંધ અને સ્વાદ જળવાઈ રહે.
લીલું ધાણા શાક, દાળ, કઢી, ચટણી કે સલાડનો સ્વાદ અને સુગંધ વધારતું મહત્વનું હર્બ છે. પરંતુ બજારમાંથી લાવ્યા પછી થોડા જ દિવસોમાં તે પીળું પડી જવું, સુકાઈ જવું અથવા સડી જવું સામાન્ય સમસ્યા છે. જો તમે પણ આ મુશ્કેલીનો સામનો કરતા હોવ તો કેટલીક સરળ સ્ટોરેજ ટ્રિક્સ અપનાવીને ધાણાને લાંબા સમય સુધી તાજું રાખી શકો છો.
પહેલા ખરાબ પાંદડા દૂર કરો : બજારમાંથી લાવેલા ધાણાનું બંડલ ખોલીને તેમાં રહેલા પીળા, સુકાયેલા અથવા સડેલા પાંદડા અલગ કરી નાખો. જો મૂળ ખૂબ લાંબા હોય તો તેને થોડા કાપી શકો છો.
તરત ધોવાની ભૂલ ન કરો : ધાણાને સ્ટોર કરતા પહેલાં તેને ન ધોવું વધુ સારું માનવામાં આવે છે. ભેજ રહેવાથી તે ઝડપથી ખરાબ થઈ શકે છે. જો ધાણા થોડું ભીનું હોય તો તેને થોડો સમય પંખા નીચે અથવા સૂકા કોટનના કપડા પર પાથરી રાખો જેથી વધારાની ભેજ દૂર થઈ જાય.
એરટાઇટ ડબ્બામાં રાખો : સાફ અને સંપૂર્ણ સૂકા એરટાઇટ પ્લાસ્ટિક અથવા કાચના ડબ્બાની તળિયે ટિશ્યૂ પેપર પાથરો. ત્યારબાદ ધાણાને કાપ્યા વગર તેમાં ગોઠવો અને ઉપર ફરી એક સૂકો ટિશ્યૂ પેપર મૂકી ડબ્બું સારી રીતે બંધ કરી દો. આ ટિશ્યૂ વધારાની ભેજ શોષી લે છે અને ધાણાને લાંબા સમય સુધી તાજું રાખવામાં મદદ કરે છે.
ઝિપ-લોક બેગનો ઉપયોગ કરો : ધાણાને ઝિપ-લોક બેગ અથવા એરટાઇટ કન્ટેનરમાં રાખીને ફ્રિજના વેજીટેબલ ક્રિસ્પર વિભાગમાં મૂકો. દર ત્રણથી ચાર દિવસે ટિશ્યૂ પેપર ચકાસો. જો તેમાં ભેજ આવી ગઈ હોય તો તેને બદલીને નવું સૂકું ટિશ્યૂ મૂકી દો.
પાણીના ગ્લાસમાં પણ રાખી શકો : જો તમે ધાણાને ધોઈને રાખવા માંગતા હોવ તો તેની મૂળ કાપી, ડાંઠનો ભાગ પાણી ભરેલા ગ્લાસમાં મૂકો. ત્યારબાદ ગ્લાસને ફ્રિજમાં રાખો. સમયાંતરે પાણી બદલવાથી ધાણા વધુ સમય સુધી તાજું રહી શકે છે.
કપડા અથવા અખબારમાં લપેટી શકો : જો ડબ્બાનો ઉપયોગ ન કરવો હોય તો ધાણાને સૂકા કોટનના કપડા અથવા અખબારમાં હળવેથી લપેટીને પછી એરટાઇટ બેગ અથવા ડબ્બામાં રાખી શકાય છે.
ધ્યાનમાં રાખવાની વાત : ધાણાની તાજગી જાળવવા માટે સૌથી મહત્વનું છે કે તેમાં વધારાની ભેજ ન રહે. યોગ્ય રીતે સ્ટોર કરવામાં આવે તો લીલું ધાણા સામાન્ય કરતાં વધુ દિવસો સુધી તાજું અને ઉપયોગ લાયક રહી શકે છે.
