Gold Silver Price : ડોલર ડગું મગુ થતાં જ સોનું બનશે રાજા, બે દિવસમાં 38,000 રૂપિયા વધ્યા ચાંદીના ભાવ
ડોલર ઇન્ડેક્સમાં ઘટાડો અને મધ્ય પૂર્વના તણાવને કારણે સોના-ચાંદીના ભાવમાં ભારે ઉછાળો નોંધાયો છે. નિષ્ણાતો માને છે કે ડોલરની નબળાઈ અને ભૂ-રાજકીય તણાવ કિંમતી ધાતુઓની માંગ સલામત રોકાણ તરીકે વધારશે
ડોલર ઇન્ડેક્સમાં ઘટાડો અને મધ્ય પૂર્વમાં વધતા તણાવને કારણે સોના અને ચાંદીના ભાવમાં ફરી એકવાર તેજી જોવા મળી રહી છે. રાષ્ટ્રીય રાજધાની દિલ્હીમાં બુધવારે સતત બીજા દિવસે કિંમતી ધાતુઓના ભાવમાં ઉછાળો નોંધાયો હતો. વૈશ્વિક બજારમાં મજબૂત વલણ અને નબળા ડોલરે આ વધારાને ટેકો આપ્યો હોવાનું વેપારીઓ જણાવી રહ્યા છે.
દિલ્હી બુલિયન માર્કેટમાં ચાંદીના ભાવ પ્રતિ કિલોગ્રામ ₹2.98 લાખ સુધી પહોંચી ગયા છે, જ્યારે સોનાના ભાવ પ્રતિ 10 ગ્રામ ₹1.65 લાખ પર પહોંચ્યા છે. નોંધનીય છે કે ચાંદીના ભાવમાં છેલ્લા બે દિવસમાં ₹38,000થી વધુનો વધારો થયો છે, જેના કારણે ચાંદી ફરી એકવાર ₹3 લાખના સ્તર નજીક પહોંચી ગઈ છે. સાથે જ, સોનાના ભાવમાં પણ બે દિવસમાં ₹12,000થી વધુનો ઉછાળો જોવા મળ્યો છે.
ઓલ ઈન્ડિયા સરાફા એસોસિએશન મુજબ, ચાંદીના ભાવ ₹14,300 અથવા 5.03 ટકા વધીને ₹2,98,300 પ્રતિ કિલોગ્રામ (બધા કર સહિત) થયા છે. અગાઉના સત્રમાં ચાંદી ₹2,84,000 પ્રતિ કિલોગ્રામ પર બંધ થઈ હતી. તે જ સમયે, 99.9 ટકા શુદ્ધતાવાળું સોનું ₹7,400 અથવા 4.69 ટકા વધીને ₹1,65,100 પ્રતિ 10 ગ્રામ પર પહોંચી ગયું છે, જ્યારે મંગળવારે તેનો ભાવ ₹1,57,700 પ્રતિ 10 ગ્રામ હતો.
આંતરરાષ્ટ્રીય બજારમાં પણ સોના અને ચાંદીના ભાવમાં મજબૂત વધારો જોવા મળ્યો છે. હાજર ચાંદી $4.28 અથવા 5.03 ટકા વધીને $89.35 પ્રતિ ઔંસ થઈ છે, જ્યારે સોનાનો ભાવ $100થી વધુ વધીને $5,047.07 પ્રતિ ઔંસ પર પહોંચ્યો છે. લેમન માર્કેટ્સ ડેસ્કના રિસર્ચ એનાલિસ્ટ ગૌરવ ગર્ગે જણાવ્યું હતું કે વેપાર દરમિયાન સોનાના ભાવમાં ત્રણ ટકાથી વધુનો ઉછાળો આવ્યો હતો, જ્યારે ચાંદીમાં ભારે અસ્થિરતા બાદ છ ટકાનો વધારો નોંધાયો હતો.
મલ્ટી કોમોડિટી એક્સચેન્જ (MCX) પર પણ સોના અને ચાંદીના ભાવમાં તેજી જોવા મળી રહી છે. ટ્રેડિંગ સત્ર દરમિયાન સોનાનો ભાવ ₹6,946 વધીને એક દિવસના ઉચ્ચતમ સ્તરે પહોંચ્યો હતો. સાંજે 7:10 વાગ્યે સોનું ₹1,59,251 પ્રતિ 10 ગ્રામ પર ટ્રેડ થઈ રહ્યું હતું. બીજી તરફ, ચાંદીના ભાવમાં પણ મોટો ઉછાળો આવ્યો હતો અને તે ₹2,87,139 પ્રતિ કિલોગ્રામના સ્તર સુધી પહોંચી હતી.
નિષ્ણાતોનું માનવું છે કે જ્યાં સુધી ડોલર નબળો રહેશે અને મધ્ય પૂર્વમાં ચાલી રહેલા ભૂ-રાજકીય તણાવનો ઉકેલ નહીં આવે, ત્યાં સુધી સોના અને ચાંદીના ભાવમાં તેજી યથાવત રહી શકે છે. HDFC સિક્યોરિટીઝના સિનિયર એનાલિસ્ટ સૌમિલ ગાંધીએ જણાવ્યું હતું કે અમેરિકા અને ઈરાન વચ્ચે વધતા તણાવને કારણે સલામત રોકાણ તરીકે સોના અને ચાંદીની માંગ વધી છે, જેના કારણે કિંમતી ધાતુઓના ભાવમાં સતત વધારો જોવા મળી રહ્યો છે. (નોંધ : અહીં આપવામાં આવેલી માહિતી ફક્ત આપની જાણકારી માટે છે. કોઈ પણ રોકાણ કરવા પહેલા નિષ્ણાંતોની સલાહ લેવી જરૂરી છે.)
