Technology : જો તમને કોઈ વોટ્સએપ કે ફેસબુક પર ધમકી આપે તો શું કરવું ? કાનૂની કાર્યવાહીની જોગવાઈ જાણો
આજના યુગમાં સોશિયલ મીડિયા લોકોના જીવનમાં એક મહત્ત્વનો ભાગ ભજવે છે. જોવા જઈએ તો, ઇન્સ્ટાગ્રામ, વોટ્સએપ, ફેસબુક અને અન્ય સોશિયલ મીડિયા પ્લેટફોર્મ હવે કમાણીના માધ્યમ બની ગયા છે. હવે વિચારો કે, સોશિયલ મીડિયા પ્લેટફોર્મ થકી જો તમને કોઈ ધમકી આપે તો? ચાલો જાણીએ આવી પરિસ્થિતિમાં તમારે શું કરવું જોઈએ.
જો બ્લેકમેઇલર્સ પૈસા માંગે છે, તો પૈસા ચૂકવશો નહીં. જે નંબર અથવા આઈડી પરથી ધમકીભર્યો મેસેજ આવ્યો છે તેને બ્લોક કરો. રિપોર્ટિંગ અથવા બ્લોક કરવાની સુવિધા પ્લેટફોર્મ પર ઉપલબ્ધ હોય છે. યુઝર્સ ઓનલાઈન અને ઓફલાઈન બંને રીતે કાનૂની કાર્યવાહી પણ કરી શકે છે.
ઓનલાઈન ધમકી મળે તો એપ્લિકેશન પર રિપોર્ટ કેવી રીતે કરવું? સૌપ્રથમ WhatsApp પર ચેટબોક્સ ખોલો. હવે ઉપર જમણી બાજુએ "ત્રણ ડોટ" ઓપ્શન પર ક્લિક કરો. મેનુમાં "રિપોર્ટ/બ્લોક" ઓપ્શન પર ક્લિક કરો.
ફેસબુક પર રિપોર્ટ કરવા માટે તમને પોસ્ટની ઉપર જમણી બાજુએ "રિપોર્ટ પોસ્ટ" અને "રિપોર્ટ ફોટો" નો ઓપ્શન દેખાશે. તમારી જરૂરિયાત મુજબ કોઈ એક ઓપ્શન પર ક્લિક કરો.
કાનૂની કાર્યવાહી કેવી રીતે કરવી? યુઝર્સ નેશનલ સાયબર ક્રાઈમ રિપોર્ટિંગ પોર્ટલની મુલાકાત લઈને ફરિયાદ નોંધાવી શકે છે. પોર્ટલ પર મહિલાઓ/બાળકો, નાણાકીય છેતરપિંડી અને અન્ય સાયબર ક્રાઈમ કેસ માટે અલગ અલગ પોર્ટલ ઉપલબ્ધ છે. ધમકી અનુસાર કોઈ એક ઓપ્શન પર જાઓ અને "File Complaint" ના ઓપ્શન પર ક્લિક કરો. જણાવી દઈએ કે, આટલું કરતાં પહેલા તમારે રજીસ્ટ્રેશન ફરજિયાત કરાવવું પડશે.
આ સિવાય તમે હેલ્પલાઇન નંબર 1930 પર પણ કૉલ કરી શકો છો. તમે સ્થાનિક પોલીસ સ્ટેશનમાં જઈને ભારતીય દંડ સંહિતા અને IT એક્ટ 2000 ની જોગવાઈ હેઠળ FIR નોંધાવી શકો છો. આ ઉપરાંત, તમે શહેરના સાયબર ક્રાઈમ સેલમાં પણ જઈ શકો છો અને કેસ વિશે ફરિયાદ નોંધાવી શકો છો.
ફરિયાદ નોંધાવતી વખતે તમારે પુરાવા સાથે રાખવા. શંકાસ્પદ વ્યક્તિને ઓળખવા માટે ફોટોગ્રાફ્સ અથવા અન્ય દસ્તાવેજોની જરૂર પડશે. મેસેજ/પોસ્ટ/ફોટો પ્રોફાઇલનો સ્ક્રીનશોટ લો, જેમાં સમય અને કોન્ટેક્ટ જેવી વિગતો દર્શાવવી. મોબાઇલ નંબર અને યુઝર્સ નામ નોંધવાનું ભૂલશો નહીં. જો જરૂર હોય તો તમે યોગ્ય વકીલ સાથે પણ વાત કરી શકો છો.
